Юлиян Пап


Юлиян ПАП

Народзени	3. децембра 1943
Умар	2. септембра 2022. (79)
Державянство	югославянске, сербске
Язик творох	руски, сербски
Школа	Штредня польопривреднa школa у Зомборе и Футоґу
Универзитет	Польопривредни факултет у Новим Садзе
Период твореня	1966—2015.
Жанри	новинарство, публицистика
Поховани	на теметове у Руским Керестуре

Юлиян Пап (*3. децембер 1943—†2. септембер 2022) новинар, прекладатель, публициста и польопривредни фаховец.

Биоґрафия

Юлиян Пап ше народзел 3. децембра 1943. року у Руским Керестуре. Родичи Йовґен Папгаргаї и Наталия Папгаргаї (народзена Сабадош). Основну школу закончел у Руским Керестуре и Кули, Штредню польопривредну школу у Зомборе и Футогу, Польопривредни факултет и студиї анґлийского язика у Новим Садзе.^[1] У периодзе од 1966. по 1990. рок робел як наставнїк анґлийского язика у Основней школи у Руским Керестуре, як новинар и редактор у НВП Руске слово и часопису Добро ютро, як фаховец за польопривреду и аґрарну политику у Вивершней ради Войводини, у Покраїнскей Конференциї Социялистичного союзу Войводини и Союзней Конференциї Социялистичного союзу Югославиї. Бул активни дружтвени роботнїк.

Достал награду „Светозар Маркович – Тоза“ Дружтва новинарох Войводини за 1971. рок (за репортажу зоз Ковентрию у Анґлиї). Ма вецей дружтвени припознаня за вкупну роботу.

Оженєл ше зоз Иринку Лендєрову, мали синох Мирослава и Бориса.

Од 1991. року бул у инвалидней пензиї.

Юлиян Пап умар 2. септембра 2022. року. Поховани є у Руским Керестуре.

Литературна робота

Писал прилоги з рижних обласцох за скоро шицки руски виданя и емисиї Радио Нового Саду на руским язику. Препознатлїви му гуморески з валалского живота Бачи Дюра уз Керестура, теми зоз прешлосци Руснацох, стретнуца з людзми. Прекладал духовну прозу и поезию з анґлийского язика за часопис Дзвони, як и други тексти зоз шветовей литератури. Участвовал у виробку даєдних руских словнїкох.

Достал Награду за приповедку дзецинского часопису Заградка (2011), як и Награду часопису Шветлосц за есеї и преклади зоз шветовей литератури (2014).

Обявени му 9 кнїжки:

1. Защита рошлїнох (фахова польопривреда, по сербски);

2. Кнїжка о джунґли (школска лектира, преклад);

3. Природа бешедує о Богу и Хвалїм Це, Господи (2 кнїжки, духовна литература, преклад)

4. Good Morning Добре рано – Учиме ше по анґлийски и по руски (образованє);

5. Бачи Дюра з Керестура (2 кнїжки, гуморески з валалского живота);

Ей бул то кедиш красни час

Правда иста, нїкому нє гутор

6. Стретнуца з прешлосци (история, вибор зоз шветовей литератури);

7. Чом ше качка з воду мачка (дзецинска литература).