Хлїв

Хлїв (всл. chľiv; укр. хлів; слц. chliev; поль. chlew; од праслав. xlěvъ) будинок за статок. То просотрия у составе обисца у хторим ше найачстейше тримало статок: конї, гачата, крави, целята. Конї поготов були значни и хто их мал, були велька помоц у роботох на полю. Крави тиж так, бо знали ,,витримовац'' челядз у доме. Хлїв дакеди бул направени такой за хижу, т.є. за комору, та бул у преднїм дворе. Бул правени з истого будовательного материялу як и хижа, односно були набивани, лєбо туньша вариянта - зоз наду лєбо посконох и латкох оляпканих з блатом, а тиж правени и зоз валькох. Гумно починало од заднього мура хлїва. У новших обисцох хлїв ше находзел у гумнє.

Часци хлїва

Було два файти хлївох, а яки вони були - завишело од того кельо статку у нїх змесценe. Єдна файта хлївох: векши хлїв, мал на штредку дражку, лєбо бул роздвоєни зоз збитима десками. Векши хлїв мал двої яшля, за конї на єдним боку и окреме за крави и целята на другим боку хлїва. Менши хлїв мал лєм єдни яшля на єдним боку хлїва. У меншим хлїве було менєй простору, та и менєй статку.

Котинєц

У хлїве у куце бул направени котинєц. Вон могол буц вимуровани з цеглох. Сподок и боки зоднука були оциментовани (у новших часох). При котинцу стали мирица и сакайтов, а на нїх була преруцена золнїца у хторей ше ношело шено и сламу.

Други серсан у хлїве

Наштред хлїва, на слупе хтори тримал повалу, на гвоздох стали штверци (оглавки, няклови, ременї, батог). На полїчки стало огребло и лампа, подаєден штранджок. У муре хтори патрел до гумна, на гной, бул вибити облачок през хтори ше руцало гной.

Хлївски дзвери

Дзвери у хлїве були двойнїсти. По ширини, на штредку, були подзелєни на верхнї и споднї. Горня часц була отворена, же би у хлїве було воздуху, а сподня часц була заварта, же би живина нє вошла до хлїва, бо би ю статок поґажел. У старших хлївох нє було таки дзвери хтори ше отверали горе и долу, алє було и на хлїве як и вшадзи, шлєпи дзвери. През лєто место нїх ше кладло дзвери з латкох (латково дзвери). Таки дзвери мали функцию циркулациї воздуху у хлїве пре горучаву. Жимски, т.є. шлєпи дзвери ше зняло, та ше хлїв заверало лєм з дзверками з латкох же би у хлїве було вецей воздуху.

Посцель/посцелка за слугу у хлїве

У муре були забити вельки гвозди на хтори ше положело, дакус нїжей од повали, позбивани дески. То була посцелка, хтора вишела на повали. Ту спал слуга. На ню ше виходзело по драбини. Барз давно толває крадли статок, та ґазда хтори нє мал слугу бул примушени сам спац у хлїве же би охранєл животинї кед требало у таких случайох, т.є. од крадзи.

Статок през лєто

През лєто статок нє бул у хлїве. На дворе людзе мали направени аклї. Около древених слупох ше позабивало дески, так на високо же би статок нє вишол. У аклю були лєм крави, буяци и целята. Конї влєце були повязани коло ягодох хтори росли у дворе, алє вноци ше их уводзело до хлїва. Крави ноцовали у аклю, з тим же вноци були повязани за слупи.

Нєшкайши хлїв

Сучасни хлїви нєшка випатраю иншак як дакеди. Нє кажде обисце ма хлїв, та власнїки нових хижох таки обєкти вецей нє планую и нє правя. Сучасни живот допринєсол иншаке похопйованє и витримованє фамелиї, та нєт анї статку по обисцох, окрем барз мало винїмкох. Сучасни хлїви маю иншаку технолоґию карменя статку, та спрам того кому то професия на нови способ планує, конструує и прави таки економски помоцни обєкти т.є. хлїви. За правенє таких хлївох хаснує ше древо (уж ридше), цегли, камень, бетон, желєзо, челїк, рижнородни за таку наменку плехи зоз квалитетну изолацию, окремни специялни материяли итд.