Фестивал рускей култури Червена ружа

Фестивал култури Червена ружа
Лоґо фестивала
Орґанизатор фестивала	Дом култури Руски Керестур
Жанр	Обща смотра народней, компонованей и дзецинскей музики, шпиванє и танци
Основани	1962. року
Тирванє	64 роки
Локация	Руски Керестур
Снователє	Клуб студентох и штредньошколцох, валалска младеж
Нащивеносц	од 1300 до 2500

Фестивал рускей култури Червена ружа то смотра шпиваня, танцох, композицийох у забавним/народним духу и композицийох за дзеци.

У половки пейдзешатих рокох, кед ище у наших крайох нє було телевизиї, дзечнє ше слухало радио, одходзело ше до биоскопу а младежи соботами и нєдзелями найглавнєйши вид забави були танци. Розлика була лєм у тим же по варошох на таких танцох грали преважно оркестри на модернєйших музичних инструментох (як цо то гармоники, кларинети, саксофони, електрични ґитари, контрабаси, буґни и чинєли), а по валалох у Войводини найчастейше грали тамбурово оркестри. Так то було и у Руским Керестуре.

Од початку 1959. року ше на радио-станїцох Заґреб и Беоґрад почало каждей соботи на 8 вечар емитовац музичну радио емисию под назву Микрофон ваш. За кратки час то постала барз популарна емисия у цалей жеми.

Микрофон ваш постава Червена ружа

През лєто ше у Керестуре танци отримовало у тaкв. Желєней загради (простор медзи майсторским и пензионерским домом). Там були виляти два бетонски плочи (векша и менша), єдна при другей, на хторих ше танцовало, а за оркестер була збудована нєвелька бина зоз закрицом. У єдним периодзе на танцох у Желєней загради грал и оркестер Сивґамуриз хторому бул руководитель Яким Сивч. О єден час, дзекуюци вироятнє и популарней радио емисиї Микрофон ваш, ту настала идея о орґанизованю таких концертох на хторих би наступели лєм тоти кандидати хтори би пред тим на аудициї указали одвитуюци квалитет шпиваня. Инициятор и реализатор таких концертох бул Яким Сивч зоз членами руководства валалскей младежскей орґанизациї. И так, пошвидко ше за тот концерт, або Микрофон ваш на керестурски способ, дознало и по других руских валалох. Уж на другим концерту як госци наступели и млади Коцурци на чолє зоз Владимиром Горняком.

Тому допринєсла и политична инициятива же концом пейдзешатих рокох руководство валалскей младежскей орґанизациї достало задаток основац завичайни Kлуб студентох и стредньошколцох, хтори би през лєтнї и жимски розпуст орґанизовано робели на културним и спортским планє. Перше пробованє снованя такого клуба окончене влєце 1959. року. За предсидателя Клуба бул вибрани Владимир Мирко Ґаднянски. Под його руководительством у першим року иснованя Клуба найзамеркованши резултати посцигнути на спортско-рекреативним планє. Руководительох Клуба ше виберало каждого року. Од лєта 1962. року Клуб достал стабилнєйшу орґанизацийну форму дїялносци, кед за предсидателя вибрани Дюра Папгаргаї. Теди у Клубе превага дата културним програмом ‒ драми и музики. За обласц музики бул задлужени Яким Сивч, хтори и по теди водзел валалски концерти под назву Микрофон ваш. У 1962. року орґанизованє тей музичней манифестациї превжал на себе Клуб студентох и стредньошколцох зоз помоцу валалскей младежи. Же би доказали автономносц у пририхтованю, члени Управного одбoру Клуба пременєли и єй потедишню назву на Червена ружа и ґу нєй почали додавац рок у хторим є отримана. Интересантне ту спомнуц же спочатку и студенти нє були имуни на кус скорей спомнуту радио емисию, цо мож видзиц зоз шлїдуюцого цитата, винятого зоз „Дньовнїка роботи Клуба“, зазначеного 30. юлия 1962. року, хтори глаши:

Отримана проба музицкей секциї бо ше сце на соботу 4. VIII виступиц пред публику. На схадзки ришене да ше емисия-програма навола Червена ружа ’62.

Перша музична програма под назву Червена ружа ’62 и отримана 4. авґуста 1962. року. З тей нагоди у Дньовнїку роботи Клуба студентох и школярох стреднїх школох у Руским Керестуре, медзи иншим, зазначене и тото:

