Шопа

Шопа (серб. шупa) ма два главни значеня:

1. Простор, будовня або обєкт: мали будинок або простория за одкладанє:

а) алатох, древа, шена, чуткох, вигризкох, коча. Подобнє як и гамбар, плєвнїк, колїбa, баракa, хлїв (даєдни предмети за конї ше одкладало у хлїве),

б) нєшкайши часи допринєсли же у шопох стоя польопривредни машини (плуги, комбайни, розпирсковач, гноярка, авто итд.)

Приклади:

• Оцец трима мотокултиватор у шопи.

• Хижа стара, а двор зоз велїма стварами хтори стоя у шопох.

2. Слово шопа означує и хаснує ше го и зоз значеньом празне, т.є. нєполне або без смисла и без змисту.

а) Описови стан: дацо цо празне, дзираве, без смисла, часто ше хаснує у смислу „нїч“.

Приклад:

• Kед зме ше питали цо єст у торби, одвитовал: Цо я знам, шопа! (у смислу же празне).

Шопи за рижни наменки

Шопа як простория/обєкт ше може одношиц на рижни файти помоцних обєктох, од єдноставних колїбох по наменски просториї за:

• одкладанє дачого цо ше нє хаснує каждодньово як цо драбинки, стольчки, гордови, векши лади и подобне;

• одкладанє/чуванє уж нє нательо потребних старих предметох хтори ше дакеди хасновало як цо санки, кочерга, ожог, ключка, кросна, мотовидло, церлїца итд.;

• за складанє и триманє напр. чуткох, древа, ладичкох, клїткох, ґумох за трактори и авта и инше.

Шопка, то демунитив од слова шопа (мала шопа).

Шопи дакеди

Шопa давно була кажди правени мали закрити обєкт або простория за рижни познати наменки. Направена була часто отвореного типу (предок єй бул отворени, нє заверал ше) кед була заварта, була мурована з валькох. Часто була направена з рижного назбераного материялу, найчастейше зоз старих кояких латох и древох, дескох. Дзекеди була закрита зоз сламу лєбо з надом. Долу була обична уґажена глїна, цо значи же ше за правенє шопи хаснує шицко тото цо блїзко под рук койкадзи по обисцу и дворе. Найчастейше ше шопу лєбо шопку виплановало правиц там дзе було места у заднїм дворе (дакеди и у преднїм) и спрам наменки за цо ше ю будзе хасновац и яки предмети у нєй буду стац. За менши шопи ше нє правел даяки длугорочни план, нє були длуготирваци, а и предпоставяло ше же вони лєм дочасово направени, окреме кед су нє зоз твардого материялу и нє вельки. Случовало ше же таки мали обєкт-шопу правел сам ґазда зоз синами (кед же були одроснути) и домашнїма, або на мольбу зоз сушедами, родзину...

Нєшкайши шопи

Нєшкайши шопи маю иншаки випатрунок и їх правенє ше планує. Найчастейше су з твардого материялу (каменє, цегла, будовательни векши блоки, окремни плехово табли и долу уляти бетон), а закрити су зоз черепом лєбо сучаснєйшима плеховима таблами за будовнї такого типу. Таки шопи маю и нови назви – ґаража, хтора наменєна за уганянє авта. У ґаражох стоя и други ствари цо ше хаснує у обисцох. Тиж єст и назва гала. Вона у власнїцстве найчастейше дїловних ґаздох и їх фирмох, лєбо польопривредних маєткох.

У ґаздовстве хторе ше занїма зоз польодїлством заш лєм постоя и правя ше векши шопи дзе ше одклада польопривредну механїзацию: трактор, комбайн, плуги, прикочи, мотокултиватори, шеячки, односно шицки машини хтори по ґабаритох вельо векши.

Єст у остатнїм чаше и купчи шопи. Вони монтажни, а можу буц з древа, плеху або з пластичного материялу.

Литература

• Олена Папуґа, Руске обисце, Нови Сад 2012, бок 43.

Вонкашнї вязи

Izgradnja šupe od drveta belcom.rs
Pomoćni objekat,ostava,šupa. youtube.com
Ostava/ dekorativni prostor za drva