Суботица

Суботица
Панорама Суботици
Городска хижа	Райлх палата
Будинок банки	Народни театер
Православна церква	Римокатолїцка церква
Застава Суботици	Герб
Админстративни податки
Держава Автономна покраїна Управни округ Варош Стари назви	Сербия Войводина Сивернобачки Суботица Zabatka, Szabadka Maria-Theresiopel
Жительство
- 2022. - густосц Аґломерация (2022.)	88.752 306,04 ст./km2 жит./km² 123.952
Ґеоґрафски характеристики
Координати Часова зона Aбс. висина Поверхносц	46° 06′ 00″ С; 19° 39′ 49″ И UTC+1 (CET), влєце UTC+2 (CEST) 82 m 48,4 km²
Суботица на мапи Сербиї
Инши податки
Городоначелнїк Поштово число Поволанкове число Реґистерска ознака	Стеван Бакић (СНС) 24000 024 SU
Вебсайт
www.subotica.ls.gov.rs

Суботица – (серб. Суботица або Subotica, мадь. Szabadka, бунь. Subatica) варош и административни центер Сивернобачкого округу у Автономней покраїни Войводини, Сербия. Язики хтори ше службено хаснує у суботицкей општини то сербски, мадярски, горватски и бунєвацки.

Суботица други найвекши варош у Покраїни после Нового Саду. Змесцени є блїзко при гранїци зоз Мадярску (коло 10 км). Нєшка општина Суботица зоз околнима местами – валалами ма коло 150.000 жительох. Варош повязани зоз старим лєтовалїщом и озером Палич.

История

Утвердзене же людзе на тим просторе жили ище пред три тисячи роками. Найстарши археолоґийни находзиска на ширшей териториї Суботици походза зоз побережя озера Лудаш, а датирую ище зоз периоду остатнього лядового часу. Медзитим, блїзко при варошу єст находзиска и зоз периоду неолиту, як и бакарного и бронзового часу.

Одредзене число находзискох гутори и о присутносци Скитох, Ґотох, Дачанох, Гунох и Аварох на тих просторох.

Суботица ше у писаних документох першираз спомина под час угорскей управи 7. мая 1391, алє сиґурно же место старше.

Турки Османлийове завжали Суботицу 1542. року и пановали над ню по 1686. рок, кед Суботица постала часц Габзбурґскей монархиї.

По уходзе до Габзбурґскей монархиї, Суботица уключена до габзбурґскей Воєней гранїци. По розвояченю тей часци Воєней країни коло половки 18.вику, Суботица постава часц Бачко-бодроґскей жупаниї у габзбурґскей Угорскей.

Суботица була у составе окремней габзбурґскей кральовини Войводства Сербиї и Тамишского Банату, медзи 1849. и 1860. роком. У тим чаше, у строго централизованей системи, повага ше тиж пошвецовала и култури. Ту 1853. року вибудовани театер, як и велї квартовски школи.

Мено варошу ше през историю часто меняло. Найстарше познате писане мено варошу було Забатка 1391. року. Найхарактеристичнєйши мена були Szent-Maria, Maria-Theresiopolis, Maria-Theresienstadt, Szabadka и Subotica. Царица Мария Терезия преглашела Суботицу 1779. за шлєбодни кральовски варош, мено Maria Тheresiopolis и од того року ше варош почал подшвидшено розвивац. Суботица 1918. року вошла до составу Кральовини Сербох, Горватох и Словенцох.

Ґеоґрафия

Положенє

Сиверно од варошу находзи ше писковина зоз плоднима овоцнїками и винїцами на южних часцох, а на плодней жеми чарнїци ше розвило польодїлство.

Варош змесцени у Панонскей нїжини и ма длугоку традицию и културне нашлїдство.

Блїзко при варошу и приключенє на автодрагу Е-75 хтора Суботицу повязує зоз Мадярску на сиверу и Южну Европу прейґ Беоґраду на югу. Тиж так, Суботица гайзибански повязана зоз цалу Европу.