Учашнїки хтори ше змагали за чобольов и кошарку червених ружох 1962. року

Отримани забавни вечар. Пририхтани є з помоцу валалскей младежи. Дала го музицка секция и наволани є ,Червена ружa 62’. До поладня ше ушорйовала бина. Вечар на 9 г. почала програма. Було барз вельке число патрачох, цо указує же интересованє за таки приредби вельке. На програми були заступени народни и забавни мелодиї претежно на нашим язику. Мали зме и госца вечара. То бул Мижо Гирйовати ,Червена маїца’ Ср. Митровици. Жири: Латяк Дюра, Биялош Яким, Лучечко Марґита, Варґа Михал и Ґаднянски Владимир одлучели да ше перша награда за хлапцох додзелї Мироньови Мелникови, друга дует Микита-Надьмитьо, треца Чордашовому Янкови. Перша награда була ’Червени чобольов’, друга ,Червена машля’, треца ,Виолински ключ’. Од дзивчатох першу награду однєсла Наталка Колбасова, другу Марча Бикийова, трецу Сенка Кирдова. Перша награда була ,Червена кошарка з ружами’, друга ,Червена хусточка’, треца ,Бомбонєра’. Госц вечара Мижо Гирйовати достал награду у пенєжу 200 динари. Якимови Сивчови купена кристална вазна, почим и вон шпивал ван конкуренциї.“

Од концерта по фестивал

Учашнїки на Червеней ружи хтора отримана 17. авґуста 1963.року

У Дньовнїку роботи Клуба нє зазначене же уж на першей Ружи виведзени и три нови композициї Якима Сивча и же зоз тим уж на самим початку Ружа отворела дзвери и за других потенциялних композиторох. Зоз познєйших рокох видно же то бул вельки порив нашим младим музично надареним людзом же би ше опробовали и як творителє новей музики у народним и забавним духу.

Уж у 1964. року ше указало же ше приявело тельо нови композициї же було потребне пременїц и концепцию цалей музичней манифестациї. Зоз Дньовнїка дознаваме же Управни одбор на своєй схадзки, отриманей 9. юлия 1964. року, заключел шлїдуюце:

„До плану роботи на перше место приходзи орґанизованє такмиченя шпивачох аматерох Червена ружа ’64. Такмиченє того року треба да ма иньшаки випатрунок як до тераз. Треба да ше состої зоз двох часцох и да ше отрима два вечари. Єден вечар да ше такмича шпиваче аматере, а други вечар композиторе аматере.“

Правда, спомнутого року змаганє змесцене лєм до єдного вечара, алє значни ту факт же ше уж теди указала потреба за преширйованє програми на два вечари. Попри тим, видно же и интересованє за тоту манифестацию наросло и у других местох дзе жию Руснаци. Управни одбор Клуба правочасно розпослал поволанки „до наших руских валалох за Червену ружу ’64... да то маю на увиду“.

На штвартей Ружи 1965. року Ирина Ковач однєсла кошарку червених ружох до Нового Саду. То було по першираз же награда нє остала у Керестуре

А же то наисце було так, указує податок же ше на Червену ружу ’65, т.є. на змагательну часц, приявели, попри керестурских, и шпиваче зоз Миклошевцох, Дюрдьова, Коцура, Шиду, Нового Саду и Кули. А значне спомнуц же, як зазначел Микола Скубан у моноґрафиї Ружи, червени ружи 1962–1971, першираз на Ружи наступели и два бит ансамбли. Були то Нєщеснїци зоз Коцура и Комети зоз Шиду.

У 1966. року ше до пририхтованьох Ружи, попри Клуба студентох и стредньошколцох и Месного комитета Союзу младежи, уключує и керестурски Дом култури. Було потребне укладац вельо вецей часу и средства до пририхтованьох як цо то могли уложиц Клуб студентох и стредньошколцох и валалска младеж. То указує на факт же Ружа теди уж преросла рамики младежскей манифестациї. Преширена є на два програми. Попри музичней, у єй рамикох отримани и литературни вечар под назву Поезия и музика младих.

За музичну програму сала Дому култури уж була цесна, та є отримана на монтажней бини у школским дворе пред понад 1000 патрачами.

Червена ружа ’67, шеста по шоре, отримана тиж у школским дворе пред коло 1200 патрачами. Участвовали на нєй аж 26 змагателє. А дзень пред тим у сали Дому култури отримани Вечар поезиї и музики младих, на хторим наступели 13 поетове зоз вецей местох дзе жию Руснаци и Українци. Главну орґанизацию превжал керестурски Дом култури. Остало зазначене же на тей Ружи присуствовал и госц зоз Прешова (Словацка) Юрий Дацко, представитель Културного союзу українских трудбенїкох у тедишнєй Чехословацкей Републики, хтори у мено того союзу и привитал тоту нашу музично литературну манифестацию.

Гелена Планчак зоз Коцура була побиднїца на Червеней ружи 68“ , кед шпивала шпиванку Розквитнута калїна

Червена ружа ’68 уж постала прави фестивал култури. Вимоги и реални потреби за преширйованьом змисту и обсягу Фестивала приведли до того же було потребне оформиц окремни орґанизацийни одбор зоз вецей наших местох и зоз ширшим кругом фаховцох. У рамикох Фестивала оформени штири манифестациї. Попри музичней и литературней, пририхтана и вистава малюнкох наших подобових уметнїкох, а пририхтана и нова музично танєчна манифестация под назву Стретнуце братства (познєйше Естрада братства), у хторей вжали учасц солисти Радио Нового Саду зоз рускима, сербскима и мадярскима народнима шпиванками, а у другей часци зоз своїм блоком по першираз на тих просторох наступел и Поддуклянски українски народни ансамбл (ПУНА) зоз Прешова.

