Череп

Череп файта покривача на закрицу хтори ше звичайно прави зоз глїни, алє и зоз бетону або скла.^[1]

Глїняни череп

Глїняни череп ше прави зоз квалитетнєйшей глїни як цегла. Добре з воду виробену глїну ше оформює ручно у фурмох або машински, так же ше з нєй вицагує воду з помоцу шлїмакастей преси. Оформени череп ше суши на воздуху або у тунелских пецох на температури од 1200 °Ц. За украсне закриванє, череп ше може анґобовац и ґлазировац пред печеньом же би ше достало рижни фарби хтори потим буду тирвац так длуго як и сам череп.

Спрам форми, прави ше три файти черепох:

1. Череп з єднїстим ярчком

2. Бибер череп

3. Бетонски структури за зберанє и одводзенє води (ярчки)

4. Окремни (специялни) черепи

Звичайни череп

Звичайни череп ма форму правоугловей плочи, хтора на концу бокох (по длужини) ма ярчок з єдного боку обрацени на лїцо, а з другого на спак (на други бок), так же ше при закриваню медзи собу поклопюю. Череп з ярчком ше хасновало ище у античней Греческей, кед му димензиї були коло 40х60 центи (нєшка тоти мери виноша скоро дупло менєй). Череп пре свойо двобочни ярчки подноши и угли од 18 по 20 ступнї нагнуца, а други вигодносци то: менше трошенє по квадратним метеру закрица, єдноставне и швидке уклопйованє, можлївосци формованя, так же кед ше тот череп постави на закрице, може випатрац як ґлазировани, або аж як бибер череп (зоз простим додатком ярчкох)

Бибер череп

Бибер череп ма форму правоугловей плочи хторей узши бок заокруглєни, так же полупречнїк заокруглєня виноши од 100 по 180 милиметри. Поверхносц лїца черепу може буц гладка або воздлужно вибраздована. Же би ше оможлївело лєпшу вентилацию, препоручує ше з другого боку черепа виробиц ребра груби коло 2 милиметри, а широки до 20 милиметри, прейґ хторих череп налєгує на лати. Пре єдноставни налєгованя з преклопйованьом без ярчкох, бибер череп нє подноши угли закрица менши як 45 ступнї. У пракси ше звичайно применює двойнїсте – корунове закриванє, т.є. кед ше склада єден шор, такой ше прейґ нього кладзе и шлїдуюци, поцагнути за пол ширини. Назва бибер нє ма нїякей вязи зоз присмачку попер, алє ма вязи зоз нємецким словом Biber, цо значи бобер, прето же тоти черепи барз здабу на хвост животинї цо ше вола бобер.

Стародавни череп за закриванє, такволана черамида (од турского слова ћеремид) ма форму конусней циви. Тот череп бул гладки з обидвох бокох, а правело ше го з иловачи. Иловачу ше мишало з воду, потим ше нарезало фалати одвитуюцей велькосци и кладло до древених полукружних фурмох.^[1] Таки черепи ше сушело и пекло у специялних дзирох у жеми за печенє).^[1]То найстарши череп за закрица на Медитеранє и на Балканє, а нєшка ше найчастейше хаснує за реставрацию старих хижох або за декорацию.

Специялни файти черепох

Єст ище и рижни специялни форми черепох хтори ше применює на даєдних местох на закрицу, а то :

1. Кантички – черепи у форми по длужини преполовеней циви (длужини 35-50 центи) хтори ше кладзе на верх закрица, так же воду зоз найвисшей точки закрица и зоз прегину посилаю на два ровнї закрица. Ище у античней Греческей ше правело и трокраки черепи хтори поставяни на угли закрицох, а и нєшка их правя даєдни фабрики. Єст и закончуюци кантички у форми гарсци або водового коритка. Їх основна улога чувац закрице од уходзеня води, шнїгу и витру, як и онєможлївиц уцагованє птицох и инсектох на пойд.

2. Вентилацийни черепи таки цо у штредку на споднїм концу маю вентилацийни отвор за воздух и лєгко их обачиц на закрицу.

3. Черепи за затримованє лїду и шнїгу на закрицу (шнїгобрани) затримую фалати ляду – кед ше розпущує – же би ше нє зошлїснул прейґ стрехи. Постої велька опасносц, окреме при високих будинкох, кед би ляд могол забиц случайно преходзацого.

4. Черепи за пребиванє инсталацийох (антенски слупи и подобне).

Бетонски черепи

Тоти черепи ше у новшим чаше прави так же ше бетон вилїва до фурмох, а потим ше на поверхносц наноши специялни премасценя хтори черепу даваю фарбу и чуваю го. Поєдинєчно, бетонски череп чежши, прето же є ґеометрийно векши, алє по метеру квадратним поверхносци закрица є лєгчейши або исти як и глїняни череп. Найвекша предносц тей файти черепу же нє барз упива влагу. Твардосц бетону ше з часом звекшує, за розлику од глїняного черепу хтори найвекшу твардосц ма у хвильки печеня, алє вона з часом опадує. Бетонски череп характеристични и по вельким виборе фарбох и формох.

Склєняни черепи

Тоти черепи служа же би препущели дньову шветлосц до просториї хтору закриваю. Понеже у такей ситуациї нє можу буц дески або додатна изолация под нїма, применює ше их на верандох, надкритих ґаражох, на пойдох и подобне.