Хустка
Хустка 1. штрикана женска шмата (облєчиво) хтору ше заруцовало на хрибет: Хустку ше заруцовало на плєца, конци на предку ше прекрижело, а на задку (на хрибце) ше завязало на ґузел.
Жимски хустки були штрикани з волни и мали ройти, а ношело ше их прейґ якнї або байки же би женом було цеплєйше. Кед було барз жимно, хустку ше заруцовало и на главу прейґ хусточки. Хустки ше звичайно куповало у Молу (потим их жени предавали по валалє або на пияцу), алє ше их куповало и од єврейских тарґовцох (у Керестуре у Дзвонарки на Вельким шоре).
2. Купчи (украсни) хустки були гатласки, паньски, репашово, маково, гадвабни, мальовани, блишово, фарбарски. Вони були баржей женски украс поверх шматох, алє и "статусни символ" и нє ношело ше их роботни дзень же би чували жену од жими.
Хустки хтори ношели старши жени були цми кафово або цми желєни, а стари жени ношели лєм чарни, штрикани. Паньски хустки старих женох тиж були чарни и нє мали ружи и квети у фарбох. Кед и була даяка мустра, вец була такей фарби як и хустка.
Купчи украсни хустки були барз драги:
● Паньску хустку на шию, а гадвабну на главу
Мушице ми купиц, гоч предаце краву.
Яка же мнє бриґа за вашу порцию,
Кед мнє паньску хустку, треба ми на шию.
(народна)
Фразеолоґия
[ушориц | ушор жридло]● Пошли пенєжи до хустки – даремно потрошени пенєжи
● Дац до хустки – даремно потрошиц, мац утрату.
Тоти два вирази маю значеньову вязу зоз хустку хтору спитана дзивка даровала питачови, а вон єй за ню дал пенєжи.
Ґалерия
[ушориц | ушор жридло]-
Гатласка хустка з длугокима ройтами. -
Паньска, гатласка хустка. -
Грубша хустка зоз волни и ройтами.
Литература
[ушориц | ушор жридло]- Словнїк руского народного язика II, О – Я, Нови Сад 2017, бок 679.
- Дю. Биндас – О. Костельник Народни писнї южнославянских Русинох, библиотека ч.10, РНПД Руски Керестур, бок 118