Юрий Павич
| Юрий Павич | |
|---|---|
| Ту будзе Фотка.jpg | |
| Датум народзеня | 19. априла 1890. |
| Датум упокоєня | 12. авґуста 1963 (73) |
| Державянство | угорске, югославянске |
| Язик творох | горватски, руски |
| Школа | Ґимназия, Заґреб |
| Универзитет | Богословия, Львов и Фрайбурґ |
| Наукови ступень | Докторат, Заґреб |
| Период твореня | 1915-1953. |
| Жанри | священїцтво, редакторство, професура |
| Поховани | у Заґребе |
о. др. Юрий Павич (*19. април 1890-†12. авґуст 1963), священїк, коцурски и керестурски капелан, перши секретар РНПД, новосадски парох, перши редактор Руских новинох, професор и декан Католїцкого богословского факултета у Заґребе.
Юрий Павич ше народзел 19. априла 1890. року у валалє Драґошевци (парохия Радатовичи) у Жумберку (Горватска). До основней школи ходзел у Радатовичох, а до ґиманизиї у Заґребе, як питомец грекокатолїцкей семинариї на Ґричу. Богословию започал студирац 1909. року у Львове, предлужел у Фрайбурґу (Швайцарска), дзе дипломовал 1914. року и здобул лиценцият. Студирал и на Византолоґийним институту у Минхену. Студиї закончел у Заґребе зоз докторантским курсом 1917. року.
После женїдби зоз Милку Вишошевичову, дзивку паноца Янка Вишошевича, за священїка бул пошвецени 3. януара 1915. року у Заґребе. Пошвецел го крижевски владика Юлий Дрогобецки. Мал шесцеро дзеци: синох Дюру, Любомира, Славка и Бранка, и два дзивки: Бланку и Милицу.
За капелана у Коцуре бул меновани 15. фебруара 1915. року, а 19. априла 1917. постал капелан у Руским Керестуре. Ту бул и катехет. Написал по руски катакиз за грекокатолїцких школярох. Обявени є 1924. року под назву Християнска наука. Под час пребуваня у Руским Керестуре почал студирац право, та єден час там бул и новтаруш и закладал ше же би нє була заварта руска школа.
За пароха у Новим Садзе Юрий Павич поставени 1924. року, вироятно прето же 15. октобра истого року на Главней схадзки РНПД у Петровцох принєшена одлука же би ше новини видавало у Новим Садзе, а за їх редактора меновани Юрий (Дюра) Павич. Зоз тедишнїм законом було одредзене же редактор муши бивац у месце дзе ше друкую новини. Службованє у Новим Садзе бул найплоднєйши период його дїялносци як на душпастирским, так и на дружтвеним планє. Ту вон 1930. и 1932. року збудовал два анекси парохиялного дому зоз штирома квартелями, а купел и 35 гольти жеми за парохию у Будяновцох при Руми. И нукашньосц новосадскей парохиялней церкви св. Апостолох Петра и Павла дал омальовац спрам мустрох принєшених зоз церкви у Коломиї (Україна). И звонка реновирал церкву. Виборел ше 1924. року за руску школу за новосадски дзеци, до котрей уписал и свойо. А 1927. року при церкви збудовал и дзияковню. У 1929. року бул меновани за декана Банатского деканата. Попри тим, предлужел и студиї права у Беоґрадзе, дзе и дипломовал. Його синове Любомир и Бранко були од 1936. по 1941. рок активни на театралним планє у рамикох новосадскей Рускей читальнї, а шицки їх браца и шестри барз добре бешедовали по руски.
Под час новосадскей рациї мадярского войска и полициї 21. януара 1942. року, у Милетичовей улїци заштрелєли и Павичового сина Славка. После того ше Павичова фамилия одселєла до Заґребу. Там Павич 16. юлия 1944. року докторовал на Богословским факултету и бул шеф катедри за компаративне богословиє. Порядни универзитетски професор бул од 1943. по 1952. рок, а 1953. року бул меновани за почесного каноника Крижевского владического капитола. При стретнуцу з рускима богословами и другима Руснацами, вон вше бешедовал лєм по руски.
Умар 12. авґуста 1963. року у Заґребе и там є поховани.
Литература
[ушориц | ушор жридло]- Янко Рамач: На крижней драги, Руснаци у Югославиї од 1918-1941. року, Руске слово, Нови Сад, 2016, боки 49-69.
- о. проф. др Роман Миз: Священїки дакедишнього Осєцкого викарията, Видавателє Парохия св. ап. Петра и Павла, Нови Сад и Максима, друкарня и видавательна хижа, Петроварадин, 2016, б. 249-251.