Фелон
Мали фелон то перша риза, ушита зоз ризового платна, надзива ше през главу и покрива перша, плєца и горню часц хрибта. Облєка ше го лєм раз при першим пошвецаню богослужителя. Символично означує же священослужитель бере на себе сладке ярмо богослуженя.
Фелон то остатня риза священїка. То облєчиво хторе покрива цале цело и шицки други облєчива. То плащ у форми копи хтори ма лєм на верху дзиру, през хтору ше надзива на главу. Понеже з таким фелоном барз очежани литурґийни дїйства, бо руки священїка були барз спутани, предок з часом скрацовани. Так нєшка фелон длугоки лєм зоз задку, а предок скрацени так же би руки покрил лєм по дланї.
Фелон ше шиє зоз ризового платна. Платно би мало буц зоз крижиками, алє присутни и други мустри (дезени), дезен виновей лози и класки жита.
Фарба фелону, як и шицких других облєчивох (ризох) священослужительох , може буц златна, жовта, била, стриберна, алє и червена, белава, желєна, чарна. То лєм основна фарба, на хторей орнаментика може буц иншакей фарби.
Окрем же ше шиє зоз ризового платна, по рубцох ше обшива з одвитуюцима ґалонами, а на хрибтовей часци обовязно ма буц крест (криж).
При облєканю фелону священїк модлї за тот чин одредзену молитву.
Литература
[ушориц | ушор жридло]- Дзвони, християнски часопис, април 2003, протоєрей ставрофор Йоаким Холошняй
- Дзвони, християнски часопис, май 2003, протоєрей ставрофор Йоаким Холошняй
- о. др Роман Миз, Церковно литурґийно литурґични лексикон, бок 294
Вонкашня вяза
[ушориц | ушор жридло]- Felon sh.wikipedia.org