Таки концепт програми Червеней ружи ’68 у подполносци оправдал пременку назви на Фестивал култури югославянских Руснацох и Українцох Червена ружа.

Учашнїки Митинґа поезиї 1974. року

После законченей Червеней ружи ’68 Дюра Папгаргаї у своєй статї з насловом Експериментални глєданя и визначни плоди, обявеней у Народним календаре за 1969. рок, констатовал:

„Ясно ше потвердзело же уж традицийна музично литературна манифестация Червена ружа постала централна културна подїя у нашей народносци. Седма по шоре, вона 1968. року указала же може прероснуц до єдней наисце квалитетней смотри наших музичних, гоч нє лєм музичних досцигнуцох, же искуства хтори ше нагромадзели з дотерашнїх орґанизованьох почали приношиц жадани плоди. Преширени рамики ше указали у цалей своєй позитивносци и хасновитосци за ище моцнєйши розмах наших намаганьох за посцигованє на квалитету. Окрем традицийного змаганя младих шпивачох и митинґа поезиї младих писательох, у рамикох тей манифестациї орґанизовани вечар под назву Естрада братства, хтори указал же Червена ружа нє жада буц заварта до чисто народносних рамикох, же вона нє лєм жвератко нашей дїялносци, алє и нагода за упатранє, та и поровнованє моцох зоз представителями других народносцох и народох, як з нашей жеми, так и з иножемства.“

Моноґрафия  Червена ружа 1962-2011, том I, нова музична творчосц у народним духу

Интересованє шицких наших местох за осму Ружу було уж таке вельке же, гоч и преширена, вона постала „цесна“ за шицких цо жадали на нєй наступиц. Прето Орґанизацийни одбор принєс одлуку же би ше окончела предходна селекция приявених учаснїкох. Така селекция окончована на такв. Малих ружох. Алє, понеже Петровчанє уж мали, по угляду на Ружу, свой Петровски дзвон, а Миклошевчанє свою манифестацию под назву Миклошевци, на хторих мож було окончиц селекцию, Мала ружа отримана лєм у Коцуре, Дюрдьове и Шидзе. Зоз шицких спомнутих манифестацийох лєм найудатнєйши точки здобули право наступиц и на Червеней ружи у Руским Керестуре. На тот способ Ружа постала своєродна смотра найвисших рочних резултатох, хтори посцигли нашо културно уметнїцки дружтва у своєй роботи на музичним и танєчним планє.

У 1969. року Ружа преширена на вимаганє просвитних роботнїкох з ище єдну музичну манифестацию, на тот завод под назву Червене пупче, а ґу ньому приключена и окремна дзецинска програма з нагоди Велького наградного конкурса, чий орґанизатор и спонзор була Редакция дзецинского часопису Пионирска заградка (нєшка Заградка).

Таки преширени обсяг Фестивала вимагал и значни финансийни средства. Треба ту спомнуц же перши Ружи орґанизовани на волонтерскей основи, а нєобходни материялни трошки ше подмирйовало зоз назбераного пенєжу од наплацених уходних картох. Єден час аж анї керестурски Дом култури нє сцел дац безплатно свою салу за отримованє Червеней ружи, аж потамаль покля и вон нє постал єден з єй орґанизаторох. И то була єдна з причинох же ше Ружа преселєла до школского двора. На тот способ оможлївене присуство векшого числа патрачох, а зоз тим витворени и векши финансийни резултат. З тим створена можлївосц виплациц драгово трошки поволаним госцом, алє нє и ансамблом. Єдина помоц орґанизатором теди була у простору за отримованє концерта, а ансамбли зоз других местох себе сами мушели плациц трошки путованя до Керестура и пребуванє у нїм. На жаль, то нє могла постац стаємна пракса, та ше мушело глєдац и ширшу дружтвену потримовку у пенєжу. Медзитим, аж у 1975. року часточно розришени проблем финансованя Фестивала. Теди ше його рамики ище баржей преширели.

Од 1975. року почала ше отримовац, як окремна Ружова манифестация, смотра рочней роботи наших хорских и танєчних ансамблох под назву Одгуки ровнїни.

У 1976. року до рамикох Фестивала уключени и науково совитованя.

