Царски дзверка

Царски дзверка (греч. Ωραία πύλη — „прекрасни дзвери”) то штреднї двойнїсти дзверка на иконостасу през хтори, до святилїща, преходза лєм богослужебни особи. Єст велї богослужебни обрядни предписаня хтори диктую преходзенє през нїх, алє и веля символика.

Кажда вира у своїх обрядох ма символику. Так и у християнстве, вельо менєй у протестанских церквох у и Католїцкей заходней церкви, а вельо вецей у восточних церквох.

Святилїще представя нєбесни простор, жилїще Бога, Рай. Прето тот простор вимага окремни третман, до ньго уходза лєм священослужителє, у нїм ше справую зоз найвекшу богобойносцу и страхопочитованьом. Прето тота часц оддзелєна зоз иконостасом и дзверками хтори ше отвераю по одредзених правилох.

Царски дзверка, окрем кед ше нє богослужи, нєпреривно заварти, окрем през час Пасхи та до Томовей нєдзелї. Теди су отворени и кед нє богослуженє. През нїх преходза лєм священослужителє висшого ранґу: владика, священїк и диякон. И то лєм теди кед богослужа, и лєм кед то потребує окончованє одредзеней богослужебней дїї як цо то виходи и уходи з кадилом, Євангелию и Святима дарами. На Служби Божей ше през Царски дзверка виходзи и на Заамвонску молитву. Отверанє Царских дзверкох символизує уход до Царства Божого, а їх заверанє наглашує потребу роздумац о шицким тим цо стої чловекови як препреченє уходу до Царства Божого.

На Вечурнї Царски дзверка ше отвераю на початку саночного, кед служитель при кадзеню зоз святилїща виходзи на солею. По кадзеню ше такой завераю. Другираз ше отвераю на Мали вход, а завераю после прокимену. На Велькей вечурнї ше одпуст служи при отворених Царских дзверкох. На Вечурнї, хтору ше служи зоз Службу Божу, а то на Крачунску вилїю, Богоявлєнску вилїю, Вельки штварток и Вельки пияток медзи чтениями и окремнима прокименами. На Вечурнї на Вельки пияток Царски дзверка ше отвераю за читанє Євангелиї и виношенє Плащанїци.

На Утринї Царски дзверка ше отвераю на Полиєлей, Величаниє, Ангелски собор цо предходзи читаню Євангелиї. Завераю ше после возгласу „Милостию и щедротами”, потим ше отвераю на Осму писню канону, кед ше кадзи цали храм. Завераю ше на Дзевятей писнї канону, отвераю ше ище раз на Славословиє вельке, тропар, ектениї и одпуст. На утринї Велькей соботи отвераю ше на одход служительох ґу Плащанїци, на Утринї Акафистовей соботи под час шпиваня Акафисту.

Кед у питаню Царски часи, вец ше Царски дзверка отвера на тих, на котрих ше чита Євангелию.

За Службу Божу устав о богослуженю предписує вецейнїсте отверанє и заверанє Царских дзверкох. При грекокатолїкох у Сербиї, од першей половки двацетого вику, под час єрейскей и архиєрейскей Служби Божей Царски дзверка заварти лєм на першей часци Служби, т.є. на Проскомодиї, а потим су отворени. То вредзи лєм за Службу Божу Йоана Златоустого и Василия Велького. На Служби Божей Преждеосвящених дарох Царски дзверка отворени лєм на Мали вход, медзи чтениями кед ше благослови зоз швичку и кадилом, на Вельки вход, на Причесц.

Сиверни и южни дзверка иконостасу заварти вше, окрем кед єст потреба през нїх преходзиц.

Римокатолїцка церква, пре рижни причини, алє и пре зменшанє розликох медзи собу и протестанскима церквами, почала свойо обрядни дїї поєдноставйовац, рационализовац, так же символи и символика помали щезую. Обрядни чини маю буц цо єдноставнєйщи и цо рационалнєйши, же би сучасному чловекови обряд бул лєм такповесц преподаванє на християнски теми. Таке знаходзи и грекокатолїкох.

Символичносц и Царских дзверкох и Зависи найбаржей затрацена у свидомосци вирних. Зависи уж даґдзе анї нєт. И поступанє зоз Завису, як и зоз Царскима дзверками, компликоване. Отверанє (одхильованє) и заверанє (зацагованє) зависи диктоване тиж зоз зменьованьом часцох Служби Божей рижних характерох, раз ше отвера, раз ше завера, раз є наполи одхилєна. У нєшкайшим чаше, кед же Зависа постої, прилапени обичай же є отворена през цалу Службу Божу.

Литература

Дзвони, християнски часопис, октобер 2003. рок, протоєрей ставрофор о. Йоаким Холошняй

Церковни литурґично литурґийни словнїк, бок 301, о. др Роман Миз

Вонкашня вяза

Царске двери, sr.wikipedia.org