Шамла

Шамла, дем. шамлочка – нїзке шедзиско без хрибта (операча). Слово походзи од баварско-австрийского Schamel. Шамл(очк)а вше була направена з древа, могла буц штироугловей або правоугловей форми. Место штирох ножкох мала два з процивних бокох вертикланей плочи хтори при дну могли (а нє мушели) буц повязани з латку (подобнє як столїни на столє).

Хто медзи Руснацами нє памета дакого свойого з фамелиї як шедзи на шамлочки и пред собу пребера пасулю. На шамлочки звичайно шедзели дзеци, а старшим знала послужиц и як подкладаче под ноги же би им нє вишели. Нїяки причини анї моди нє були достаточни вируциц шамл(очк)и зоз каждодньового хаснованя, та аж по нєшка.

У новшим чаше єст шамлочки и з пластики, алє вони нє таки витримовни як древени.

Шамли и шамлочки найчастейше правели майстрове-тишлїре у чаше кед було розвитше ремесельнїцство. Часто знал направиц шамлочки и схопнєйши хлоп у обисцу кед мал потребни материял (деску, дещички, латки, гвозди) и орудиє (пилку, млаток) за правенє.

Вонкашнї вязи

шамлица/šamlica, Викиречник, sr.wiktionary.org, 8. септембер 2015.

Jovan Ćirilov, Šamlica, nin.rs, 20. septembar 2023.