Фоґаш

Фоґаш (слово зоз мадь. fogas „вишалка за шмати”, серб. „чивилук”. Слц. нар. fogaš 1. „исте”; 2. „полїца”.

фоґащик х. демунитив од фоґаш.

Фоґаш то часц хижних стварох хтора служи за дочасове одкладанє шматох, кожухох, першнякох, бундох, капутох, уяшох и познєйше якнох. Тиж го мож хасновац за обешованє - одкладанє калапох и шапкох, алє и амрелох, кукох, кривайлох або шматох хтори ше ноши повонку. Може буц направени зоз древа и металу, як и зоз рижних других материялох.

Историят

Приклєт (уход) була простория през хтору ше уходзело до хижи и як таки бул значни нє лєм при Руснацох, алє и у обисцох викториянскей епохи при других народох, поготов народох хтори були розвитши. На фоґаш ше нє одкладало лєм облєчиво и обешовало калапи и капути, алє и други предмети (амрели, ташки, ключи на украсних привязкох и др.), понеже то було одраженє богатства, дружтвеного статуса и познаванє актуалних стилох. Фоґаш у приклєце (на уходзе) лєбо квачки за калапи бул найвжнєйша часц стварох у хижи.

То були нови форми хтори ше зявели коло 1840. року, як цо то фоґаши, квачки и клїнки, понеже ше обисца правело векши, а дружтвени нащиви були структурованши.^[1] Менши обисца мали менши уходи, та вишаци фоґаши були добре ришенє за чуванє (капутох, калапох, торбох, кукох, рукавицох, шалох итд.)нащивительох або госцох.^[1]

На початку 20. вику, хижи були менши, та и просториї були менши, а од стварох на уходзе до обисца найчастейше були лєм карсцель, менши столїк, можебуц жвератко. орманчик и фоґаш на хторим стали калапи и капути.

Фоґаш при Руснацох

Фоґаш за шмати (облєчиво) могол буц прибити на муре найчастейше даґдзе за дзверми дзе нє завадзал.

Фоґаши на муре були розлични:

♦ могли буц лєм на даякей дески прибити кольчки на хтори ше вишало шмати.

♦ Фоґаш могол випатрац як вецей букви „ х ” а отверал ше и заверал як гармоника.

Там дзе його часци були скапчани находзели ше и длугши квачки за вишанє шматох. Руснаци мали и такв. фоґаши „маґарци.” Маґарци були направени зоз латкох и були лєгки а високи дас метер и пол и мали ножки. На верху ножкох були прибити попрейґа, з обидвох бокох, дешчички. На тих дешчичкох були поприбивани гвозди або кольчки, на хтори ше вишало шмати. Под тима дешчичками, дакус нїжей, були прибити ишче єдни дещички, а цалком на сподку ище єдни. На найвисши фоґаш на маґарцу ше вишало блузни, на нїзши пасово сукнї, а на сподку, при жеми, стала обуй. Таки фоґаши („маґарци”) Руснаци поручовали же би им направели ремеселнїки-тишлїре.

Нєшкайши фоґаши и вишалки

Нєшка постоя розлични дизайни фоґашох (вишалкох) - од гвоздох забитих до мура а и до фоґаша – по фоґаши уметнїцки дїла.

Фоґаши можу буц мурово, стояци лєбо преношиви (напр, фоґаш на кольчатох). Постої верзия металней конструкциї причверсцени за ствари.

Фоґаш у орманє

До орманох ше часто поставяю фоґашово палїци лєбо (новши часи) алуминийски або пластични циви у форми горизонталного слупа, циви або видлужени дротови носач, на хтори ше квача и вишаю вишалки за шмати. Облєчиво ше квачи на клїнки, на квачки, на вишалки або ше причверсцую зоз моцнима щипальками. Облєчиво хторе ше чува на вишалкох ше нє гужва.

Вишалки дараз, док нє було пластики, були лєм з древа, та ше их волало древка на шмати.

Ґалерия

Предавалня половних шматох у Риме 1877. року.
Фоґаш зоз квачками прибити на мур.
Фоґаш зоз клїнками за калапи
Фоґаш за ґардеробу у театрох, ресторанох зоз означенима числами.
Фоґаш у орманє зоз вишалками.
Сучасни фоґаш и место за калапи.
Сучасни фоґаш за облєчиво у предавальньох.
Квачки на стояцим фоґашу за капути, мантили, калали и шапки.
Облєчиво у орманє заквачене на горизонталну палїцу на вишалкох. Найчастейше так випатрал орман зоз шматами у руских обисцох.
Файта фоґаша (фоґаш – маґарец)