Чардак

Чардак – у зависносци од места дзе жиєме, слово чардак може мац иншаке значенє. Слово чардак турцизем (турски çardak < персийски čārṭāq: будинок на штири зводи), а у наших войводянских крайох представя обєкт за одкладанє кукурици у чуткох. Як таки, бул идеални за природне сушенє кукурици хтору ше хасновало за карменє животиньох. Животинї були состойна часц скоро шицких обисцох у прешлих часох, прецо кукурица була основна покарма за статок. Кукурицу ше хасновало за власни потреби, а звишок ше предавало.

Чардак у дзепоєдних случайох могол буц аж и и статусни символ – кед чардак векши, значело же ґазда ма вецей жеми. Було вецей типи чардакох хтори мож було видзиц и по салашох, и по варошских хижох. Правело ше их углавним з баґренових слупох хтори служели як основа пре твардосц и витримовносц древа, и древених латох хтори ше прибивало так же ше зохабело простор досц широки за преходзенє воздуху, а досц узки же би чутка кукурици нє випадовала. У тим контексту можеме видзиц же ше баґрен садзело по салашох нє лєм пре украс, алє и як сировину хтору ше хасновало за потреби каждого валалского обисца. Було и вариянти дзе ше чардак правело з високо дзвинутим патосом, бо ше под нїм правело просториї за домашнї животинї як цо швинї и кури. Даєдни чардаки мали кибли з цеглох, та були ище и стилски ушорени. Тото мож було видзиц углавним по варошох або по богатих сримских валалох. Чардаки ше закривало з черепом, же би шнїг и диждж нє представяли проблем кукурици (же би нє збутнєла). Чардаки були актуални у чаше кед ше кукурицу ламало ручно, алє и познєйше кед пришла механїзация як цо ламачи хтори цагаю трактори.

Ламац кукурицу приходзели аж з Босней

Ламац кукурицу до Войводини приходзели роботнїки з Босней. Вони тижнями оставали и услужно ламали кукурицу. Були барз вредни роботнїки, робели од вчасного рана до позней ноци, а место у пенєжу, були плацени з одредзеним количеством кукурици у чуткох хтору у ваґонох одвожели до своїх обисцох у Босней. Кукурицу ламали ручно, у кошарох кладли на прикочи и шпедитери, рубали кукуричанку и складали ю до копох и зохабяли на полю. Познєйше тоту кукуричанку хасновали власнїки польох за карменє кравох, а вигризки хасновали як огриву. Наламану кукурицу ше сортовало ище на полю: вельки и як спада чутки ше уруцовало до прикочох, а дробни кладло збоку, та их людзе такох давали як покарму статку. Кед ше кукурицу привезло на салаш, висипало ше ю на громаду, ручно очисцало од лїсца и у кошарох ношело до чардаку. З лїсцом хторе оставало после очисцаня кукурици людзе полнєли сламячи. Чардак ше полнєло до верху, правело ше мур з чуткох же би ше могло ище баржей наполнїц празни простор до самого закрица чардаку. Прето ше ишло так високо, бо ше у процесу сушеня зарно кукурици сцаговало, та ше и сам простор у чардаку меншовал за одредзени процент. Познєйше ше за уношенє кукурици до чардаку почало хасновац елеватор, машину хтора прейґ рухомей пантлїки ноши кукурицу до верху. Кед ше кукурица осушела, лупало ше ю, а олупани чутки ше хасновало як огриву.

З Горватскей енциклопедиї…

О рижних значеньох поняца чардак

Горватска енциклопедия наводзи шлїдуюце:

1. Катна кућа с избоченим горњим дијелом, или пак пољска колиба на ступовима.

2. Дрвена проматрачница, стражарница на граничној црти Војне крајине, подигнута на ступовима, с пушкарницама и повлачним љествама; потјечу из XВИ. и XВИИ. ст., а читав низ саграђен је у XVIII. и XIX. стољећу.

3. Једнокатна дрвена сеоска кућа у Покупљу, Туропољу и Посавини.

4. Катно спремиште за кукуруз у селима источне Хрватске.

5. Чардак међу роговима, поткровна соба у босанској кући брвнари.

6. Наткривени балкон већих димензија без прозора на балканским манастирским конацима.

7. Чардаклија, просторија на највишем кату оријенталне куће, дијелом избочена на улицу.

Вонкашнї вязи

Simbol prošlih vremena, vebsajt Hrvatska riječ, hrvatskarijec.rs, 17. 11. 2023.

Чардак, Википедия на сербским язику, sr.wikipedia.org