Мож повесц же свою дефинитивну физиономию Фестивал култури Руснацох и Українцох Югославиї Червена ружа (таку мал теди назву) достал аж 1976. року, кед уж бул петнасти по шоре. Теди вон зоз початковей єдней нароснул на дзевец рижни културни манифестациї. А то були:

1. Подобово-етноґрафични, историйни и други вистави;

2. Червене пупче, смотра дзецинских музично - танєчних активносцох и музичней творчосци за дзеци;

3. Митинґ поезиї и музики младих (познєйше наволани Струни шерца);

4. Вельки наградни конкурс, зоз окремну културну програму з нагоди додзельованя наградох;

5. Червена ружа, змагательна програма шпивачох и нових композицийох у народним и забавним духу;

6. Одгуки ровнїни, смотра рочних досцигнуцох наших КУД у хорско-танєчней обласци, преткана зоз народним гумором;

7. Науково совитованя на рижни теми зоз нашей историї и култури;

8. Естрада братства, своєродна смотра найвисших рочних музично танєчних досцигнуцох у прировнаню з госцуюцима ансамблами зоз жеми и иножемства;

9. Керестурияда, змаганє вокално-инструменталних ґрупох.

Така концепция Червеней ружи витворйована през вецей роки. З часу на час даєдна вихабена, алє то завишело од обставинох на теренє. З прецеком часу зоз рамикох Фестивала вишла Керестурияда и програма з нагоди Велького наградного конкурса, а преридзени и науково совитованя, же би ше их остатнїх рокох цалком престало орґанизовац у рамикох Ружи.

Поддуклянци подзвигли рейтинґ Червеней ружи

Значне ту напомнуц же медзинародни характер Червена ружа достала зоз госцованьом Поддуклянского українского народного ансамбла (ПУНА).

Дюра Папгаргаї у своєй статї, пошвеценей двацецпейцрочнїци Українского народного театра (УНТ, нєшка Театер „А. Духнович“) у Прешове, обявеней у пригодней моноґрафиї у Прешове 1971. року, призначел же у новембру мешацу 1966. року сцигло до Руского Керестура на адресу главного редактора Руского слова Дюри Латяка писемко, хторе написал уметнїцки руководитель ПУНА Юрий Цимбора. Писмо мало характер информативней поволанки на початок сотруднїцтва.

Пошвидко после того ушлїдзели и конкретни акциї. По консултованю зоз Совитом Дому култури у Руским Керестуре Дюра Латяк одписал на спомнуту поволанку на сотруднїцтво, та 14. априла 1967. року до Руского Керестура, до Редакциї Руского слова, припутовала делеґация у составе: Секретар КСУТ Федор Ковач, уметнїцки руководитель ПУНА Юрий Цимбора, главни редактор новинох Нове життя Юрий Дацко, директор Українского радия у Пряшове Василь Вархола и финансийни директор УНТ Лудвиґ Галушка. Уж сам состав делеґациї указує же ше од тей нащиви вельо очековало. Дюра Папгаргаї у спомнутей статї спомина:

„Догварка була щира, сердечна: розвивац медзисобне сотруднїцтво. Презентовац вредносци українского фолклорного скарбу прейґ ПУНА у социялистичней Югославиї, винайсц можлївосци за госцованє наших аматерох на Свиднїцким швету писньох и танцох.

На конкретизованє догвареного нє требало длуго чекац. У юлию мешацу 1967. року ПУНА зос свою програму нащивела Руски Керестур, Кулу, Коцур, Вербас, Червинку, Сивец и Бачку Тополю. Було то за шицких патрачох велїчезне дожице, нєзабутне. Прекрасни українски костими, складно увежбани шпивацки гласи, лєгки балетски крочай нашмеяних танцошох плєнєли увагу патрачох у каждей точки. Публика и орґанизаторе нє лєм же нє були розчаровани, алє под вплївом одушевия скоро у каждим месце виражели жаданє же би их з новим приходом ПУНА знова нащивела.

Делеґация КСУТ (Културного союзу українских трудбенїкох) и УНТ (Українского народного театра) у Руским Керестуре

Тот успишни наступ дал векши порив нашим танєчним и шпивацким колективом. Уж тераз мали приклад цо ше з витирвалу и сцелу роботу може посцигнуц. Фолклорни скарб ше од того часу у културно- просвитних колективох почал ище баржей пестовац, почало ше интензивнєйше робиц на подзвигованю квалитета и роботи и наступох. Була то права хасновита лекция за наших аматерох.“

И, Дюра Папгаргаї мал право. Од того часу нашо културно-просвитни дружтва почали пошвецовац векшу увагу квалитету и интерпретациї народних танцох и шпиванкох. Можебуц случайно Папгаргаї призабул призначиц же у рамикох першей нащиви ПУНА до Керестура припутовали 89 члени колектива и руководства и же шицки були розподзелєни по приватних обисцох, преважно у активних членох Дому култури, бо – як познате – у Керестуре нєт готел, а нє було анї терашнього интерната. На тот способ настали и нєзабутни медзилюдски приятельства. Нє чудо, вец, же ше после двох тижньох друженя на випровадзанє госцох зишло скоро пол валала, же було и слизох и поцилункох, и писнї и плачу... Медзитим, Папгаргаї призначел же на Свиднїцким швету писнї и танцу 1968. року наступели аматере КПД Максим Горки з Нового Саду, а рок познєйше и члени керестурского Дому култури. У вязи з тим вон у спомнутей статї зазначел:

„Яка радосц! Нєвимерлїва! Яки нєзвичайни, по теди нє дожити аплаузи пред вецейтисячну публику. Стретнуца и облапяня зос старима и новима приятелями. Наступи тих двох югославянских колективох на Свиднїцким швету представяли найвисшу награду за витирвалу роботу двом найпознатшим аматерским колективом рускей народносци у Югославиї.