Клима

У климатским поглядзе, тото подруче ма характеристики континенталней клими (отвореносц ґу Панонскей нїжини): оштри жими, цепли лєта и нєстабилносц паданьох по количестве и часовим розпорядку. Штредня температура воздуху виноши 11,4 °C, релативна влажносц воздуху – 69%, число дижджовних дньох – 105, зоз шнїговим покривачом – 59, зоз моцним витром прейґ 6 бофори – 104, воздушни прицисок 1007,0 мб, паданя – 491,3 mm.[5]

Жем

Окремни тип жеми представя писок – писковити жеми хтори зявюю у локалним поясу Суботица – Горґош (Суботицко–горґошска писковина), а дакус писку єст и при Таванкуту. Тот ше писок познати по двох прикметох: карбонантни є, з поверхносци ма вельку способносц акумулациї води (влажни є на релативно малей глїбини аж и влєце). Тота друга прикмета то же писок барз добри за продукованє висококвалитетней овоци и грозна, потим за индустрийну паприґу (на чарним писку), як и лєсово древа (баґрен, сосна).

Розвой привреди

Суботица ше до модерного штредньоевропского варошу розвила при концу XIX и на початку XX вику. За нєполни два децениї, єдней у XIX и єдней у XX вику, варош дожил окремне урбане, индустрийне, будовательне и културне напредованє. Швидше розвиванє ремеслох, индустриї и тарґовини порушане ище 1869. року зоз приходом швидкого гайзибану, а подшвидшене зоз вибудову електричней централи 1896. и трамвайским транспортом 1897. року. Зачатки нєшкайшей модерней индустриї находзиме при концу 20. вику: подприємство за вивоз меса Гартман и Конен и першу хладзальню у держави, першу суботицку фабрику сумпорней квашнїни и штучного гною Клотилд хтора основана 1904, браца Руф 1917. почали продукованє бомбонох, индустрия електричних моторох Сивер основана 1923.

Потим 1918. року Суботица страцела часц жеми пре нове розгранїченє, а векшина остатку жеми залапена зоз аґрарну реформу. По 1938. рок вибудовани 3.500 нови будинки у вредносци од 300 милиони динари, направени Заградов варош на драги ґу Паличу зоз 400 хижами. Вибудовани дзевец католїцки церкви и штири основни школи на вонкашнєй териториї, Ґинеколоґийни павильон варошского шпиталю, єврейски шпиталь, стадион Краля Петра Другого (1936), а Роботнїцки дом справени 1938.

По Другей шветовей войни Суботица постава часц Автономней покраїни Войводини, у рамикох новей социялистичней Сербиї и новей социялистичней Югославиї.

Култура и образованє

Перша штредня школа, предходнїк ґимназиї, отворена у Суботици 1747, музична школа 1868, дом за старих 1766, Палич постава лїчилїще 1845, перша друкарня основана 1844, перши новини вишли 1848, першу биоскопску представу ту приказал Андєло Бянки зоз Печую 1899, а Александар Лифка отворел перши стаємни биоскоп 1919. Дюра Стантич освоєл першу олимпийну медалю у Атини 1896, а Иван Сарич полєцел на авиону власней конструкциї 1910. року.

У Суботици ше находза 15 основни и 10 штреднї школи, а тиж єст и 7 висши школи и факултети.^[1]

Варошска читальня

Суботица єдна з найстарших установох култури у варошу. Основана є 1892. року на инициятиву Иштвана Иванїя (Iványi István, 1845 − 1917) хтори бул снователь и перши библиотекар Варошскей читальнї, а тиж и писатель велькей моноґрафиї Историят Шлєбодного кральовского варошу. У Библиотеки єст коло 400.000 моноґрафски, т.є. 6.000 рочнїки периодичних публикацийох и другого библиотекарского материялу.

Руснаци у Суботици

Суботица позната як мултикултурни штредок у хторим жию и робя велї национални меншини, та и Руснаци. Дружтво Руснацох у Суботици основане 2001. року пре пестованє, популаризованє и очуванє руского язика, литератури и култури Руснацох у Суботици. Медзи велїма значнима проєктами и активносцами Дружтва, єдно з найзначнєйших то факултативне виучованє руского язика з елементами националней култури як виборного предмету за дзеци предшколского возросту у ОШ Соня Маринкович и културна манифестация Яр Мафтея Виная. Др Мафтей Винай (1898-1981) бул єден з руских преднякох хтори положел фундаменти рускей литературней творчосци. Бул доктор правних наукох, судия, учитель, поета и писатель. Єдну часц роботного и животного вику препровадзел у Суботици, дзе и умар и дзе є поховани

Памятнїки

Каплїчка Св. Рока

Каплїчка Св. Рока у Суботици направена 1738. року и ма статус памятнїка велького значеня. Каплїчка пошвецена С. Рокови, защитнїкови од чуми хтора пустошела того року и однєсла велї животи.

Жовта хижа

Жовта хижа у Суботици то дакедишнї будинок Шпоровнї Народней банки. Правена є у периодзе од 1880. по 1883. рок и представя памятнїк култури од велького значеня.

