Цукровнїк
Цукровнїк (мн. цукровнїки) то лакотка-єдло, хтори ше прави зоз цеста.
Дакеди ґаздинї поряднє мишели цесто и пекли хлєб двараз лєбо трираз до тижня спрам потребох фамелиї. Же би обрадовали фамелию, поготов дзеци, мацери и баби часто направели и цукровнїки. То бул фалаток, (aбо вецей округли фалатки) хлєбового цеста хтори ше зоз древену розвалку розогнало на округло и грубини дас од 7-8 милиметри по 1 цент. По верху ше намасцело зоз масцу, лєбо маслом кед було (познєйше зоз розпущеним марґарином) а дахто намасцел зоз шметанку а по верху ше вше поцукровало. Таки цукровнїки ше кладло упечиц до руского пеца за брилу. Упечени ширели приємни пах и були барз смачни за єдзенє, поготову дзецом.
У Коцуре руснаци цукровнїк наволовали слатки лепинь.
На исти способ ше правело маджунїки, олейнїки, а нєшкайши мена то лепинь, ланґош (слово превжате зоз мадярского язика), панцероти (зоз италиянского язика). За правенє таких цукровнїкох и лепиньох потребно коло 60 минути.
Рецепт правеня цукровнїка, лепиня/ланґоша
[ушориц | ушор жридло]Состойки:
- пол кили муки
- пол коцки квасу од 50 ґр. (лєбо сухи квас)
- 2 деци води
- 1 малу ложичку солї
- масц лєбо олєй за премасцованє кед ше пече, aбо кед ше пражи
Поступок
[ушориц | ушор жридло]Цесто загнєсц як цо и за хлєб, односно за лепинї /ланґош, исто як и за капущанїки. Кед цесто викишнє, претрепац го и охабиц же би ище раз викисло. Цесто витресц на подлогу посипану зоз муку (лєбо на силиконску подлогу) же би ше нє лїпело. Розогнац го на округло лєбо резац на менши правоугельнїки и 2-3 раз порозрезовац по штредку и охабиц их най заш подкишню. Викиснути пражиц у масци лєбо у олєю на обидва боки док ше нє надую и постаню жовкавей фарби.
Можу ше конзумовац на слано лєбо на слатко по смаку
Литература
[ушориц | ушор жридло]- Словнїк руского народного язика I том, Нови Сад 2017. бок 701
- Блаженка Хома-Цветкович, Любица Няради: Мацерова РУСКА кухарка НВУ Руске слово