1968. року ПУНА знова на поволанку керестурского Дома култури нащивює Югославию. Програма под насловом ,Витай весна’ просто одушевела публику у Руским Керестуре, Новим Садзе, Кули, Баймоку, Суботици... Вона як нїґда по тераз украшела керестурску Червену ружу, заколїсала ю з чаривним танцом и прекрасним шпивом. Нє вельо менши успих посцигли и представителє ПУНА на Червеней ружи 1969. року.

Свиднїцке швето и Червена ружа себе знова щиро сцисли руки, братски ше привитали, потвердзели ше пред вельочислену публику. Свиднїк и Руски Керестур постали символи медзисобних братских фолклорних стретнуцох.“

Мож шлєбодно повесц же члени Поддуклянского українского народного ансамбла мали вельки вплїв на подзвигованє рейтинґа Червеней ружи. После нїх скоро каждого року на Ружи участвує голєм по єден ансамбл народних писньох и танцох зоз иножемства. Найчастейше зоз тедишнього Совєтского Союзу (Україна и Русия). Ружа поставала вше познатша и популарнєйша. Пошвидко ше за тоту нашу манифестацию заинтересовали и союзни средства явного информованя, уключуюци и телевизию. З тим и финансийна помоц почала присциговац зоз вецей жридлох, алє ше и видатки вше швидше звекшовали. То анї нє чудне кед ше ма на розуме же у рамикох шицких манифестацийох Фестивала брали учасц понад 1000 учаснїки!

Учашнїки Червеней ружи 1972. року

Обще швето Руснацох

Червена ружа – жридлова, найстарша и найзначнєйша манифестация Фестивала култури Червена ружа, змаганє шпивачох, хторе орґанизовали керестурски студенти и стредньошколци, постала тот зародок зоз хторого виросли шицки други ластари и зоз нїх настал єдини и найзначнєйши фестивал нашей култури. Вироятно нїхто з єй сновательох у чаше снованя нє думал же вона постанє обще швето Руснацох и Українцох на просторох дакедишнєй Югославиї. Задумана є як плод фериялней анґажованосци студентскей, стредньошколскей и валалскей младежи у лєтнїм периодзе, у обласци музичней култури. Нєт сумнїву же ту главну улогу мал млади и нєафирмовани залюбенїк до музики, тедишнї студент права Яким Сивч, у тедишнїм чаше и подпредсидатель Управного одбору Клуба студентох и стредньошколцох. Вон уж по теди на концертох под назву Микрофон ваш мал водзацу улогу, та було цалком лоґичне же ю предлужел и на Червеней ружи. За тото мал и особни интерес, бо вон уж по 1962. рок мал понад 10 свойо композициї хтори нє мал дзе явно виводзиц. Микрофон ваш, и Червена ружа после того, були єдине место дзе могол презентовац свойо композициї и оценїц як их народ прилапює. Так уж на першей Ружи после змагательней часци шпивачох виведзени три його композициї (Щешлїва ноц на його слова, Єшеньска ружа на слова Янка Грубенї и Модерна любов (Вше ше людзе любовали) на слова Юлияна Каменїцкия). Конферансу написал и водзел тедишнї предсидатель Управного одбору Клуба Дюра Папгаргаї зоз Йозефину Майхер (познєйше одату Фа), хтора була и член Управного одбору Клуба. Як зазначел Микола Скубан у моноґрафиї Ружи, червени ружи (1962–1971) (боки 17 и 19), на Першей Ружи у змагательней часци участвовали 13 шпиваче и шпивачки. Були то Наталия Колбас (Колєсар), Мирон Мельник, Мария Бики (Савкич), дует Михал Микита и Владислав Надьмитьо, Ксения Кирда (Василєвич), Янко Чордаш, Йовґен Фейди, Владислав Дудаш, дует Мелания Рац и Мелания Латяк (Радулович), Мария Сабадош и Ярослав Пап и Михал Гирйовати як госц зоз Сримскей Митровици. На програми виведзени 13 народни, 12 за бавни шпиванки, а шицких шпивачох провадзел оркестер у составе: Яким Сивч (гармоника), Владимир Мученски (клавир), Любомир Сопка (ґитара) и Владимир Новосад (бас). У истей моноґрафиї, видатей з нагоди дзешецрочнїци Червеней ружи, наш познати музични дїяч, дириґент и музични редактор Радио Нового Саду Ириней Тимко у статї „Червена ружа и наша музична творчосц“ спомина же зоз Ружу почал нови период нашей музичней творчосци „у творчим и виконавчим“ розуменю, та пише: „До того часу наша писня нє мала нагоду появиц ше пред таким вельким числом слухачох, и то слухачох хтори по своїм смаку могли и поведли свойо слово. Народна писня зоз тоту манифестацию достала ,фахови’ вельочислени ,жири’, хтори праве у своїм домену почал – сцел нє сцел – зоз своїм вельким уплївом дїйствовац на прешлосц и будучносц своєй народней писнї. Розуми ше, дїйство того ,жирия’ треба розумиц релативно – до певней мири, алє го нїяк нє мож заобисц. Нє шицко єдно цо Червена ружа (думам на єй публику) пове о нашей старей народней писнї. Чи вона прежита, чи вона може буц прави и єдини корень нових конарчкох, нових лїсточкох? Так поставене питанє ясно указує и на орґанизаторох и їх одвичательносц: з добрим приготовеньом мож ожиц народну писню, предлужиц єй вик и поставиц ю там дзе єй место, же би була жридло нашей музичней творчосци, а нєдзбало представена народна писня губи и смак єй слухачох и себе готує нєвеселу будучносц.“