Будинок направени по проєкту суботицкого архитекти Титуса Мачковича, як єдноповерхови неоренесансни будинок. Будинок вязани за вецей историйни збуваня зоз Другей шветовей войни. У нїм теди було шедзиско Специялней полициї мадярского войска, гарешт и мучилїще.

Нєшка ше у тим будинку находзи Учительски факултет на мадярским язику.

Други значни памятнїки у Суботици

Памятнїк царови Йованови Ненадови, Памятнїк погинутим борцом и жертвом фашизму, Гайзибанска станїца Палич, Палата Лазара Мамужича, Димитриєвичова хижа, Будинок СДК , Галброр хижа, Войнич палата, Манойлович палата, Готел Адолфа Галброра, памятнїк Матийови Корвинови, Лайошови Вермешови, Иванови Саричови, Деже Костоланьови, Святому Тройству, Александрови Лифкови, Єврейска општина, нєпознатому водоинсталатерови.

Релиґия

На цалим административним подручу варошу Суботица 2011. року були заступени шлїдуюци вирски ґрупи: римокатолїцка (57,60%), православна (27,79%), протестанска (1,68%) и други. Суботица центер Римокатолїцкей бискупиї у Бачкей реґиї. Варош Суботица ма найвецей католїкох у Сербиї: 57,60% жительох варошу католїки. Литурґийни язики хтори ше хаснує у католїцких церквох то найчастейше мадярски и горватски. Єст осем католїцки церкви, Францискански духовни центер, женска доминиканска заєднїца и два ґрупи авґустинских шестрох. Суботицка бискупия єдина цо ма Католїцку штредню школу у Сербиї (Paulinum). У Варошу жиє и значне число припаднїкох Сербскей православней церкви (27,79%). Од других хтистиянских заєднїцох єст два протестантски церкви, точнєйше: Лутеранска и Калвинистична. Суботицка Єврейска заєднїца треца по велькосци у Сербиї.

Архитектура

Суботица ше може похвалїц зоз над'звичайну колекцию сецесийней архитектури, хтора уключує окремни будинки як цо то Варошска хижа, Суботицка синаґоґа або Райхл палата (палата Ференца Райхла), хтори препознати як єдни з найкрасших прикладох того архитектонского стилу у Европи.

Знаменїтосци

Варошска хижа (направена 1908-1910) и Синаґоґа (1902) окреме красни будинки у стилу сецесиї. Вибудовали их исти архитекти: Марсел Комор и Деже Якаб.^[2]

Демоґрафия

У населєню Суботица жию 80.722 полнолїтни жителє, а штредня старосц жительства виноши 39,7 роки (37,8 при хлопох и 41,4 при женох). У населєню єст 3.7543, обисца, а штреднє число членох у обисцу 2,64. Жительство у тим населєню барз нєгомоґене.

Демоґрафия
Рок	Жительох
1948.	63.048
1953.	66.057
1961.	74.999
1971.	88.769
1981.	100.472
1991.	100.386
2002.	99.981
2011.	97.910
2022.	88.752

Етнїчни состав Суботици зоз Паличом спрам попису зоз 2011.
Мадяре	34.511	32,66%
Серби	31.558	29,86%
Горвати	9.698	9,18%
Бунєвци	9.236	8,74%
Югославянє	2.728	2,58%
Роми	2.586	2,45%
Чарногорци	1.210	1,14%
Македонци	439	0,42%
Албанци	334	0,32%
Муслиманє	301	0,28%
Бошняки	203	0,19%
Нємци	199	0,19%
Руснаци	159	0,15%
Словенци	151	0,14%
Ґоранци	151	0,14%
Словаци	137	0,13%
Руси	75	0,07%
Болгаре	66	0,06%
Румунє	58	0,05%
Українци	40	0,04%
Чехи	16	0,01%
Нєпознате	563	0,53%
Вєдно	105.681	100%

Познати Суботичанє

• Иґнят Станимирович, ректор и єден з перших професорох беоґрадского Лицею (першей висшей школи у Сербиї).

• Аксентиє Мародич, академски маляр

• Иштван Иванї, историчар и археолоґ, снователь Варошскей библиотеки

• Др Йован Милекич, 1930. року снователь приватного Музею, Читальнї и Ґалериї у Суботици, ґенерални директор Польопривредней банки

• Кароль Биро, бувши городоначальнїк и инициятор вибудови новей городскей хижи

• Иван Сарич, всестрани спортиста и єден з найзначнєйших пионирох югославянского воздухоплївства

• Дюро Стантич, освоєл златну медалю у атлетики на Олимпийнох медзибавискох 1906. року.

