Тоналитет

Автентична каденца, акорди на IV-V-I ступеню у C-duru творя и закончую заокружену музичну думку.

Постоя два поняца-смисла тоналитета;

♦ у общим - поняцу одношеня - гармонско-функционални систем (ит. tonalità, франц. tonalité, анґл. tonality, keyship, нєм. Tonalität)

♦ у окремним поняцу - тонски род на одредзеней абсолутней висини, (ит. tonо, франц. ton, анґл. key, нєм. Tonart)

Дефиниция

Тоналитет то музично-гармонске поняце. То акордски одношеня и вязи даєдней скали у одношеню на єй гармонийски центер, т.є. основни, тонични акорд.

Значи, тоналитет даєдней композициї лєбо єй часци творя шицки скалово лєбо нє скалово (повисшени и знїжени) тони хтори основа за „збудову”, односно творенє мелодиї и гармониї єдней композициї.

Историят

Тоналитет ше як музичне поняце поступно розвило у цеку 17. вика дзекуюци трансформацийом штредньовиковних такв. модусох, кед преовладала идея же би скали (орґанизовани до двох тонских родох) були идентични нєзависно од ,,стартного-початного тона у композициї.

Тоналитет перши дефиновал французки композитор и теоретичар Жан Филип Рамо (Jean-Philippe Rameau, 1683–1764) у своїм Трактату о гармониї зоз 1772. року. А мено тоналитет перши похасновал Александар Етєн (Alexandre-Étienne Choron 1771-1834). Тоналитет доживює свой розвойни верх у цеку 18. вика кед є виполєни у своєй найчистейшей и ясней форми. У 19. вику його традицийна структура почина буц вше шлєбоднєйша. Пре уплїв других скалових системох (примарно модусох и фолклорно-народних скалох) почина трациц свойо характеристики. У класичней музики траци ше на преходзе 19 и 20. вика, кед композиторе починаю виглєдовац нови алтернативни ришеня як цо ше зявює у атоналносци односно у атоналней музики. Медзитим тоналитет у своєй традицийней форми и далєй присутни у популарних музичних формох/жанрох.

Цо нє тоналитет

Поняце тоналитет погришно заменїц зоз поняцом скала и тонски род.

• Скала ма седем ступнї и осми хтори повторени перши. Скала достава мено спрам першого и остатнього тона хтори истого мена, а єй тони ше поступно шорую по алфабетским шоре.
• Тонски род (дур, мол, молдур).

Шицки три поняца тонского рода у музики муша ше розликовац и приказани су у шлїдуюцей табели:

	7♭	6♭	5♭	4♭	3♭	2♭	1♭	0 ♭/ $\sharp$	1 $\sharp$	2 $\sharp$	3 $\sharp$	4 $\sharp$	5 $\sharp$	6 $\sharp$	7 $\sharp$
Дур	Ces	Ges	Des	As	Es	B	F	C	G	D	A	E	H	Fis	Cis
Мол	as	es	b	f	c	g	d	a	e	h	fis	cis	gis	dis	ais

Параметри за утвердзованє тоналитетох

Звучни приклад подполней автетнтичней каденци (каденца то законченє композициї або єй єдней часци).

Тоналитет даєдней мелодиї ше утврдзує на основи:

♦ Подполней автентичней каденци (IV-V-I ступень) у C-duru хтора закончує и твори заокружену музичну думку (приклад на правим боку).

♦ Пред'знакох хтори ше находза после ключа (стаємни лєбо пред'знаки зоз ключом aбо „арматура”). односно, тоналитети ше розликую по числу пред'знакох.

♦ Предзнакох хотри ше находза опрез нотох у композициї.

♦ Закончуюцих тонох - каденца (опатриц приклад на правим боку).

♦ Зявйованє доминатного тона (доминанта)

Подзелєнє тоналитетох

Тоналитети можу буц:

• Зродни - маю вецей заєднїцки скалово тони (маю вецей заєднїцки тони зоз скали). Векше число заєднїцких скалових тонох даваю векше зродство медзи двома тоналитетами, и процивно.

• Нєзродни – нє маю заєднїцки скалово тони.

Литература

• Tonalitet, Enciklopedijski leksikon Mozaik znanja – Muzička umetnost. Beograd, Interpres, 1972.
• Živković, Mirjana. 2001. Harmonija za II razred srednje škole. Beograd, Zavod za udžbenike i nastavna sredstva.
• Риман Г. Упрощённая гармония или учение о тональных функциях аккордов. Перевод с нем. Ю.Энгеля. М.-Лейпциг, 1896.
• Лебедев, С. Н. (2008). Прототональность в музыке западноевропейского Средневековья и Возрождения. Ad musicum (російська) . Москва: 33-47.
• Рети Рудольф Tonality, atonality, pantonality: A study of some trends in twentieth century music. London, 1958; 2-я издание под названием: Tonality in modern music. New York, 1962 (в рус. переводе: Тональность в современной музыке. Л.: Музыка, 1968).
• Rameau, Jean-Philippe. 1722. Traité de l’harmonie réduite à ses principes naturels. Paris, Balard.
• Riemann, Hugo. 1918. Allgemeine Musiklehre (Handbuch der Musik). Leipzig: Max Hesses Verlag.

Вонкашня вяза

• TONALITET - pojmovnik muzičke teorije pojmovnik.sdmt.rs
• Despić, Dejan. 2002. Harmonija sa harmonskom analizom. Beograd: Zavod za udžbenike i nastavna sredstva.
• Холопов, Тоналность Архивирано 29 грудня 2012 у Wayback Machine