Тамбураше, тамбурашска пракса
Тамбураше, як цо и тамбурашска пракса од 2021. року припознати як часц нєматериялного културного нашлїдства Републики Сербиї. Тота пракса часц модерней (сучасней) традициї, алє є ту уж досц длуго присутна, же би постала и була часц културного нєматериялного нашлїдства. [1]
Поняце ,,тамбурашство“
[ушориц | ушор жридло]Тамбурашство то ґрупне гранє/музикованє на инструментох на хторих ше тон достава зоз потаргованьом струнох и припада традициї модерного часу приблїжно остатнї два вики. То углавним тамбури рижних типох штимованя и велькосцох. Тамбурашство заступене на териториї Сербиї, а поготов на териториї Войводини. Тамбураше першенствено граю на инструменту хтори ше вола тамбура,[2] алє ше зоз ню комбиную хаснуюци и други инструменти тей ґрупи: прим (бисерница), а-басприм (а-брач), е-басприм (е-брач), тамбурашске виолончело (чело), контра (буґария), тамбурашки бас т. є. беґеш, стояце тамбурашске виолончело (киш-беґеш).
Найчастейше до нєдавна ше схопносц и знанє граня преношело аматерски у кругу фамелиї лєбо КУД-ох. Концом прешлого вику велї Основни музични школи уводза музичну педаґошку наставу за инструменти зоз ґрупи тамбурох. Школяре хтори солидно музично образовани, часто наставяю школованє и ученє граня на тамбури у штреднїх музичних школох и поставаю фаховци за тамбуру, хтори ше намагаю очувац традицию граня у рижних музичних установох. З тим же на своїх школярох преноша фахове знанє з обласци граня на тамбури.
Тамбурашски ансамбли
[ушориц | ушор жридло]Тамбураше найчастейше граю у менших составох т. є. у бандох лєбо ансамблох-ґрупох (до осем музичарох) и менших оркестрох (максимално до петнац музичарох). Можу буц и векши состави, вельки оркестри од шеснац и вецей музичарох институционализованих формацийох новшого часу. У тамбурашских оркестрох стретаме и други инструменти як цо то гармоника, цимбал лєбо виолина (гушля).[3]
Репертоар
[ушориц | ушор жридло]Репертоар тамбурашох першенствено творя вокално-инструментални писнї традиционалней и старогородскей музики. Тиж так ту припадаю и авторски писнї компоновани за тамбурово оркестри, и писнї рижних жанрох хтори обробени. Тамбурашска пракса рижнородна, та так можу наступац самостойно лєбо як велька вокално-инструментална формация-ансамбл. Найчастейше сами виводзаче (гудаци) и шпиваю. Случує ше же наступаю и як инструментална ґрупа а тиж и як подполне вокалне провадзенє шпивачови. З другого боку оркестри найчастейше виводза лєм виключно инструменталну музику. Тамбура прим, тамбура басприм и тамбурашске чело забераю значну улогу у таких оркестрох.
Зоз меньшима составами руководзи примаш (член составу хтори грає на прим-тамбурки) док зоз вельким тамбуровим оркестром руководзи дириґент. Векши состав зоз векшим числох тамбурох твори тамбуров оркестер хтори ма концертну улогу и маю на репертоару зложенши композициї. То часто ориґинални авторски композициї компоновани за тамбуров оркестер, лєбо обробки и аранжмани познатих шветових композицийох и признатих композиторох итд.
Актуална тамбурашска пракса
[ушориц | ушор жридло]Тамбурашска пракса ше найчастейше вяже за Войводину, алє є присутна и у других реґионох Сербиї (Крагуєвац, Шабац, Београд, Панчево). Тиж и у Новим Пазару на фестивалу санджачких севдалинкох (FESS) попри шпивачох, наступаю и тамбуробво оркестри зоз околних местох. Постої и змагательна часц фестивала на хторей побиднїки доставаю златни, бронзови, стриберни саз. (Саз то инструмент зоз ґрупи тамбурох босанско-герцеґовацкого реґиона)
После того як Национални комитет за нєматериялне културне нашлїдство Сербиї припознал и зазначел тамбурашску праксу до Националного реґистру нєматериялного културного нашлїдства Републики Сербиї, тамбурашска творчосц поготову уметнїцка, постала вельо значнєйша и припознатша на наших просторох.
Тамбурка фест (Tamburica fest) [4] то тамбурашски фестивал хтори ше од 2008. року отримує на Площи шлєбоди у Новим Садзе.
Циль фестивала афирмованє тамбурашскей музики, инструмента тамбури и єй традициї, сотруднїцства и приятельства уметнїкох-тамбурашох. На фестивалу участвую оркестри зоз велїх других державох и Р. Сербиї. Фестивал тирва даскельо днї зоз рижнима змистами културно-уметнїцких дружтвох а остатнї дзень одредзени за змаганє виводзачох.
Од 2012. року фестивал ше отримує на Петроварадинскей твердинї, а 2013. року у рамикох фестивала основана Шветова тамбурашска орґанизация, здруженє шицких тамбурашох швета хторому шедзиско у Новим Садзе.
Вонкашня вяза
[ушориц | ушор жридло]- МУЗЕЈ ТАМБУРИЦА ФЕСТА - НОВИ САД vojvodina.trevel
- У Новом Саду почео светски Тамбурица фест ЈМУ - Радио, rtv.rs
Референци
[ушориц | ушор жридло]- ↑ Тамбураше, тамбурашска пракса www.nkns.rs.
- ↑ Тамбура Појмовник - Eтнографски институт САНУ.
- ↑ Тамбурашка пракса уписана до Националного регистру нєматериялного културного нашлїдства gradskeinfo.rs.
- ↑ O festivalu - Tamburica fest tamburicafest.com