• Александар Лифка, кинематоґраф

• Деже Костоланї, писатель, новинар, публициста и прекладатель

Тибор Секель, шветови путнїк, ґеоґраф, новинар, музеолоґ, есперантиста, писатель

• Ласло Сабадош, освойовач олимпийней бронзовей медалї

• Йован Микич Спартак, атлетичар и югославянски рекордер

• Александар Дьордєвич, режисер

• Вилим Гаранґозо, шветови шампион у столним тенису

• Тихомир Оґнянов, фодбалер и освойовач стриберней олимпийней медалї

• Лука Липошинович, фодбалер и освойовач стриберней оломпийней медалї

• Ласло Секереш, археолоґ и музеолоґ. Скоро 40 роки препровадзел у Варошским музею у Суботици як кустос археолоґ, алє и як директор (1960-1967)

• Данило Киш, писатель и дописни член САНУ

• Ґабор Саґмайстер, моторкаш и мотокрос змагатель

• Ева Рас, ґлумица и писателька

• Петар Лалович, режисер

• Еуґен Вебер, ґлумец, новинар, прекладатель, юдаїста

• Корнелиє Ковач, композитор, пияниста и аранжер

• Сретен Дамянович, шветови шампион у пасованю

• Момир Петкович, олимпийни шампион у пасованю • Рефик Мемишевич, освойовач стриберней медалї у пасованю

• Зоран Калинич, шветови шампион у столним тенису

• Рита Кинка, пиянистка

• Дюла Мештер, олимпийни шампион у одбойки

• Бояна Радулович, найлєпша рукометашка на швеце 2000. и 2003.року • Антония Панда, освойовачка бронзових медальох на Шветовим и Европским першенстве у каяку

• Петер Леко, шахиста, 1994. року постава наймладши велемйстор у историї шаху

• Давор Штефанек, шветови шампион у пасованю • Ненад Бедїк, европски шампион у весланю

• Саня Малаґурски, европска шампионка у одбойки

• Никола Калинич, кошаркаш, шветови вицешампион

Ґалерия

Райхл палата
Будинок народного театра
Єврейска синаґоґа
Будинок ґимназиї Светозар Маркович
Райхл палата
Будинок народного театра
Городска фонтана
Библиотека вароша
Єврейска синаґоґа
Будинок ґимназиї Светозар Маркович
Студентски дом Иво Лола Рибар
Технїцка школа Иван Сарич
ОШ Иван Ґоран Ковачич
Памятнїк жертвом фашизму
Нукашньосц Городскей хижи
Войчина палата

Литература

• Ивић, Алекса (1914). Историја Срба у Угарској од пада Смедерева до сеобе под Чарнојевићем (1459—1690). Загреб. • Ивић, Алекса (1929). Историја Срба у Војводини од најстаријих времена до оснивања потиско-поморишке границе (1703). Нови Сад: Матица српска.

• Поповић, Душан Ј. (1952). Срби у Бачкој до краја осамнаестог века: Историја насеља и становништва. Београд: Научна књига.

• Поповић, Душан Ј. (1957). Срби у Војводини. књ. 1: Од најстаријих времена до Карловачког мира 1699. Нови Сад: Матица српска.

• Поповић, Душан Ј. (1959). Срби у Војводини. књ. 2: Од Карловачког мира 1699 до Темишварског сабора 1790. Нови Сад: Матица српска.

• Поповић, Душан Ј. (1963). Срби у Војводини. књ. 3: Оо Темишварског сабора 1790 до Благовештенског сабора 1861. Нови Сад: Матица српска.

Вонкашнї вязи

Урядови веб-сайт
https://bolnicasubotica.com/ Болница у Суботици
https://www.suteatar.org/ Народно позориште Суботица

Референци

↑ „Образовне установе у Суботици”. Архивирано из оригинала 07. 06. 2007. г. Приступљено 14. 4. 2013. оригинала]
↑ Знаменитости Суботице”. Архивирано из оригинала 15. 07. 2007. г. Приступљено 14. 4. 2013.

[1] „Образовне установе у Суботици”. Архивирано из оригинала 07. 06. 2007. г. Приступљено 14. 4. 2013. оригинала]

[2] Знаменитости Суботице”. Архивирано из оригинала 15. 07. 2007. г. Приступљено 14. 4. 2013.

[1]

[2]