Нова музична творчосц у народним духу Червена ружа, як жридлова музична манифестация, дожила найвецей концепцийни пременки у своїм розвою. У єй рамикох през велї роки було змаганє младих шпивачох за найкрасши женски и хлопски глас, на нєй виводзени и нови композициї як у народним так и у забавним духу. Вец ше почало розписовац и конкурси за нови композициї, а кус познєйше и за тексти. Прилапени композициї виводзени на Ружи у окремним блоку. Вец ше ґу нїм приключело и наступи наших хорских и танєчних ансамблох, а ище пред тим наступи вокално инструменталних ґрупох. Прето ше Ружу мушело прешириц зоз ище двома новима манифестациями (Одгуки ровнїни и Керестурияда). Од 1988. по 1996. рок и змаганє младих шпивачох за найкрасши женски и хлопски глас уключене до Одгукох ровнїни, та ше програма жридловей манифестациї состояла лєм зоз змаганя нових композицийох у народним и забавним духу. Од того часу их у цалосци директно преноши Радио Нови Сад, а тиж так и новосадска Телевизия. Од початку дватисячитих рокох знова пришло до пременки концепциї Ружи, та до єй рамикох врацене змаганє за найкрасши женски и хлопски глас опрез змаганя нових композицийох (на тот завод) лєм у народним духу.

Деталь зоз Червеней ружи 1988. року

Прекрасни плоди Червеней ружи

Треба окреме наглашиц же нам Червена ружа през 50 роки свойого иснованя принєсла и найзначнєйши плоди. На змаганьох за найкрасши хлопски и женски глас участвовали блїзко сто аматере, спомедзи хторих вецей як половка у свой час постали и радио шпиваче. Їх гласи остали записани на маґнетофонских пантлїкох або компакт дискох и зачувани су и за будуци нашо поколєня. Значне число тих шпивачох уж нє медзи живима (напр. Яким Сивч, Михал Микита, Микола Корпаш, Витомир Бодянец, Олена Гирйовати–Попович, Нестор Пушкаш, Мирко Ґаднянски, Владимир Горняк–Фицко, Ирина Давосир–Матанович, Драґен Колєсар...), алє зачувани їх гласи од забуца и слухаме их прейґ габох Радио Нового Саду и ище дзепоєдних локалних радио-станїцох. Тоти плоди найкрасше илуструю слова Иринея Тимка у кус скорей спомнутей статї, хтори глаша: „ Червена ружа як естрада дала найвекши можлївосци шицким нашим виконавцом, репродуковательом музичней творчосци. Кед попатриме на дотерашнї живот Червеней ружи, вона була за нїх ище найбаржей зацикавена. През ню дефиловали потераз скоро шицки нашо познати виконавци, од наймладших до найстарших, од солистох, ґрупох, до наймасовнєйших хорох, хтори могли буц удатнє злучени. Велїм солистом-шпивачом отворена красна перспектива праве на Червеней ружи. Схопносц и любов ґу хорскей писнї нашого народу на Червеней ружи нашли свою праву афирмацию у чаше кед на велїх наших музичних манифестацийох траца свойо место у програми.“ Алє, тото цо найзначнєйше, Фестивал Червена ружа, окреме його жридлова манифестация под истим меном и Червене пупче за 50 роки збогацели наш музични фонд зоз понад 900 новима композициями, спомедзи хторих половка у народним и забавним духу, а друга половка наменєна дзецом. Тоту першу половку компоновали 76 композиторе на слова 62 авторох (а даєдни и на свойо). Найлоднєйши спомедзи композиторох були: Владимир Семан-Зеро, Яким Сивч, Владислав Надьмитьо, Юлиян Рамач, Витомир Бодянєц, Любомир Загорянски, Юлин Бучко, Дьордє Ковачевич, Мирослав Пап, Агнета Тимко, Mаґдалена Горняк–Лелас, Михал Лїкар, Владимир Малацко и Мирон Сивч. Кед маме у оглядзе же, дзекуюци українскому етноґрафови Володимирови Гнатюкови, зоз конца 19. вику од наших предкох зазначени лєм 430 тексти народних шпиванкох и же у перших шейсцох деценийох 20. вику ґу нїм доложени лєм даскельо нови (хтори „на пальци єдней руки“ мож начишлїц), вец нам будзе лєгчейше похопиц велькосц и значносц „талу“ яки нам принєсла Червена ружа за пол вику свойого иснованя. Медзитим, и то нє шицко! Нова музична творчосц у рамикох нашей релативно малочисленей националней заєднїци ше нательо розвила же єй постала цесна Червена ружа!

