Томислав Регак
| Томислав Регак | |
|---|---|
 | |
| Особни информациї | |
| Датум народзеня | 6. децембра 1943. |
| Датум упокоєня | 25. децембра 2025 (82) |
| Поховани | у Руским Керестуре |
| Позиция у тиме | ґолман |
| Спорт | Фодбал |
| Державянство | югославянске, сербске |
| Припознаня | Припознанє з нагоди 100-рочнїци ФК Русин |
Томислав Регак (*6. децембер 1943-†25. децембер 2025), фодбалер, ґолман и тренер ФК Русин, та длугорочни церковнїк катедралней церкви св. Миколая.
Томислав Регак народзени на Миколая 6. децембра 1943. року.
Основну школу Томислав закончел у родним валалє а потим закончел и ремесло, Томислав бул виучени шлосер, а остатнї 18 роки до пензионованя робел у Друкарнї Руске слово у Руским Керестуре.
Спортска кариєра
[ушориц | ушор жридло]У младосци Томислав Регак бул активни у младежскей организациї, а у ФК Русин фодбал почал бавиц од 1956. року у пионирох, вец за перши тим дзе бул перше ґолман, вец бавел на месце кридла та бул и ґолґетер. Перши ґолман Русина постал 1961. року, а найлєпше бранєл кед ше Русин намагал войсц до Бачкей лиґи. Року 1971. пошол бранїц до Лалитю до ФК Панония, до Русину ше врацел 1974. и одпитуюце змаганє одбавел 1977. року.
Томислав Регак положел испит за тренера з медзинародну лиценцу, та тренирал и пионирох и першотимцох Русина, а фодбалску кариєру закончел 1986. року. На Скупштини Спортского дружтва Русин 2001. року вибрани є за почесного члена. З нагоди 100-рочнїци ФК Русин 2023. року Томислав Регак достал припознанє.
Вєдно зоз супругу Марию були и столнотенисере, а у узретих рокох и активни рекреативци бо 30 роки у школскей сали водзели рекреацию окреме за жени и хлопох.
Церковнїк и дзвонар
[ушориц | ушор жридло]За члена Церковного одбору керестурскей парохиї Томислав Регак вибрани 1999. року, а од 2003. прилапел ше и длужносци церковнїка и дзвонара катедралней церкви св. о. Миколая. Окончовал ю вецей як 21 рок. Службовал у чаше трох парохох, а єдного и поховал, на вельких и нєкаждодньових историйних подїйох од снованя нашого Еґзархату, а вец и Епархиї, рижних рочнїцох Церкви и Водици кед приходзели визначни госци, з цалого швета, випровадзаня трох наших владикох, Сеґедия и Гербута котри були поховани у церкви, а кед умар владика Славомир Микловш и шицки пейцме су премесцени до новей крипти под катедралу. За шицко тото требало буц знаходлїви, точни и окончовац шицко з вельку дзеку и любову. А праве так то робел и Томислав Регак.
Томислав Регак за собу охабел супругу Марию з котру пожили 62 роки у малженстве, и синох Желька и Златка зоз фамелиями.
Томислав Регак ше упокоєл на перши дзень Крачуна, 25. децембра 2025. року. у 82 року живота. Поховани є на теметове у Руским Керестуре.
Вонкашнї вязи
[ушориц | ушор жридло]- М. Афич, Вчера поховани Томислав Регак (1943–2025), Рутенпрес, 29. децембер 2025. року
- Мария Афич, Подзековни за живот у злагоди и скромносци, новини Руске слово, www.ruskeslovo.com, 12. новембер 2023.
- Мария Афич, Петро, Дюра, Микола, Михал и Яни поволую на молитву, новини Руске слово, www.ruskeslovo.com, 13. октобер 2019.