Янко Бодваї

Янко Бодваї
Назвиско	Юца
Датум народзеня	12. септембра 1942.
Датум упокоєня	17. априла 2025 (83)
Державянство	югославянске, сербске
Язик творох	сербски, руски
Школа	Штредня фахова школа, Нови Сад
Висша школа	Висша погосцительна школа, Беоґрад
Период твореня	1961—2002.
Жанри	погосцительство, образованє кадрох
Поховани	На Новим теметове у Новим Садзе

Янко Бодваї (*12. септембер 1942—†17. април 2025), инженєр готелиєрства, директор у новосадских готелох, коавтор Сучасней рускей кухарки.

Биоґрафия

Янко Бодваї народзени 12. септембра 1942. року у Руским Керестуре. Оцец Йовґен и мац Ксения Бодваї родз. Колошняї. Янко мал брата Славка и шестру Марию. Основну школу Янко закончел у родзеним валалє. Штредню фахову школу закончел у Новим Садзе и почал робиц у обласци погосцительства, перше як келнер у готелу Путник по 1963. рок кед пошол на одслуженє воєного року. Од 1965. року Янко Бодваї робел у ресторану на Петроварадинскей твердинї дзе 1969. року постал шеф сали у готелу Твердиня понеже у медзичаше вон 1967. року закончел Погосцительну школу за ВК роботнїкох. Од 1973. року Янко бул о. д. директора готела Твердиня-Варадин. Року 1977. бул розпоредзени на место шефа сали у готелу Парк. Вельке роботне искуство и дошколовйованє му оможлївели же би бул и наставнїк ресторанства. Року 1979. Янко Бодваї закончел Висшу погосцительну школу у Беоґрадзе. Його пошвеценосц и фаховосц були препознати та бул велї роки на директорских функцийох у новосадских готелох Нови Сад и на СПЕНС-у. Янко Бодваї бешедовал шейсц язики (нємецки, анґлийски, италиянски, мадярски, французки, ) а то у погосцительней привреди окреме значна прикмета доброго руководителя.

Янко Бодваї бул оженєти зоз Юлияну родз. Дамянович, у малженстве мали дзивки Снежану и Наташу.

Од 1970. року бул у Орґанизацийним одборе Збору туристичних роботнїкох Сербиї и член жирия. Янко Бодваї бул атвор вецей наукових роботох на тему унапредзованя и вреднованя роботи и роботней творчосци у погосцительней туристичней привреди Сербиї, за цо є вецейраз наградзовани.

Як член ХОРЕС-у Янко Бодваї бул совитнїк за ришованє проблемох у обласци туризма и погосцительства. Янко Бодваї бул нєпостредна особа, добри орґанизатор и почитовани менаджер хтори верел же шицки продукцийни и услужни проблеми мож ришиц зоз упарту роботу и искуством та знаньом хторе у його фаху було потребне. Янка Бодвая ше трима же ше му, як менаджерови у погосцительним подприємстве Варадин и директорови пар готелох, з добрим и рационалним послованьом удало врациц шицки Варадиново длуства.

Янко Бодваї достал велї награди и припознаня з обласци погосцительней дїялноасци.

Його искуство и знанє з обласци погосцительства го квалификовао же би бул єден з авторох репрезентативней Сучасней рускей кухарки хтора видата 1987. року и хтору ше трима за найлєпши приручнїк тей файти медзи Руснацами.

До пензиї пошол 11. априла 2002. року.

Янко Бодваї умар 17. априла 2025. року и поховани є на Новим теметове у Новим Садзе.

Ґалерия

Хвильки кед Янко Бодваї достава автоґрам од Нила Армстронґа, першого чловека хтори ступел на Мешац
Янко Бодваї вислугує Тита и Йованку

Литература

Янко Бодваї (1942-2025), з РТ Войводина, Руске слово, рок LXXXI, число 17 (4146), Нови Сад, 25. април 2025, бок 9.

Вонкашнї вязи

Поховани инженєр готелиєрства Янко Бодваї, РТ Войводина, rtv.rs/rsn/, 21. април 2025.

Поховани инженєр готелиєрства Янко Бодваї, РТВ, Рутенпрес, ruskeslovo.com, 22. април 2025