Червена ружа у цеку 80-тих

Зоз намиру же би баржей популаризовали нову музичну творчосц, члени Музичней редакциї и Редакциї бешедней програми на руским язику Радио Нового Саду, на инициятиву тедишнього новинара Руского слова Владислава Надьмитя, почали емитовац нову музичну емисию под назву З ружовей заградки, хтора 1990. року преросла до явней емисиї и полни дзешец роки є поряднє отримована, дзекуюци и конкурсу хтори кажди рок розписовани. А вец тоту явну емисию, концерт, Радио телевизия преглашела за фестивал под назву Ружова заградка, хтори ше поряднє отримує уж вецей як три и пол децениї. За тот час за потреби Музичней редакциї Радио Нового Саду на маґнетофонску пантлїку або на компакт диск зняти 208 нови шпиванки, хтори поряднє нєшка слухаме у емисийох Радио Нового Саду на руским язику. Шицки тоти шпиванки 2008. року обявени у окремним зборнїку хтори до друку пририхтал Андрей Даждиу под насловом Ружова заградка 1990 -2007. Зоз медийох явного информованя дознаваме же нєшка на конкурси сцигую и по два раз вецей квалитетни композициї як цо их мож презентовац на єдним цаловечаршим концерту! По нашим думаню и то заслуга ентузиястох хтори ю пред 1962. року основали и гевтих цо по нєшка участвовали у єй каждорочним пририхтованю. Нє шмеме у тей нагоди забуц и на людзох хтори Ружу основали и гевтих хтори ше ґу нїм приключели и после нїх предлужели роботу на єй пририхтованю. А було их на стотки! Лєм у Совиту Фестивала 1983. року були уключени 38 делеґати, а Програмни одбор мал 11 членох. Ґу тому треба спомнуц же були меновани и 14 рижни комисиї як помоцни цела, до хторих меновани по 4-12 члени, цо вєдно виноши же лєм у нїх були анґажовани приблїжно 80 члени. Поступно ше особи у спомнутих целох меняли и учели на искуствох своїх колеґох зоз длугшим стажом, так же ше кадрово пременки у роботи на пририхтованю Фестивала нє одражовали неґативно.

Алє, значне ту спомнуц же у тим пририхтованю у перших деценийох його отримованя участвовал скоро цали валал. Ружа постала праве валалске швето у Руским Керестуре. Було у нїм вецей госцох як звичайно на Кирбай! Людзом импоновало же Ружа преславела Керестур нє лєм у тедишнєй Югославиї, алє и поза єй гранїцами.

Орґанизатор Фестивала Дом култури Руски Керестур.

Фестивал софинансую Општина Кула, Национални совит Руснацох, Министерство култури и информованя Републики Сербиї и Покраїнски секретарият за културу, явне информованє и одношеня з вирскима заєднїцами.

