Тартар (митолоґия)

Тартар (греч. Τάρταρος [Tártaros]) глїбока прирва хтору ше хаснує як цемнїцу трапези и мученя злих и як гарешт за титанох. Тартар место дзе ше судзи душом по шмерци и дзе зли доставаю божу кару. Тартар ше тиж трима за примордиялну силу або божество, вєдно зоз ентитетами як цо то жем, ноц и час.

Греческа митология

У греческей митологиї Тартар источашнє и божество и место у под'жемю. У старих орфичних жридлох и у школох мистериї, Тартар тиж нєогранїчене перше єство зоз хторого ше народзели шветлосц и вселена.

Божество

Гесиод у своєй Теоґониї бешедує же Тартар бул треце першебутне божество, после Гаоса и Ґаї (Жем) и предходного Еросу, и бул оцец, зоз Ґаию, чудовиска Тифона. По Гиґинийови, Тартар бул потомок Етра и Ґаї.

Место

Цо ше дотика места, Гесиод твердзи же бронзове ковадло хторе пада зоз раю, будзе падац дзевец днї пред тим як спаднє на жем. Ковадлу би требало ище дзевец днї же би спадло зоз жеми до Тартару. У Илияди (коло 700. п.н.е.) Зевс визначує же Тартар "тельо попод Гада, кельо нєбо понад жеми". Подобне тому, митоґраф Аполодор описує Тартар як "нєлагодне место у Гаду тельо оддалєне од жеми, кельо жем оддалєна од нєба." Гоч по греческей митолоґиї царство Гада место мертвих, Тартар тиж ма даскельо бивательох. Кед Хрон пришол на власц як краль титанох, загарештовал єднооких киклопох и сторуки Гекатонхири до Тартару и поставел чудовиско Кампу як чувара. Зевс забил Кампу и пущел загарештованих дивох же би му помогли у його зраженю з титанами. Богове Олимпу на концу триюмфовали. Хрон и велї други титанє вигнати до Тартару, гоч Прометей, Епиметей и Метида посановани (по Пиндарови, Хрон после даяк достал пребаченє од Зевса и пущени є зоз Тартару же би пановал з Елисею). Ище єден титан, Атлас, осудзени тримац нєбо на своїх плєцох же би нє могол предлужиц свойо першебутнe облапянє зоз Жему. И други богове могли буц осудзени на Тартар. Аполон добри приклад, гоч го Зевс вишлєбодзел. Гекатонхири постали стражаре Тартарових зараброваних. Познєйше, кед Зевс победзел чудовиско Тифона, руцел го до "широкого Тартару".

Бивателє

На початку ше Тартар хасновало лєм за огранїчованє опасносцох за богох Олимпу. У познєйшей митолоґиї, Тартар постал простор пошвецени гарештом и трапезом смертельних хтори согришели процив богох, а кажда кара була єдинствена за осудзеного. Наприклад:

