Яблуков есенц
Яблуков есенц настава зоз ферментацию соку з яблукох. Найлєпше хасновац природни яблуков есенц, у хторим нєт нїяки додатки. Под час процесу ферментациї природни цукри з яблукох ше розкладаю з помоцу бактерийох и квасу. Перше настава алкогол, а потим есенц. Яблуков есенц ше найчастейше предава нєфилтровани и нєпастеризовани, а кед ше фляшка отвори, вон з часом оксидує и постава цми кафови. На дну фляшки ше з часом зяви жґрид (ушедок) и то цалком у порядку. Тот жґрид ше углавним состої зоз бактерийох есенцовей квашнїни.[1][2]
Здравствени предносци
[ушориц | ушор жридло]Яблуков есенц насампредз поживови продукт. Есенц спада до нєобходней поживи за чловеково костиранє без огляду на тото чи є алкоголни, вински або яблуков. У кухнї ше хаснує за шалату, як додаток вареним єдлом або за конзервованє жимнїци. Яблуков есенц ше хаснує як и кажди други есенц, з тим же вон здравши од каждого другого есенцу до тей мири же ше часто хаснує як лїк. Вон спада до електролитох хтори одвичательни за прецек електрицитету у целу. За лїченє реуматоїдного артритису препоручує ше облоги зоз яблукового есенцу. Народна медицина яблуков есенц комбиновани з медом и воду препоручує за одстраньованє хронїчней вистатосци.
Пририхтованє яблукового есенцу
[ушориц | ушор жридло]
Яблуков есенц ше прави зоз узретих яблукох. Яблука треба же би були цалком узрети, та мож похасновац и тоти цо опадали. Яблука ше поумива, пореже, положи до емайлованей або пластичней судзини зоз широким дном. Потим ше их прелєє з горуцу воду (65-70 °C). Кед же ше прави яблуков есенц, потребни и цукер. На єдну килу сладких яблукох треба додац 50 ґрами цукру, а за квашни -100 ґрами. Судзину положиц на цепле место, алє нє на слунко. Потребне часто премишац масу же би нє пришло до поверхносного вреца. После двох тижньох ше прецадзи през густу ґазу и прелєє до велького дунца за вреце. Найлєпше охабиц 5-7 центи воздуху до верху дунца. Охабиц най одстої ище два тижнї. Нєрозмутькани, готови есенц пресипе ше до фляшкох, нє до верху. Фляшки ше добре завре, а кед ше есенц сце длужей чувац, затички ше прелєє з воском. Треба их чувац на цмим месце, на температури од од 4-20 °C.
Яблуков есенц за швидке худнуце
[ушориц | ушор жридло]Есенцова або оцтова квашнїна пошвидшує претровйованє протеїнох хтори важни за творенє и функционованє гормону роснуца хтори найзначнєйши за швидкосц базалного метаболизма. То значи же яблуков есенц пошвидшує претровйованє на исти способ, алє и процес трошеня калорийох. Бета каротен хтори ше находзи яблуковим есенцу тиж помага розкладанє масних наскладох.
Яблуков есенц ше пиє пред єдзеньом, же би ше пошвидшало претровйованє унєшеней поживи и зменшало дальши апетит. То одлична метода детоксикациї, а бактериї хтори ферментовали есенц одлични за здравє черевох и дїйствую як пробиотик. З пошвидшованьом претровйованя и метаболизма, чкодлїви материї ше швидше вируцую з цела а енерґия дуплує, цо ридки случай з диєтами за худнуце.
Кед ше жадаме ментовац звишних килох, препоручує ше кажде рано пред єдзеньом попиц два ложки яблукового есенцу у погаре води, або исту мишанїну попивковац док ше є же би ше зопарло преєданє и злєпшало дальше претровйованє.
Совити за хаснованє
[ушориц | ушор жридло]Препоручена дньова доза яблукового есенцу як еликсира за нукашнє хаснованє то розпущенїна 2 ложкох есенцу у погаре води, з додатком двох ложичкох меду. Кед у питаню яблуков есенц, побочни зявеня барз ридки. При даєдних особох можу буц присутни иритация шлїжацей скорочки жалудка и надражнєти пажерак (єдняк). У случаю предозованя, зявюю ше акутни зявеня як цо високи прицисок и проблеми з роботу покруткох.
