Служебнїк
Служебнїк єдна з найважнєйших богослужебних кнїжкох. Урядова назва служебнїка то Литурґикон. То кнїжка за священослужительох — священїка и диякона, и вєдно зоз Требнїком творя Евхолоґий, а то значи же ше у тих двох кнїжкох находза шицки богослуженя, пошвецаня, обряди и благослови церковни цо людзом потребни.
Змист служебнїка
[ушориц | ушор жридло]У служебнїку ше находза углавним нєпременлїви богослужебни тексти вечурнї, повечерия и полноцнїци, утринї, литурґиї, розлични чини, мешацослов, и як додаток: прокимени, алилуяриї, причасни и уводни стихи триоди воскресни и дньово.
Кед у питаню вечурня, вец у служебнїку заступени чини малей, велькей, каждодньовей вечурнї, вечурня сиропустного тижня и святей велькей штерацецдньовици, вечурня Велького пиятку, вечурня Нєдзелї Пасхи и цалого Шветлого тижня.
Кед у питаню утриня, у служебнїку облапена утриня нєдзельна и шветова, чин утринї каждодньовей, чин утринї сиропусного тижня и Святей велькей штерацецдньовици, утриня святей Велькей нєдзелї Пасхи.
Окрем тих чинох, ту змесцени и други рижни чини: чин благословеня колїва (вереного жита), молитви за благословенє багнїткох, молитви на благословенє артоса (пасхалного хлєба) и други.
Службенїк ма, окрем молитвених текстох, и упутствени тексти о тим як ше окончує дотичне богослуженє з оглядом на молитвени текст, церемонию або богослужебне облєчиво. Тоти упутства нє детальни, так же ше муши похасновац и други богослужебни инструкциї.
Епископ нє хаснує служебнїк хтори хасную священїки и диякони. Служебнїк за епископа ше вола архоератикон, а точнєйше архиератикон або служебнїк святительски.
Епископ под нормалнима условиями нє служи утриню, вечурню, повечериє, полноцнїцу и часи. Вон на тих богослуженьох присуствує и на одредзени способ и участвує так же дава благослови, виходзи на литию, виходзи на „Полиєлей”, чита одредзени евангелиї.
У архиератикону перше змесцени три литурґиї: литурґия Йоана Златоустого, литурґия Василия Велького и служби преждеосвящених зоз специялнима архиєрийскима додатками. А потим шлїдза и: чин поставеня швичкара, читача и шпивача, чин хтори ше одправя за поставенє поддиякона, диякона, єрея (паноца)...
Служебнїк на старославянски язик преложели св. Кирил и Методий, а у новших часох ше служебнїк преклада на живи народни язики.
Литература
[ушориц | ушор жридло]- Дзвони, християнски часопис, май 2004.
- о. др Роман Миз, Церковно литурґойно литурґични лексикон, бок 275.