Уметнїцка колония у Бачкей Тополї

Уметнїцка колония у Бачкей Тополї формована 1953. року, и була друга подобова колония на цалей териториї дакедишнєй Югославиї.

Початки снованя

Перши учашнїки-снователє колониї були Йожеф Ач (Ács József), Пал Петрик (Petrik Pál), Стеван Маринкович, Зоран Петрович, Бошко Петрович и Милош Баїч. Колония була змесцена до будинку старей школи нєдалєко од штредку вароша. Имре Девич бул водитель и орґанизатор колониї од снованя по 1960. рок, а потим ю водзел Йожеф Ипач (Ipacs József), Пакл Андор (Ádor Pál) и Иштван Жаки.

Єдна з програмних напрямкох колониї була оплеменьованє животного и роботного простору, односно програма „малей синтези” хторей бул циль интеґровац уметносц и сучасну архитектуру (Дуранци 2003). Дзекуюци тей програми вибудовани вельочислени нови архитектонски будинки, школи, амбуланти. читальнї, готел у Бачкей Тополї, Малим Идьошу, Фекетичу оплеменєни зоз фресками, муровима керамичнима композициями, муровима мозаїками и скулптурами у просторе, зоз чим витворена повязаносц уметносци и околїска.

Учашнїки колониї були уметнїки зоз простору бувшей держави Югославиї, алє и з Мадярскей, Польскей, Русиї. Векшина уметнїкох була зоз Войводини. Пременки концепта роботи колониї меняю ше дзеведзешатих рокох пре кризу и дружтво, алє колония нє претарговала свою активносц, а до єй роботи ше уключовали велї млади уметнїки, предлужело ше зоз активносцами и организацию виставох. Збирку колониї творя малюнки, ґрафични рисунки и скулптури авторох учашнїкох колониї. Збирка формована зоз подарованих творох авторох-учашнїкох зоз колонийох, а даєдни одкупени од авторох.

Обєкт Уметнїцкей колониї находзи ше на побрежю Бачкотопольского озера, 5 километри є оддалєни од городу, зоз прекрасним и еколоґийно значним околїском Бетярскей долїни. То нєшка простор Art Gallery, у каштелю нєдалєко од Бачкей Тополї дзе ше орґанизую вистави провадзени зоз каталоґами.

Дзекуюци проєкту за розвой подобовей уметносци у Бачкей реґиї, у рамикох ИПА - програми прейґгранїчного сотруднїцтва, 2014. року реализована реконструкция будинку Уметнїцкей колониї.

Будинок розполага зоз осем госцинскима хижами (зоз по двома посцелями), зоз купальню, малу кухньочку, и єдну мултифункцийну салу котру мож хасновац за преподаваня, вистави, або як єдальню.

Од 2018. року обєкт ше хаснує и за туристични наменки. Далєко є од городскей гужви и галайку, на побрежю озера, зоз богатим рижнородним рошлїнским и животиньским шветом коло себе, у живописним околїску и окреме є прикладни за орґанизованє уметнїцких колонийох и школи у природи.

Колонию можлїве нащивиц по догварки през цали рок.

Литература

• Туристична орґанизация општини Бачка Тополя, 2024. рок, б. 14

Вонкашня вяза

• Путеви и културе
• Likovna kolonija u Bačkoj Topoli | Razglednice | 09.09.2016. Youtube.com
• Sedam decenija bačkotopolske Umetničke kolonije: Mala sinteza kao veliko nasleđe maglocistac.rs