Хлєбичок

Хлєбичок
	Хлєбичок як украсне древо у розсаднїку Faro на Сицилиї
Наукова класификация
Царство	Plantae
Дивизия	Magnoliophyta
Класа	Magnoliopsida
Ряд	Fabales
Фамелия	Fabaceae
Подфамелия	Caesalpinioideae
Род	Ceratonia
Файта	C. siliqua
Биномне мено
	Ceratonia siliqua
	L

Хлєбичок (лат.Ceratonia siliqua, серб. рогач, рсй. рожко́вое де́рево; слц. svatojansky chlieb „исте”; поль. chleb świętojański „исте”. У Руским календаре 1927. зазначена и назва яников хлєбичок. То плод христового баґрена: Плоди христового баґрена волаю шаланґи або хлєбички; од хлєб) то жимжелєне древо або черяк зоз фамелиї маунаркох (Fabaceae) по походзеню зоз Медитерану. Плод му мауна зоз цмокафовима маґочками. Плод хлєбичка по квитнуцу дозрева аж шлїдуюцого року. Познати є и под назву хлєб святого Йована, бо го, по традициї, Йоан Кресцитель єдол док жил у пустинї.

Нєшка ше найчастейше хаснує зомлєти хлєбичок. Маґочки ше суша, печу и зомлєю. Смак здогадує на чоколаду, та го велї хасную место какава, а аж и у продукциї чоколади.

• Нашо руски ґаздинї часто хасную хлєбичок у колачох: на квасу, як хлєбичково питки, галушки з хлєбичком итд.

Опис

Хлєбичок нїзке древо, найвецей 15 метери. Лупа му длуго гладка. Лїсце парно пиркасте зоз 3-5 парами лїсточкох, длугоке коло 16 центи. Скоркасте є, овалне або вайцасте, 3-7 центи длугоке 2-3 центи широке, цме желєне. Квитки (септембер по половку октобра) єднополни, дводомни або гермафродитни, пейцченово, апетални у ґириздастих квиткох, нєупадлїви, дробенки. Плод мауна, лиловкасто-кафовкаста, крива, длугока до 20 центи, широка до 4 центи зоз 10-15 нашеньками, скорасто-месастима хтори мож єсц, узрети о рок после квитнуца. Нашенє червенкасто-кафовкастей фарби, гладке и блїщаце, длугоке 8-12 милиметри и 3,5-8,5 милиметри широке, з боку сциснуте, при основи ше заоштрує. Нашенє з твардим обмотком у єдней кили ма 5000 зарна. Ключканє епиґеїчне. Почина родзиц од 8. року. Максималне роснуце и продуктивносц досцигує коло 100. року, а жиє до 200 роки. З єдного гектара мож назберац 5-7 тони хлєбичка. Ма глїбоки и моцни корень. Хлєбичок люби цеплу медитеранску климу, гоч нє подноши найлєпше вельке количество води у подлоги.

Богатство состойкох

Як рошлїна, хлєбичок ма вельку поживну и лїковиту вредносц. У нїм єст вельо витамини, минерали, протеїни и угльово гидрати. Стари Єгиптянє го хасновали як лїк, а Шпанци го у войни хасновали процив гладу и нєвикарменосци.

Хаснує ше и як пожива за статок.