Чик (рика)
| Чик (Чикер) | |
|---|---|
_1.jpg) Чикер скорей улїваня до Тиси | |
| Общи информациї | |
| Длужина | 95 km |
| Базен | 480 km² |
| Злїв | Чарноморски |
| Водоцек | |
| Жридло | Чикерия у  Мадярскей |
| Надморска висина жридла | 128m |
| Улїв до рики | Тиса |
| Надморска висина жридла | 74 m |
| Ґеоґрафски характеристики | |
| Держави | Мадярска,
 Сербия |
| Населя | Чантавир, Бачко Петрово Село |
Чик (тиж мено Чикер), то ричка у Сербиї, у сиверней часци Войводини, у Бачким реґионє. Жридло ше находзи при валалє Чикерия у Мадярскей, коло самей гранїци зоз Сербию.[1]
Ричне корито длугоке коло 95 километри, а улїва ше до Тиси як притока з правого боку, при Бачким Петровим Селу.[2]
Цек рики
[ушориц | ушор жридло]Жридло Чику на висини од коло 128 метери, а ричка достава елементи потоку котри ше находзи блїзко при малих валалох Чикерия и Кобино Село. Чече на юговосток и преходзи коло местох Верушичи и Наумовичи.[3]
Чик гранїчна ричка у хотарох, вибива у сиверовосточней часци Суботицкей писковини, заходно од Суботици. Тота ровнїнска рика нє ма жридло у класичним смислу, алє ше полнї зоз под'жемних водох хтори помали або под прициском виходза зоз седиментних стинох, зоз лесових долїнох. Корито єй реґуловане лєм през населєня Чантавир, Торньош (при Новим Орахове) и Бачке Петрове Село. Векша часц Чику замочарована и оброснута зоз барску веґетацию. Чик достава димензиї меншей рики блїзко при Чантавире и Бачким Душанове. При Чантавире, нєдалєко од улїву, направени гаци з обидвох бокох, же би ше реґуловало цек рики.[2]
У долнєй часци цеку, коло побрежя, рошнє густа трава глїбоко 2-4 метери. Чик далєй ище чече коло Торньошу, Нового Орахова, Светичева и Оборнячи, а при Бачким Петровим Селу ше улїва до Тиси на надморскей висини 74 метери. У Чику жию даскельо файти риби як цо лєняк, чука и потька. Поверхносц злїву коло 480 km2.
Походзенє мена
[ушориц | ушор жридло]Даєдни думаю же мено рики походзи од мадярского слова csikó, цо у прекладзе значи „гаче.”
Друга предпоставка же походзенє водзи од мена валалу Чикерия, дзе ше и находзи главне жридло.
Треца опция же мено приходзи од риби чиков (Misgurnus fossilis), хторей ту и типови бивальнїк.
Тота рика дакеди була екстремно богата зоз тоту рибу, алє нєшка у цалим цеку Чику риби, та анї чикови, єст вше менєй.
Руснаци з Нового Орахова и Чик
[ушориц | ушор жридло]Чик чече коло самого Нового Орахова, а коло Чику дакеди поєдини часци були полєшени. Красни лєшики були нагода, окреме младежи присц, зиходзиц ше коло Чику и свой шлєбодни час вєдно препровадзиц у розваги. Таки звикнуца ше поготов отримовали за першомайски швета.
Теди ше коло Чику сходзели и старши и дзеци, а окрем Руснацох приходзели ту и други жителє цо жили у Новим Орахове (Мадяре, Серби) и вєдно препровадзели час у правеню роштилю, вареню паприґашу, печеню сланїни на рожню итд. З дому ше приношело колача, лакотки, а з предавальнї напой.
При лєшикох и Чику ше младеж, дзеци, а и старши лабдали, фодбаловали, бавели бадминґтон, картали ше, доминали, а даєдни лапали риби у рики. Познєйших рокох 20-го вику з такей нагоди правело ше и шатор, та под нїм були и поєднани гудаци: найчастейше то були тамбураше, помишани руски и мадярски. Вєдно ше шицки вешелєли до познєйших годзинох. О тих часох тим старшим остали уж лєм красни памятки.
По приселєню до Нового Орахова дзепоєдни Руснаци нєдалєко коло Чику бивали на салашох. Даєдни блїжей Н. Орахова а на пар салашох людзе бивали дакус далєй на сиверу спрам Чантавиру. Ґу рики Чик ше ходзело часто и през рок лапац риби, а хлапци ше часто ходзели влєце купац, там научели и плївац, алє ше нашла и даєдна пиялка хтора ше прицицала за ногу.
Писня Кед зме були у Чику
[ушориц | ушор жридло]На рижних розвагох народ часто зашпивал вєдно и так учели єдни од других и язик и шпиванки хтори шпивали у валалє на свадзбох, лєбо других даяких друженьох и розвагох (розберанки, одход до войска, на швета). З єдних таких друженьох зоз музику и шпиваньом настала и шпиванка на остатнї додати текст Любу Раца з Нового Орахова, а мелодию поступнє зложели даскельо талантовани музичаре (браца Яким и Любо Папуґово, Михайло Еделински а спомина ше и Петро Саблїч хтори научел Михайла грац мелодию писнї). У писнї ше споминаю Руски презвиска, тиж и салаши на хторих нашо людзе бивали. Шпиванка нєшка постала такповесц народна нє лєм за Орховчаньох, алє ю шпиваю и други Руснаци.
Кед зме були у Чику
[ушориц | ушор жридло]Кед зме були у Чику, вше зме лєм єдну грали,
а за Крачун по обисцох коляди шпивали,
од Гопцупа до Чакана, од Чакана до Гопцупа,
од Гопцупа до Катрини, та зме спадли до долїни.
Кед зме були у Чику вше зме лєм єдну грали,
до рана його кишенки цалком празни остали.
Цалу ноц ми Гопцупови єдну писню лєм шпивали.
А, рано зме заш там були, дзе зме вечар започали.
Кед зме були у Чику, вше зме лєм єдну грали.
Нашо стари перши роки по салашох бивали,
од Ґерґеля до Каштелю, од Каштелю до Рудича,
вец салаши штреднї, треци, на нїх вельо руски дзеци.
Кед зме були у Чику, вше зме лєм єдну грали,
Орахово нашо людзе красне збудовали,
а вец пошли до Вербасу, Суботици, та до Кули,
алє Нове Орахово вони нїґда нє забули.
Ґалерия
[ушориц | ушор жридло]-
Чик (Чикер) -
Стари гаци на Чику при Бачким Петровим Селу
_2.jpg)
Литература
[ушориц | ушор жридло]- Јован Ђ. Марковић Енциклопедијски географски лексикон Југославије; Свјетлост-Сарајево. 1990. ISBN 978-86-01-02651-3.
- Шехић, Денис и Шехић Демир (2007): Атлас Србије, МондеНеуф, Београд
- Любо Рац и Олена Папуґа, Вично тирва 13. май, 2026. рок
Вонкашнї вязи
[ушориц | ушор жридло]- Мол на Тиси, molnatisi.awardspace.com
- Воде Војводине, www.vodevojvodine.com
Референци
[ушориц | ушор жридло]- ↑ Војводине”. Архивирано из оригинала 1. 1. 2014. г. Приступљено 24. 3. 2014.
- ↑ 2,0 2,1 „Мол на Тиси”. Архивирано из [1] 4. 3. 2016. г. Приступљено 24. 3. 2014.
- ↑ Јован Ђ. Марковић Енциклопедијски географски лексикон Југославије