Часослов

Часослов (греч. Ωρολογιον) богослужебна и молитвена кнїжка. Основа є священїческого и монашеского живота. У нїм молитви за шицки часци дня и ноци.

Змист часослову

1. Богослуженя або молитви на пол ноци: каждодньово, соботово и нєдзельово

2. Ранши молитви (утриня - каждодньова и постна, одпусти дньово, утриня воскресна и шветочна, утриня за усопших). Утриню би ше мало служиц од 3 до 6 годзин рано.

3. Часи (єст их штири: перши часи ше модлї рано – часи пошвецени Исусови кед го одведли ґу Пилатови, треци часи на дзевец годзин – часи пошвецени Исусовому судзеню, шести на дванац годзин – часи пошвецени Христовей хресней драги, а дзевяти на три годзин по поладню – часи на спомин Христового розпяца и предсмертельним муком).

4. Обиднїца хтора ше служи после дзевятого часу (чита ше 102. и 145. псалм, стихи о блаженствох, зачала зоз Євангелиї, тропари и одпуст).

5. Вечурня

6. Повечериє вельке и мале (вельке повечериє ше служи пред шветом Рождества Христового, Богоявлєня и Благовищеня и у Вельким посце, а мале повечериє ше служи после Воскресеня).

7. Молитви пред спаньом

8. Каноник

Каноник медзи иншим подрозумює: канон молебни ґу Пресвятей Богородици, акафист Господу нашому Исусу Христу, Служба архангелом и ангелом, Служба святим апостолом...

Надалєй, у часослове ше друкує рижни тропари и кондаки, а тиж так и мешацослов. У мешацослове часослову ше друкує нє лєм мена святого або вецей святих, прокимени алулиярнї, алє и їх тропари и кондаки. Мешацослов почина 31. септембра (початок нового церковного року), а закончує ше 31. авґуста.

При концу часослову ше шпива писню святого Амвросия, епископа медидаланского (миланского) Тебе Бога Хвалим.

У каждим святим храме, або голєм у катедралним, требало би у цалосци або з часци окончовац одправи часослову. За особи хтори нє можу присуствовац тим дїйом, єст правила як то можу надополнїц з молитву и пацерками.

Часослов ше закончує зоз Пасхалию. Пасхалия то таблїчка хтора указує же на хтори дзень у року ше слави Пасху.

Литература

• о. Др Роман Миз, Церковно литурґийни литурґични лексикон, видаватель НВУ Руске Слово и Грекокатолїцка парохия св. Петра и Павла, Нови Сад 2011, бок 305
• Протоєрей ставрофор Йоаким Холошняй, Дзвони, християнски часопис, май, април 2004. рок