Точка
Точка як интерпункцийни знак ше пише:
а) на концу виреченьох, потвердзуюцих и одрекаюцих: Яр приходзи.; Наставнїк вошол и почал зоз викладаньом.; Вона нє сцела присц.;
б) на концу повязаних часцох виреченя кед их автор сце наглашиц: Рика блїскота у ноци. Чече. Нєобачлїво.;
в) за даєднима скраценями: проф.;
г) за арабскима числами кед означую порядково числовнїки: 24. 4. 2018. року; на 3. месце;
ґ) за римскима числами опрез насловох поглавйох: I. Увод; II. Потерашнї виглєдованя;
д) за насловами видзелєних часцох, кед ше текст предлужує, а нє преходзи до нового (уцагнутого) шорика: Виєдначованє консонантох по дзвонкосци. Зоз 27 консонантох 20 ступаю до парох по дзвонкосци ...;
е) за арабскима числами або малима буквами на початку меншей цалосци: 1., а.; у тим случаю мож писац и полузаградзенє або цале заградзенє: 1), а); (а), (1); наприклад: Автор слова подзелєл на штири ґрупи:
1. слова зоз европских нєславянских язикох;
2. слова зоз славянских язикох;
3. слова зоз ориєнталних язикох;
4. слова зоз класичних язикох.
є) у вецейцифрових числох векших од штироцифрових; за оддзельованє каждих трох цифрох з правого боку мож похасновац и розмакнуце: 5.260.300.000 и 5 260 300 000;
ж) кед скрацуєме мена и презвиска, назви населєньох, державох и других ґеоґрафских поняцох: М. Ковач, М. М., Г. Нови, С. Корея;
з) при наводзеню библиоґрафийних єдинкох (референцох) за оддзельованє датума од наслова твору и за оддзельованє наслова твору од места публикованя, як и на концу референцох: Рамач, Юлиян (2002). Ґраматика руского язика. Београд: Завод за уџбенике и наставна средства.;
и) у математики место числа хторе треба пренайсц (2 + . = 7).
Точку ше нє пише:
а) за насловами, поднасловами або наднасловами;
б) за подписами;
в) за скраценями мерних єдинкох: м, л, кґ;
г) за римскима числами хтори ше читаю як порядково числа: 24. IV 2018. року; у XVII вику;
ґ) за арабскима порядковима числами хтори ше находза опрез других интерпункцийних знакох: (24. 04. 2018); на 10, 15. и 20. километру; конференция отримана 15–18. юния 2001. року;
д) за акронимами: АПВ, РТВ, ЦФК;
е) за числами хтори ше находза за меновнїками член (закона, правилнїка), точка, бок: член 29 и 30; у точки 6 и 9; на боку 142 и 181;
є) за числом адреси: Фрушкогорска 17; Ошлєбодзеня 34;
ж) за толкованями под фотоґрафиями (На початку отвераня фирми отримана мала шветочносц);
з) на концу библиоґрафийней єдинки по наводзеню УРЛ адреси и ДОИ числа же би ше нє здобул упечаток же точка часц УРЛ-а и ДОИ-а (http://www.safechild.org/; DOI: 10.1037/1082-989X.5.4.41 1);
и) у штироцифрових ознакох рокох, за цифру хтора означує тисячи (Друга шветова война почала 1939. року);
ї) за скраценями хтори ше состоя зоз двох або вецей буквох вжатих з єдного слова же би означели варош, општину, админиcтpaтивнy територию хтора видава реґистерски таблїчки превозкох (БҐ, НС, СО, ВС).
Литература
[ушориц | ушор жридло]- Фейса, М, Медєши, Г., Правопис руского язика з правописним словнїком, Нови Сад 2021, б. 56-57.