Юлиян Каменїцки

Юлиян Каменїцки
Датум народзеня	12. априла 1938.
Датум упокоєня	6. децембра 2020 (82)
Державянство	югославянске, сербске
Язик творох	руски
Универзитет	Висша управна школа, Нови Сад
Период твореня	1956 — 1996.
Жанри	новинарство
Поховани	у Атланти, Джорджия, ЗАД

Юлиян Каменїцки (*12. април 1938—†6. децембeр 2020), новинар, редактор, дїяч у култури

Биоґрафия

Юлиян Каменїцки ше народзел 12. априла 1938. року у Коцуре, дзе закончел основну школу, а потим 1956. року почал робиц у НВП Руске слово як фоторепортер и поступнє ше позарядово дошколовйовал. Ище пред тим як дипломовал на Висшей управней школи, прешол на роботне место новинара спортскей рубрики, а же тоту длужносц совисно окончовал, доказує и награда Спартак хтору Рускому слову додзелєл Спортски союз Войводини. Од 1993. року єден час бул окончователь длужносци главного и одвичательного редактора новинох Руске слово. Под час пририхтованя за шветочне означованє 50-рочнїци виходзеня новинох Руске слово, обявел кратку моноґрафию з насловом Руске слово 50 роки, а у єй предлуженю, як другу часц, пораднїк будуцим руским новинаром под познату паролу „Хто, цо, дзе, кеди, прецо“.

Попри новинарства, Юлин Каменїцки ше занїмал и з литературну творчосцу. Перши литературни твор (проза) обявени му 1958. року, як и други дзепоєдни познєйши, алє превладала поезия. У Едициї Жридла, НВУ Руске слово му 1974. року видало збирку писньох з насловом Квитки и рана. Барз популарна при младих ище и нєшка шпиванка Якима Сивча Модерна любов („Вше ше людзе любовали“), за хтору текст написал Юлиян Каменїцки, а першираз є виведзена 1962. року на „Червеней ружи“.

Юлин Каменїцки дал свой допринос и розвою театралней уметносци при Руснацох. Такой по снованю Дома култури у Руским Керестуре вон, у периодзе од 1962. по 1967. рок, за програмни потреби новей институциї режирал два театрални фалати а у пейцох фалатох наступел як ґлумец. По снованю АРТ Дядя, сцени у Новим Садзе, Юлиян Каменїцки ґлумел у двох фалатох.

Юлин Каменїцки бул член Дружтва за руски язик, литературу и културу од 1974. року (у матичней кнїжки уписани є под числом 34). Секретар Дружтва бул од 1973-1975. рок, а потим єден час и член Предсидательства Дружтва.

После пензионованя, Юлин Каменїцки ше, вєдно зоз супругу др Елену, преселєл ґу своєй дзивки Марти до Зєдинєних Америцких Державох.

Юлиян Каменїцки умар 6. децембра 2020. року у Атланти, у союзней америцкей держави Джорджия.


Драмска дїялносц Юлияна Каменїцкия
ДОМ КУЛТУРИ РУСКИ КЕРЕСТУР
Рок	Театрални фалат	Улога
1962.	Осиф Торма: ХТО МА ПРАВО	режирал
1962.	Бранислав Нушич: ФРАҐМЕНТИ З АВТОБИОҐРАФИЇ	Паноцец
1964.	Й. С. Попович: ПОКОНДИРЕНА ТИКВА	режирал
1965.	Й. С. Попович: ЗЛА ЖЕНА	Ґроф Трифич
1965.	Бранислав Нушич: АНАЛФАБЕТА	ґлумел
1966.	Максим Горки: НА ДНУ	Пристав
1967.	Б. Нушич: ПОДОЗРИВА ОСОБА	Алекса шпиюн
АРТ ДЯДЯ Сцена Нови Сад
1970.	Славомир Мрожек: ПОЛИЦАЄ	Полицай
1978.	Любомир Симович: ЧУДО У ШАРҐАНЄ	Вишлїдзовач

Вше ше людзе любовали - Александра Яншик, Саня Полдруги и Звонимир Кочиш

Модерна любов - Дзивоцка шпивацка ґрупа КУД Тарас Шевченко з Дюрдьова

Ґалерия

Каменїцкийово и Маурерово у варошу Алтуна
Юлин и Елена Каменїцки у шерцу Ню Йорка
Браян и Марта Маурер и Елена и Юлин Каменїцки на острове Елис при памятнїку Шлєбода