Суши
Суши (японски 寿司，鮨，鮓，すし) традиционалне японске єдло пририхтане з вареней рискаши до хторей додати есенц (鮨飯, sushi-meshi). Типично ше ище додава присмачки як цо соль и цукер и комбинує ше зоз велїма состойками, як цо то морски плоди, желєнява и месо; найчастейше є зоз сировима морскима плодами, алє даєдни плоди мож и вариц. Гоч суши ма велї стили и презентациї, терашнї дефинуюци состойок то рискаша з есенцом, тиж так позната як шари (しゃり) або сумеши (酢飯).
Вери ше же модерну фурму сушию обдумал Ханая Йохеи, хтори обдумал ниґири-зуши, найпознатши тип нєшка, у хторим ше морски плоди кладзе и прицишнє ручно на поесенцовану рискашу. Тота иновация настала коло 1824. року у Едо периодзе (1603-1867). То було швидке костиранє т.є. фест-фуд чонин класи у Едо периодзе.
Суши ше традиционално прави зоз билу рискашу штреднєй велькосци зарна, гоч го мож рихтац зоз доганову або зоз рискашу краткого зарна. Найчастейше ше го пририхтує зоз морскима плодами, як цо то лиґня, єґуля, жовтопирка, лосос, туна або имитация меса краби (сурими). Одредзени файти сушию веґетариянски. Суши ше часто послугує зоз квашеним дюмбиром (ґари), васабийом (японски хрин) и сойову мачанку. Даикон ретхвочка або квашени даикон (такуан) популарни прикраски и присмачки ґу єдзеню.
Суши ше дзекеди погришно миша зоз сашимийом;: то єдло хторе ше состої зоз ценко нарезаней швижей риби або дакеди и меса, без суши рискаши. Нєшка ше суши трима за єдно з найпопуларнєйших єдлох на швеце.
Етмолоґия
[ушориц | ушор жридло]Слово суши (寿司; すし) приходзи зоз Японского Кандїя 鮨.
Бонтон
[ушориц | ушор жридло]За розлику од сашимию, хтори ше скоро вше є з палїчками, ниґири-зуши ше традиционално є зоз пальцами, та и у формалних нагодох. Гоч ше углавним послугує на малим танєрчку зоз додатним танєрчком за мачанє, суши мож порихтац и як бенто (мала шкатулка зоз оддзелькми до хторих ше єдло роздзелює).
Сойова мачанка найчастейша присмачка, та ше прето суши часто послугує зоз малим танєрчком за мачанку або окремним оддзелєньом у бенто шкатулки хторе наменєне за мачанку. Традиционални бонтон гвари же ше лєм горня часц сушию мача же би ше присмаковало; рискаша хтора уж достаточно присмакована з есенцом, солю, цукром, мирином и комбу алґу би вельо абсорбовала сойовей мачанки и розпадла би ше.
Традиционално, суши шеф дода одвитуюце количество васабию до сушию док го пририхтує и конзумер би нє требал додавац ище. Медзитим, нєшка количество васабию остава на особним смакованю, та аж и ресторани у Японє можу послуговац васаби у додатним танєрку купцови на особне досмакованє, гоч ше васаби уж находзи у єдлу.