Прейдз на змист

Тамбурашска традиция при Руснацох у Войводини

Додай вязи
Материял зоз Википедиї

Тамбура то традицийни войводянски инструмент. Походзи зоз Блїзкого востоку, а тамбуроподобни инструменти исновали ище у Старим Єгипту. До тих крайох ю принєсли Турки ище у XIV вику.

Звук на тамбури настава зоз потаргованьом струнох. Тамбури ше розликую по велькосци и форми. Велькосц инструмента повязана зоз його звучаньом и обсягом тонох котри може одграц. Так, на приклад, примка ма високи звук, бас прим кус нїзши, а бас найнїзши. Водзаца мелодия найчастейше зверена прим тамбуром, бас прим тамбуром, контра найчастейше грає акордову потримовку, а бас твори основу, фундамент звучаня.

Зявйованє тамбурох у Руским Керестуре

[ушориц | ушор жридло]

Здогадованя найстарших керестурских музичарох потвердзую податок же ше тамбури як музични инструмент у Руским Керестуре зявели дзешка по Першей шветовей войни. Трицетих рокох двацетого вику у Керестуре грали три "банди" – ґрупи. То були Яковово гудаци, Горняково гудаци и Дюра Циґан (Йованович) зоз своїм дружтвом. Кус познєйше ше зявели Ґовльово гудаци, Хомичково гудаци, Кирданци. Шицки тоти ґрупи грали до 60-их рокох 20. вику, Кирданци дакус длужей, по 80-ти роки. У составе були пейцме музичаре: гушля, два бас прими, контра и бас. Заєднїцке им же у составе окрем тамбурох була гушля (виолина). Тамбура прим ше першираз зявела даскельо роки по законченю Другей шветовей войни, и то при Кирданцох. Кажда "банда" мала свойого предняка – главного у ґрупи.

Тамбури постали водзаци музични инструменти при Руснацох

[ушориц | ушор жридло]

Тамбурашски состави при Руснацох нєшка исную у Руским Керестуре, Дюрдьове, Новим Орахове, Вербаше, Коцуре и Шиду. У тих оркестрох граю як самоуки музичаре, так и тоти цо здобули музичне образованє. Од можлївосцох оркестрантох завиши и способ як вежбаю и граю – чи по слуху, а чи зоз нотох, по розписаним аранжману. Репертоар тих составох творя преважно руски народни и авторски писнї, музика за хореоґрафиї, старогородски писнї, музику за танєц и подобне. Оркестри з векшим числом членох, як у Руским Керестуре и Дюрдьове тиж виводза и зложенши дїла. Без огляду на музичну приготовку и число членох, тото цо заєднїцке шицким составом то вельки ентузиязем, любов ґу музики и уживанє у заєднїцким музикованю.

Оркестер у Руским Керестуре составени преважно зоз тамбурох – прим єден, прим два, бас прим єден, бас прим два, е-бас прим, контра, чело, тамбурашски бас, помоцнєти з гармониками, виолинами, кларинетом. Од свойого снованя 60-их рокох по нєшка оркестер мал рижни назви: Вельки народни оркестер, Оркестер Дому култури Руски Керестур, Тамбурашски оркестер. Нєшка ноши назву Народни оркестер Юлиян Рамач-Чамо, на чесц покойного руководителя Юлияна Рамача-Чаму, котри дал вельке доприношенє у унапредзеню квалитету оркестра и котри написал вельочислени оркестрово аранжмани.

Визначни руководителє спомнутих оркестрох були Ириней Тимко, Витомир Бодянец, Михал Бодянец, Михал Лїкар, Юлиян Рамач-Чамо, мґр Мирко Преґун.

Анеґдота

Слово "банда", котре ше скорей хасновало место нєшкайшого бенд, ґрупа може значиц и преступнїцка, криминална ґрупа. Ниа, єдна анеґдота о тим як може настац велька бриґа пре замишательство зоз розличнима значенями слова банда.

Були Горняково гудаци грац у Петровцох на Кирбай. А там уж грали гудаци з єдного сушедного валалу. Горняк ше питал їх преднякови: – Одакле је ваша банда? – Даћу ја теби "банду"! Ви сте банда! – и пошол ґу своїм гудацом. Гевти поставали, побрали празни фляши до рукох и рушели ше биц Горнякову "банду". А Горняканци нє чекали, алє позберали свойо инструменти и на криста-крижом, през оранїни, на гайзибан до Вуковару!

Вонкашнї вяза

[ушориц | ушор жридло]
Превьате зоз "https://rsk.wikipedia.org/w/index.php?title=Тамбурашска_традиция_при_Руснацох_у_Войводини&oldid=9727"