НАЙЛЄПШИ ШПИВАЧКИ И ШПИВАЧЕ НА ЧЕРВЕНИХ РУЖОХ
Рок	Шпивачка	Место	Шпивач	Место		Рок	Шпивачка	Место	Шпивач	Место
1962.	Наталия Колбас	Руски Керестур	Мирон Мельник	Руски Керестур		2001.	Оля Няради	Суботица	Борис Маґоч	Н. Орахово
1963.	Ана Дю. Дудаш	"	Мирон Мельник	"
1964.	Еуфемия Будински	"	В. Надьмитьо-М. Микита	"
1965.	Ирина Ковач	Нови Сад	"	"
1966.	Анґела Колєсар	Руски Керестур	"	"
1967.	Гелена Ґлувня	Шид	Юлиян Варґа	Кула
1968.	Гелена Планчак	Коцур	Дьордє Ковачевич	Руски Керестур
1969.	Любица Папуґа-Славица Емейди	Нове Орахово
1970.	Мария Макаї	Руски Керестур	Риста Кляїч	Крущич
1971.	Сенка Няради	Руски Керестур	Мариян Бутински	Тернополь
1972.	Ана Сеґеди	Вуковар	Михал Роман	Руски Керестур
1973.	Любица Папуґа - Ружица Мудри	Миклошевци	Олекса Павлишин	Заґреб
1974.	Марица Пушкаш	Нови Сад	Iван Герич-Степан Сiкорський	Баня Лука
1975.	Ана и Любка Фиґурек	Баня Лука	Дюра Надь	Руски Керестур
1976.	Славица Горняк	Дюрдьов	Дует Юлин Рац-Йовґен Надь	Руски Керестур
1977.	Таня Холошняй-Любка Виславски	Дюрдьов	Янко Колошняї	Руски Керестур
1978.	Андєлка Хасан, Снежана Ножинич, Нада Михалич, Весна Каранович	Заґреб	Мирко Ґаднянски	Нови Сад
1979.	Евфемия Маньош-Даниела Колєсар	Руски Керестур	Славко Афич	Руски Керестур
1980.	Зденка Сакач	Руски Керестур	Михайло Ляхович-Андрий Лаврий	Нови Сад
1981.	Мирослава Чордаш	Руски Керестур	Владимир Бесерминї	Коцур
1982.	Тереза Фейди-Мирослава Чордаш	Руски Керестур	Михал Голик	Петровци
1983.	Ксения Папуґа	Руски Керестур	Емил Няради	Руски Керестур
1984.	Ивана Сомборски	Дюрдьов	Юлиян Рамач	Руски Керестур
1985.	Славка Сабадош	Руски Керестур	Ґоран Павич	Коцур
1986.	Александра Холошняй	Дюрдьов	Павле Паланчаї	Руски Керестур
1987.	Мария Фа-Фемка Бучко	Руски Керестур	Звонко Чижмар	Руски Керестур
1988.	Андрея Колєсар-Саня Еделински	"	Звонимир Кочиш	Зомбор
1989.	Мелания Дудаш-Таня Няради |"	Силво Медєши	Петровци
1990.	Таня Бреґун-Мария Холошняй	Дюрдьов	Владимир Надь	Руски Керестур
1991.	Лариса Дудаш-Мария Паланчаї	Руски Керестур	Михайло Гайдук	"
1992.	Анастазия Бесерминї	Вербас	Борис Чордаш	"
1993.	Соня Сопка-Мария Колошняї	Руски Керестур	Юлиян Медєши	"
1994.	Ивана Дошен	Нови Сад	Владимир Югик	"
1995.	Таня Бодянец-Дарина Планчак	Руски Керестур	Микола Хромиш	Дюрдьов
1996.	Ана и Гелена Рац	"	Томас Николич	Руски Керестур
1997.	Леся Вовк	Вербас	Дарко Рац	"
1998.	Кристина Бобрек-Ана Царич	Баня Лука	Владимир Надь Митьов	"
1999.	Люпка Рац	Руски Керестур	Ярослав Тиркайла	Дюрдьов
2000.	Саня Полдруги	Коцур	Владимир Олеяр	Руски Керестур

Ґалерия

• 
  Публика на фестивалу
• 
  Рок ґрупа на Керестурияди 86
• 
  Дзеци на Червеним пупчу
• 
  Моноґрафия  Червена ружа 1962-2011, том II нова музична творчосц у забавним духу
• 
  Моноґрафия  Червене пупче, том III, 1969-2012, нова музична творчосц за дзеци
• 
  Банер зоз привитом госцом фестивала

Литература

• Ґрупа авторох, 30 Червени ружи, НВУ Руске слово, Нови Сад, 1991.

• Мирон Жирош, „Фестивал култури Руснацох и Українцох Югославиїˮ, Бачванско-сримски Руснаци дома и у швеце 1745-1991, Том II, Грекокатолїцка парохия св. Петра и Павла, Нови Сад, 1998, б. 287.
• Мирон Жирош, Нєзачуване лєбо затераз затрацене благо Червених ружох, Шветлосц ч. 1, Нови Сад, 1987, б. 74-84.

• 10 Червени ружи, Фестивал култури Руснацох и Українцох Югославиї, Руске слово, Руски Керестур, 1971.

Вонкашнї вязи

• Нова музична творчосц у народним духу, Том I, Завод за културу войводянских Руснацох, Нови Сад, 2011.
• Нова музична творчосц у забавним духу, Червена ружа 1962-2011, Том II, Завод за културу войводянских Руснацох, Нови Сад, 2014.
• [1] Нова музична творчосц за дзеци, Червена ружа 1969-2012, Том III], Завод за културу войводянских Руснацох, Нови Сад, 2013.
• Ан. Медєши, Йована Петрович и Иґор Папуґа побиднїки змаганя за найкрасши глас. Рутенпрес, 28. юний 2025.
• Фестивал "Червена ружа"/Festival "Crvena ruža"