Силвестер Пушкаш
| Силвестер Пушкаш | |
|---|---|
 | |
| Датум народзеня | 1948. |
| Датум упокоєня | 30. марец 2013 (65) |
| Державянство | югославянске, сербске |
| Школа | Штредна тарґовецка школа, Вербас |
| Период твореня | 1970 - 2012. |
| Жанри | малярство |
| Поховани | у Коцуре |
Силвестер Пушкаш (*1948 - †2013) - руски маляр аматер.
Биоґрафия
[ушориц | ушор жридло]Силвестер Пушкаш ше народзел 1948. року у Коцуре. Оцец Кирил и мац. Основну школу Силвестер закончел у родним валалє а Штредню тарґовецку школу у Вербаше и робел у фаху до конца роботного вика.
З малярством Силвестер Пушкаш ше почал занїмац од найвчаснєйших рокох, як нашлїднїк оцового таланту, хтори нашлїдзела и його шестра, академска малярка Серафина. У своїм уметнїцким опусу часто хасновал етно мотиви вязани за Руснацох у Коцуре. Участвовал на Подобових колонийох у Коцуре и Руским Керестуре. Силвестер свойо роботи викладал на вецей самостойних и колективних виставох у Коцуре, Вербаше, Новим Садзе и индзей.
Понеже бул щири вирнїк, велї роботи охабел коцурскей, алє и другим нашим парохийом, омальовал криж на штред валала и пред коцурску руску церкву, намальовал портрети коцурских священїкох (од 1838 по 2001. рок) и портрети священїкох других наших парохийох.
Силвестер Пушкаш достал вецей награди за свойо уметнїцки витворена. Медзи його сакралнима дїлами видвоює ше вельки малюнок Кресценє народу Києвскей Руси на Днїпру хтора украшує парохиялну салу у Коцуре, а и реплика истей у церковней сали грекокатолїцкей церкви у Сримскей Митровици.
Од 2012. року Силвестер Пушкаш почал обнавяц малюнки на мурох коцурскей грекокатолїцкей церкви, закончел ошвижованє Свадзби у Кани Галилейскей, алє му хорота нє дала предлужиц. З Пушкашового малярского нашлїдства окреме замерковани веристични малюнки мертвей природи, як и пейзажи з коцурского хотара. Його творче нашлїдство приклад велького авторового таланту як у сензибилним, так и у ремеселнїцким приступу и виразу. За Силвестером Пушкашом остали велї малюнки котри украшую обисца по валалє, алє и ширцом Европи та аж и прейґ океану.
Силвестер Пушкаш умар 30. марца 2013. року. Поховани є на Грекокатолїцким теметове у Коцуре.
Ґалерия
[ушориц | ушор жридло]Литература
[ушориц | ушор жридло]- Ґрупа авторох, „Силвестер Пушкаш, маляр аматерˮ, Подобова творчосц Руснацох, Дружтво за руски язик, литературу и културу, Нови Сад, 2003, б. 97.
- Ґрупа авторох, „Силвестер (Кирил) Пушкаш /Силвестер Пушкашˮ, Русини/Руснаци/Ruthenians 1745-2005, Филозофски факултет, одсек за русинистику, КПД ДОК, Куцура, Прометеј 2006, с. 386.