Прейдз на змист

Юлиян Фейди

Додай вязи
Материял зоз Википедиї
Юлиян Фейди
Юлиян Фейди
Датум народзеня30. януара 1945.
Датум упокоєня5. авґуста 2024 (80)
Державянствоюгославянске, сербске
Язик творохруски, сербски, италиянски
Школаґимназия, Заґреб
Универзитетфилозофия (2 роки). Свеучилиште, Заґреб фармация, Беоґрад
Период твореня1970—2010.
Польо дїялносцифармация, култура, гуманитарна дїялносц
ПохованиРуски Керестур

Юлиян Фейди (*30. януар 1945—†5. авґуст 2024), маґистер фармациї, активни учашнїк у гуманих, културних и духовних обласцох живота Руского Керестура.

Биоґрафия

[ушориц | ушор жридло]

Юлиян Фейди ше народзел 30. януара 1945. року у Руским Керестуре, як найстарши од трох синох скравца оца Емила и мацери Леони. У родним валалє закончел основну школу, а кед мал 14 роки рушел на драгу за священїка до Заґребу, дзе закончел штиророчну ґимназию и два роки филозофиї. Околносци го заш лєм одведли на другу драгу, та у Беоґрадзе 1965. року почал студиї фармациї.

Под час студийох Юлиян Фейди ше оженєл зоз Меланию Рамачову, у малженстве мали дзивку Терезку и син Тихомира.

По законченю студийох початком 70. рокох Юлиян Фейди почал и свою професийну роботу у апатикох Дома здравя Кула, у Кули дзе єден час бул и шеф апатикох за цалу општину, а найдлужей робел як руководитель керестурскей апатики одкадз ше и пензионовал.

Юлиян Фейди попри у своєй професиї бул велї роки активни и як член хору Дому култури и церкви св. о. Миколая, вєдно зоз свою супругу, а тиж и окремного Церковного хору, под руководством дириґентох од Иринея Тимка, прейґ о. Михайла Макая, Юлияна Рамача по Лидию Пашо.

Гуманитарна активносц

[ушориц | ушор жридло]

Фейди останє запаметани и по єдней своєй власней борби, борби зоз алкоголизмом, кед у Керестуре, вєдно зоз Ярославом Ковачом власнїком Авто-школи, после свойого лїченя од зависносци, основали Клуб лїчених алкоголичарох Здрави живот, символично на швето Преображенє Господнє 6. авґуста 2001. року. Вони и ище дзепоєдни ше перше нєформално сходзели и потримовали у абстиненциї. Потим покончели же би ше психолоґ Ярослава Еделински обучела за їх терапеута та теди и основани Клуб. Теди мотивовани велї особи цо мали проблем з тоту зависносцу же би пошли на лїченє и пременєли свой живот. Клуб котрому Фейди бул и предсидатель полни 10 роки активно робел на потримованю своїх членох през порядни стретаня, помоц фаховцох рижних медицинских профилох, а паралелно робел и на превенциї зависносцох у школи. Клуб урядово престал робиц пре административни причини, алє ше його члени и далєй потримовали, а живот велїх фамелийох вишол з пекла зависносци.

Велї роки Юлиян Фейди бул и активни член Ловарского дружтва Ярабица, най повеме у його златних рокох. Дзекуюци и Фейдийовому знаню италиянского язика, Дружтво розвило ловни туризем зоз италиянскима колеґами котри до Керестура приходзели велї роки. Под час воєних 90. рокох дзепоєдни з нїх у сотруднїцтве з Фейдийом посилали до Керестура лїки на вецей заводи, як и дарунки до Дому за старих.

Як пензионер Фейди мал вецей часу та го подаровал и своєй парохиї кед бул вибрани за члена Церковного одбору на пейцрочни мандат од 2006–2011 рок, у котрим бул секретар, а потим на ище єден од 2011–2016, кед бул предсидатель. У тим периодзе, поготов у другим мандату, од 2008. року за пароха о. Михайла Малацка, поробени вецей капитални роботи на катедралней церкви, а тиж и на теметове, у Водици. Церковни одбори у котрих бул член и предсидатель Юлиян Фейди, мали задаток орґанизовац на високим уровню и велї єдинствени, та историйни подїї и ювилеї парохиї, Еґзархату, Водици, дзе требало прияц велїх и найвисших госцох зоз церковного и цивилного живота. Шицко тото вимагало вельо орґанизаторски схопносци и анґажованя, роботи, пенєжу, а вредних одборцох нєсебично предводзел предсидатель Юлиян Фейди.

Маґистер фармациї Юлиян Фейди ше упокоєл 5. авґуста 2024. року у 80. року живота. Поховани є на теметове у Руским Керестуре.

Литература

[ушориц | ушор жридло]
  • Словнїк медицинскей терминолоґиї, сербско, латинско, руски, Дружтво за руски язик, литературу и културу, Нови Сад, 2006, б. 198.

Вонкашнї вязи

[ушориц | ушор жридло]
Превьате зоз "https://rsk.wikipedia.org/w/index.php?title=Юлиян_Фейди&oldid=14647"