Фоколаре
Фоколаре – Рух фоколарох або Марийово дїло то вирски рух хтори 1943. року основала Кяра Лубик, учителька у Тренту на сиверу Италиї. Гоч то насампредз католїцки рух, вон створел моцни вязи з главнима християнскима релиґиями, другима вирами, та и людзми без вирских прешвеченьох. Нєшка Рух активни у 182 жемох и облапя вецей як пейц милиони людзох. Фоколар значи огнїско.
Фоколаре у Сербиї
[ушориц | ушор жридло]У Сербиї Рух жиє уж од шейдзешатих рокох двацетого вику. Перши фоколар отвера ше у Суботици 1976. року, дзе ше находзел по 1978. рок. Окрем того, отворени ище єден фоколар у Новим Садзе (период 1977-1980), а потим ше фоколар зоз Суботици селї до Беоґраду 1978. року, дзе и нєшка хлопски и женски центри Руху фоколарох. Тоти центри представяю заєднїци лаїкох хтори зошицким пошвецени Богови и духовно потримую животи заєднїцох и поєдинцох на териториї централней Сербиї, Войводини и Чарней Гори. Вельку потримовку розвою и формованю перших заєднїцох, присутних у Войводини, дали римокатолїцки и грекокатолїцки священїки. На териториї Сербиї єст коло 2.500 припаднїкох и симпатизерох Руху.
Духовносц єдинства стимулує членох Руху преглїбйовац заєднїцтво медзи християнами католїками, православнима и евангелистами и у духу братскей любови и взаємного почитованя доприношиц зблїжованю Церквох и народох у Сербиї. По прикладзе перших християнох, члени Руху фоколарох маю заєднїцтво материялних доброх.
Фамелиї
[ушориц | ушор жридло]Заєднїци фамелийох фоколарох зоз сушедних жемох помогли же би ше у велїх крайох Сербиї активовали ґрупи малженских парох у Руху фоколарох и постали порушоваче рижних активносцох у обласци воспитаня дзецох, алє тиж так и у зачуваню фамелийох на твардих християнских вредносцох.
Младеж
[ушориц | ушор жридло]Єдна зоз живих реалносцох у Руху то дзеци и младеж. Вони през бавенє и приповеданє, спорт и диялог уча основни вредносци живота, участвую у програмох за Крачун и подобне. Кажди рок дзеци з Руху орґанизую акциї за помоц худобним фамелийом и старим особом, нащиви дзецом з почежкосцами, як и спортски днї и лєтнї кампи. Року 2005. коло 300 дзеци бежали по дражкох Калемеґдану у шветовей штафети RUN4UNITY под покровительством Секретарияту за спорт и младеж городу Беоґраду, же би з тим указали свойо закладанє за мир. Року 2007. обегованє за мир отримане на Петроварадиснкей твердинї, а 2012. ше бежало по улїцох Зренянину. У авґусту 2012. року 200 млади зоз Сербиї участвовали на шветовим фестивалє младих у Будапешту – Ґенфест-у, хтори отримани под насловом Будуєме мости.
У дружтве
[ушориц | ушор жридло]З часом ше отвераю драги за контакт и з велїма представителями дружтвеного живота хтори у идейох Руху находза одвит на намаганя яки ноша у шерцу, так же ше преширює мрежа заєднїцтва даваюци нову твар штредку. З тоту намиру орґанизовани вецей вельки сходи як цо манифестация Вєдно за Европу 2004. у Беоґрадзе у Центре Сава и Фестивал фамелийох (Фамилифест) 2005. року у Новим Садзе, дзе ше зишли 1300 особи. У рамикох дружтвених дїялносцох Руху, 19 подприємства з Войводини уключени до Економиї заєднїцтва, проєкту хтори наменєни худобним. Взаємна помоц членох фоколарох у жеми и медзинародна мрежа солидарносци помагаю велїм фамелийох и дзецом хтори жию у чежких условийох.
Видаватељна дїялносц
[ушориц | ушор жридло]Од 2003. року виходзи у Беоґрадзе двомешачна ревия Нови швет хтора ширцом по Сербиї шведочи о духовносци єдинства. Перша кнїжка Кяри Лубик на сербским язику, друкована з кирилским писмом, Буц Твойо Слово, представена 2012. року у Беоґрадзе и у Матици сербскей у Новим Садзе, у сотруднїцтве зоз РТВ Беседа Православней епархиї Бачкей.
Марияполи
[ушориц | ушор жридло]Як окреме драгоцине искуство заєднїцтва у розличносцох постава традиционални лєтнї Марийов город – Марияаполи, хтори ше шицких тих рокох отримує у Сербиї, починаюци од Текийох та по Сокоґрад, Вершецки брег и Делиблатску писковину. През преглїбйованє духовносци єдинства (на преподаваньох, заєднїцких молитвох, розгваркох у преходзки, у рижних роботньох, форумох и под.), Марияполи постал место диялогу и взаємного упознаваня у духу євангелскей любови, а по прикладзе на живот християнох у Вчасней Церкви.
Вонкашнї вязи
[ушориц | ушор жридло]- Istorija i prisutnost, Pokret fokolara, vebsajt focolare.org
- O Pokretu fokolara, Pokret fokolara, vebsajt focolare.org
- Pokret fokolara danas, Pokret fokolara, vebsajt focolare.org
- Pokret fokolara, Hrvatska Vikipedija, hr.wikipedia.org