Фашенґи

Фашенґи (серб. покладе; слц. fašiangy; од нєм. Fasching) то час од Богоявления, (Трокральох) 6. януара (19. по юлиянским календаре) по Сиропусну нєдзелю по початок Велького (Вельконоцного) посту. У фашенґох, по церковних предписаньох, дошлєбодзени вешеля, винчаня, свадзби, док ше у Вельким посце нїяки вешеля нє дошлєбодзую.

Слово фашенґи етимолоґийно мож повязац зоз нємецким словом Fastnacht цо у буквалним прекладу значи дораз ноц бо приходзи пост та ше нє годно вешелїц, алє и зоз словом фашинґс (Faschings) хторе означує период у хторим ше отримую вешеля и карневали. Слово карневал настало од италиянских словох carne levare цо значи уклонїц месо або carne vale цо значи збогом месо.К арневали популарни у велїх европских и латиноамерицких жемох. Блїзки су римокатолїцкей, алє и православней християнскей традициї. Фашенґи при войводянских Руснацох ше могли розвиц и под вплївом горватскей традициї славеня карневалу под назву покладе, котра ше у одредзених жарґонох наволує и фашник, лєбо вашанґе при Бунєвцох, або фашанґе у Банату.

Пущанє

Восточни Церкви котри служа по византийним обряду маю период пред постом котри тирва три тижнї. Почина зоз нєдзелю Митра и фарисея, та по Сиропусну нєдзелю после котрей почина Вельконоцни пост. Друга нєдзеля то Нєдзеля блудного сина по котрей правила о посценю исти як и кед нє пост. Треца, Месопусна, кед ше престава єсц месо, алє ище по Сиропусну допущене єсц вайца и млєчни продукти. Зоз Сиропусну нєдзелю престава конзумованє тей поживи. Тота нєдзеля ше при Руснацох наволує и Пущанє. З тим ше дума же ше ту конєчно у єдзеню престава єсц масне (одпущує ше од себе масне єдзенє). По церковним предписаню од нєдзелї Митра и фарисея по нєдзелю Блудного сина сертис – нєт предписаного посту. Поняце пущанє би могло потолковац и през перспективу Святого писма котре гвари: „Кед ви одпущице людзом їх вини, одпущи и вам Оцец ваш нєбесни. Алє кед ви нє одпущице людзом, анї Оцец ваш нє одпущи вам вини вашо.” (Мт 6, 14‒15).

Спрам записох Миколи Мушинки, алє и паметаня найстарших Керестурцох єст докази же ше Руснаци голєм у Бачки у чаше фашенґох облєкали до маскох (Мушинка 1988: 59), но углавним то були рижни стари ренди. Медзитим, чежко мож вериц же таки друженя прешли без погарика палєнки и шпиванки, та аж и танцу. На таки способ ше закончую фашенґи и почина такволани чисти пондзелок, перши дзень Велького посту.

Масленица

При Восточних Славянох постої фестивал наволани Масленица. Понеже ше по Восточним обряду по Месопусней нєдзелї вецей нє шме єсц меса, алє могло єсц продукти зоз млєка и вайца, зоз того ше, вироятно, розвил тот фестивал. Но, по археолоґийних доказох зоз 2. вика после Христа, заключує ше же Масленица можебуц найстарше очуване славянске швето и походзи зоз давней поганскей традициї. По митолоґиї то фестивал слунка котри персонификовал погански бог Волос и означує наиходзаци конєц жими.

Характеристичне єдло за Mасленицу були ценки палачинки або палачинки направени зоз богатей поживи котра допущена по Сиропусну нєдзелю – масло, млєко и вайцо. Палачинки ше у погански час тримало за символ слунка пре свою округлу форму, та су прето и правени на чесц новонародзеного слунка.

Литература

Еделински Миколка, Владимир, Як гуторя дїдове – швет бул давно иншаки, Руске слово и Завод за културу войводянских Руснацох, Нови Сад, 2023

Словнїк руского народного язика II, Нови Сад 2017, бок 648