• Краль Сизиф послати до Тартару пре забиванє госцох и путнїкох у своїм каштелю, потупююци свойо госцопримство, зводзаци свою родзину и даваюци звит о єдним спомедзи Зевсових сексуалних освойованьох, кед гварел ричному богови Асопови дзе ше находзи його дзивка Еґина (хтора одведзена далєко од Зевса). Алє, без огляду на нєпримераносц Зевсових частих освойованьох, Сизиф прекорачел гранїци тримаюци же є єднаки зоз богами хтори зоз правом можу давац звити о своїх нєщиросцох. Кед Зевс розказал Танатосови най завяже Сизифа зоз ланцами до Тартару, Сизиф го спревед питаюци му ше же як робя ланци и на концу завязал Танатоса; як резултат того вецей нє було шмерци. То нагнало Ареса же би ошлєбодзел Танатоса и придал му Сизифа. Дакус познєйше, Персефона го послала на поверхносц же би зрадзел свою жену бо го нє поховала як спада. Гермес на силу одцагнул Сизифа до Тартару кед ше вон после того нє сцел врациц до под'жемного швета. У Тартару, Сизиф бул примушени котуляц вельке стебло по горскей схили, хторе ше, кед би лєм цо нє сцигнул на верх, одкотуляло од Сизифа назад на початок и так нєпреривно. Тото представляло Сизифову кару бо твердзел же його мудросц надвисшела Зевсову, цо нагнало бога же би ше древо одкотуляло од Сизифа и завязало го на вичну фрустрацию.
• Краль Тантал тиж закончел у Татару кед порезал свойого сина Пелопа, уварел го и послужел як єдзенє кед бул поволани полудньовац зоз богами. Тиж так украднул амброзию од богох и виприповедал свойому народу їх тайни. Друга приповедка спомина же тримал златного пса хтори Гефест фалсификовал, а хторого украднул Танталусов пайташ Пандареус. Тантал тримал златного пса, а после го нє дал Пандареусови. Танталусова кара за його дїла (єст присловка "спокуса без задовольства") була стац у барки з воду под овоцовим древком зоз нїзкима конарами. Вше кед ше нацагнул за овоцу, вода би ше поцагла скорей як цо би ше могол напиц. Прейґ глави му ше видзвиговал грожаци камень як Сизифов.
• Иксион бул краль Лапитох, найстаршого Тесалийового племена. Иксион мержел свойого швекра и на концу го дрилєл до посцелї од угля и лєса, та з тим зробел перше забойство у родзинстве. Принцове зоз других жемох розказали же би ше Иксионови одбило очисценє од грихох. Зевс посановал Иксиона и поволал го на госцину на Олимп. Алє кед Иксион збачел Геру, залюбел ше до нєй и гласкал ю под столом док му Зевс нє гварел най престанє. Кед пренашол место за спанє Иксионови, Зевс створел клон як замену Гери по мену Нефела же би го тестирал як далєко думал исц же би заведол Геру. Иксион водзел любов зоз ню, цо резултовало зоз народзеньом Кентаура, хтори ше на гори Пелион спарел зоз маґнезийскима кобулами и так порушал расу Кентаурох (хтори ше од свойого порходзеня волаю Иксиониди). Зевс одвезол Иксиона з гори Олимп, а потим го вдерел зоз громом. Бул покарни зоз вязаньом на огньове колєсо хторе ше вше обрацало: перше на нєбе, а вец у Тартару. Аж кед Орфей зишол до под'жемя виратовац Еуридику, престало ше колєсо обрацац пре музику хтору Орфей грал. Привязани за огньове колєсо, Иксион представял його горуцу жажду.

• У даєдних верзийох, Данаиди позабивали своїх мужох и покарани су у Тартару на таки способ же були примушени ношиц воду у дзбану же би наполнєли кадзу и на таки способ умили свойо грихи. Алє кадза була цала попукана, та вода вше вичурела.
• Див Титос пробовал силовац Лету по Геровим розказу, алє го забили Аполон и Артемида. За кару, Титос бул розцагнути у Тартару и трапели го два супи хтори ше кармели зоз його печинку. Тота кара барз подобна кари титанови Прометейови.
• Спомина ше и же краль Саломоней бул зарабровани у Тартару потим кед ше представел як Зевс, цо нагнало правого Зевса же би го вдедрел зоз громом.

По Платонови (коло 427. року пред нову еру) Радамант, Еак и Миной, судийове мертвих, виберали хто би пошол до Тартару. Радамант судзел азийским душом, Еак судзел европским душом, а Миной бул одлучуюци глас и судия Греческей.

Платон тиж так предложел концепт дзе гришни руцани под жем же би були покарани у складзе зоз своїма грихами у Миту о Ерови.

Римска митолоґия

У римскей митолоґиї Тартар место дзе посилани гришни - пекло. Верґилиє у своєй Енеїди описує як огромне место окружене зоз огньову рику Флеґетон и тройнїстима мурами хтори нє дошлєбодзую гришим сцекнуц. Чува го гидра зоз 50 чарнима рознятима писками хтора шедзи при дзверох цо вреща защицени зоз слупами з твардого адамантину, подобне дияманту, хтори таки тварди же го нїч нє може пребиц. Нука каштель зоз широкима мурами и високу желєзну турню. Тизифона, єдна з Еринийох хтора представя вимсценє, чува стражу зоз батогом на верху тей турнї и нїґда нє шпи. У штредку глїбока дзира дзе на дну змесцени титанє и други гришни.

Опатриц:

•Список греческих божествох

Литература

• Хезиод: Теогонија (116.)
• Хомер: Одисеја (XI. књига, 576.)
• Вергилије: Енејида (VI. књига, 539. - 627.)

Вонкашнї вязи

• Под'жемє и загробни живот у греческей митолоґиї (язик: англиски)