Симеон Рамач
| Симеон Рамач | |
|---|---|
 | |
| Народзени | 18. новембра 1937. |
| Умар | 15. юния 2015 (78) |
| Державянство | югославянске, сербске |
| Язик творох | руски, сербски |
| Школа | |
| Универзитет | Економски факултет, Беоґрад |
| Период твореня | 1961-2005 |
| Жанри | привреда, дружтвена дїялносц, подобова уметносц |
| Поховани | На дюрдьовским грекокатолїцким теметове |
| Припознаня | |
Симеон Рамач (18. новембер 1937 – 15. юний 2015), економиста, привреднїк, руководитель привредних подприємствох, явни и дружтвени роботнїк, алє и уметнїк-маляр.
Биоґрафия
[ушориц | ушор жридло]Симеон Рамач народзени 18. новембра 1937. року у Дюрдьове. Оцец Владимир и мац Леона родз. Мудри. Симеон мал два шестри, Юстину и Веруну. По законченей основней и штреднєй школи, Симеон ше уписал на студиї малярства у Заґребе. После першого року студийох малярства Симеон прешол на Економски факултет до Беоґраду, дзе дипломовал 1961. року и бул єден з наших перших фаховцох у тей обласци. У своїм фаху почал робиц як шеф рахунководства у єдним подприємстве у Тузли, у Босни и Герцеґовини, потим прешол до Кули, а од 1965. року ма замерковане место у привредним живоце Руского Керестура, кед пришол за директора тедишнєй Землєдїлскей задруґи Перши май.
Симеон Рамач бул оженєти зоз Веруну, учительку. У малженстве мали дзивку Лидию и сина Бориса.
Привредна и дружтвено-политична активносц
[ушориц | ушор жридло]Указал ше як винїмково способни привреднїк хтори, зєдинююци даскельо менши валалски привредни субєкти у Руским Керестуре, створел реґионално визначни Польопривредно-поживови комбинат Перши май 1970. року.
Од 1971. по 1974. рок Рамач робел як помоцнїк, односно заменїк директора Польопривредно-поживового комбинату Кула и Индустрийно-польопривредного комбинату Вербас, хтори були теди лєм цо основани и у рокох своєй орґанизацийней и дїловней консолидациї.
Од 1974. по 1978. рок Симо Рамач бул член Вивершней ради Войводини (тедишнєй покраїнскей влади) и покраїнски секретар за тарґовище и цени, а од 1978. по 1982. рок робел у делеґациї САП Войводини у Ради републикох и покраїнох у Скупштини СФР Югославиї на, за Войводину, барз значних питаньох тарґовища и ценох. Тих рокох Симеон Рамач, кельо познате, як єдини Руснак у историї Руснацох на тих просторох, участвовал на зашеданю Ґенералней скупштини Зєдинєних нацийох у Нюйорку, у делеґациї СФРЮ.
Од 1982. по 1985. рок, у чаше вше векших проблемох зоз задлуженосцу жеми и вше векшого нєдостатку девизних средствох за обезпечованє увозу робох од еґзистенциялного значеня за цалу державу, Рамач робел на окреме чувствительним месце секретара Самоуправней интересней заєднїци за економски одношеня з иножемством САП Войводини, так же прейґ його рукох ишол и приєм и дистрибуция девизних средствох за потреби цалей привреди Войводини.
Од 1985. року Симеон Рамач по други раз пришол за директора ПК Перши май у Руским Керестуре, допринєсол його кадровей консолидациї, руководзел зоз вибудову залївней системи на 360 гектарох и после двох рокох пошол до Металки до Марибору у Словениї, а робел и у других подприємствох. Початком 90-их рокох знова робел у Керестуре, тераз як директор ЗЗ Русин, познєйше Кооператива, хтора теди настала з видвойованьом задружного маєтку з ПК Перши май, дзе бул кратши час и 1995. року пошол до пензиї.
Симеон Рамач спада до найвизначнєйших руских и войводянских фаховцох у економиї и привреди. Намагал ше осучаснїц польопривредну продукцию у валалє у шицких обласцох, робел з парастами-кооперантами, ище теди векши ґрупи кооперантох водзел на фахово едукованя до Словениї так же, насампредз у Руским Керестуре, кед ше спомнє Перши май, велїм вон асоцияция и на Симеона Рамача.
Маляр аматер
[ушориц | ушор жридло]Попри у привреди, Симеон Рамач останє запаметани и у подобовим живoце Руснацох чому ше пошвецел од младосци, а окреме у рокох после пензионованя. Вон бул маляр-уметнїк а визначел ше окреме у мальованю пейзажох. Остали за нїм числени роботи, мал два самостойни вистави у Руским Керестуре (2000) и Новим Садзе (2001) и вецей колективни вистави, а велї роботи подаровал до наших местох, до установох, институцийох и орґанизацийох. Заступени є у моноґрафиї Подобова творчосци Руснацох у виданю Дружтва за руски язик, литературу и културу, на боку 101 зоз малюнком Каркасон, варош-твердиня.
Симеон Рамач умар 15. юния 2015, поховани є на теметове у його родним Дюрдьове.
Ґалерия
[ушориц | ушор жридло]-
Коркасон, варош-твердиня
Литература
[ушориц | ушор жридло]- Тамаш, др Юлиян, „Прегляд орґанизованя задруґох и комбинатох у Руским Керестуре (1945-1991) ˮ, Руски Керестур, лїтопис и история (1745-1991), Месна заєднїца Руски Керестур, 1992, бок 389.
- Ґрупа авторох, „Симеон Рамач, маляр аматерˮ, Подобова творчосц Руснацох, - Дружтво за руски язик, литературу и културу, Нови Сад, 2003, б. 101.
Вонкашнї вязи
[ушориц | ушор жридло]- Симеон Рамач. НАР, Руски вертикали. nar.org.rs/rue/, новембер 27, 2023
- Умар Симеон Симо Рамач (18.11.1937-15.06.2015). мкт/зам, Рутенпрес, www.ruskeslovo.com, 16. юний 2015