Торба

Торба (серб. торба; всл. torba; укр. торба; рсй. торба = оброшнїца; общеславянска назва; од тур. torba) мех, мещок и под. за ношенє рижних предметох менших димензийох. У зависносци од наменки, торби можу буц рижних димензийох и направени з рижних материялох.

Файти

Спрам наменки и материялу з якого су направени, торби мож подзелїц на даскельо основни катеґориї:

Класична торба. Тоти торби найчастейше направени з даякей файти текстилу або штучних влакнох хтори барз моцни же би могли витримац векши терхи.

Броцак. Броцак файта торби хтора место ручки ма можлївосц за ношенє на плєцох. То типи школярских торбох за школски прибор и кнїжки за школу.

Найлонова або паперова торба направена з найлону або паперу и хаснує ше ю кед ше ноши менши чежини и на кратких релацийох.

Торба або куфер. Тоту файту торби ше найчастейше хаснує за длуги путованя. За розлику од обичних торбох, направена є або помоцнєта з даяким твардейшим материялом. Часто єй додати и колєска за котулянє у случаю векших чежинох.

Приручна торба або ташка/ташочка. То окремна катеґория торбох прилагодзена за каждодньове ношенє. Хаснує ше ю за ношенє рижних приручних предметох: шминки, бутєлара, хусточкох, документох и под. Часте подзелєнє ташкох на хлопски и женски пре характеристични дизайн. Коло основней наменки, тота файта торби або ташки постава важни модни деталь.

Мех: тота файта торби направена з моцнєйших штучних влакнох або тканого домашнього платна на мехи и служи за преношенє и одкладанє розтресацого материялу.