Теоґония

Теоґония зоз XVI вику

Теоґония (греч. Θεογονία) Гесиодов митолоґийни еп написани у 1022 гексаметрох. Теоґония у прекладзе значи наставанє божествох, а попри Гомеровей Одисеї и Илияди, Теоґония найстарше жридло греческей митолиґиї.

Теоґония перша греческа митолоґина синтеза хтора розправя о наставаню швета и родослове богох и хтора толкує походзенє богох. Гесиод у своїм епу пробує афирмовац Зевса хтори зоз побиду над титанами постал найвисше и найвекше божество - всемогущи чувар правди и справедлївосци.

Тот еп синтеза велького числа греческих традицийох о богох, хтора приповеда як настали и як запровадзели тирвацу контролу над космосом.

Теоґония

Увод до Теоґониї

Гесиод на самим початку епу описал як го нащивели музи док чувал свойо стадо на Геликону, у велькей молги. Музи го наведли же би писал и у нїм зобудзели писателя, як и же вони тоти цо го оквицели з ловоровим венцом - венцом слави и успиху.

У своїм другим епу Роботи и днї вон спомина тото збуванє и то под час побиди на змаганю поетох. Як побиднїк у поезиї, Гесиод за награду достал троножни котел, хтори пошвецел музом зоз Геликону. У тим епу, Гесиод почина даяку файту литературней полемики, понеже на алеґорийни способ напада писательох того часу хтори пишу нєпрвди.

"Бешеда музох то часто нєправда под привидом правди, медзитим дзекеди єст и правди, и то гевтей правей."

Змист Теоґониї

Теоґония почина зоз Космоґонию, приповедками о наставаню вселени и шицкого цо иснує.

На самим початку, Гесиод пише же пановал Гаос. Гесиод нїґдзе нє спомина одкаль настал Гаос, алє дакус познєйше бешедує як настали Жем и Ерос хтори, по нїм, настали сами од себе, понеже су нїодкаль и нї од кого нє створени. После Жеми и Еросу, зоз Гаосу перше настали Ереб або Цмота и Ноц, а зоз їх вязи народзени Етер - чисти воздух - и Дзень. После того настало и народзело ше шицко друге:

• Потомки Ноци
• Потомки Урана и Ґаиї
• Потомки Моря

Титаномахия найвозвисшенша часц у епу Теоґония. Ту Гесиод описує як Зевс победзує Хрона и титанох, и на яки способ вон постава верховни - найвисши гречески бог. Гесиод, за розлику од Гомера, богох описал воздзвигуюцо, надлюдски, а вони у Гомерових дїлох подобни людзом.

Гесиод у Теоґониї историю подзелєл на:

• Златни час
• Стриберни час
• Бронзови час
• Желєзни час
• Час юнакох

По Гесиодовим думаню, вон жил у желєзним чаше, а тот желєзни час, по його думаню, тирва и нєшка.

Вон о желєзним чаше пише як о найгоршим, найподлєйшим чаше, чаше у хторим шицко зло швета вишло на шветло дня - чаше Пандоровей шкатули.

Конєц епу Теоґония припада наяви нового епу - писнї хтора требала буц шпиванє о женох цо як любовнїци богом народзели геройох, славне потомство. Можлїве же ше праве прето, и тей наяви у Гесиодовей Теоґониї, писня Каталоґ женох приписує йому.

Каталоґ женох мал пейц кнїжки у чиїм змисту було вельке число митолоґийних приповедкох. Приповедки були зоз скоро шицких крайох Греческей.

Вонкашнї вязи

• Хесиод, Теогонија Архивиране на веб-сайту Wayback Machine (5. децембер 2007)
• Hesiod, Теогонија (язик: гречески)
• Хесиод, Теогонија (язик: англиски)