Серафина Макаї
| Серафина Макаї | |
|---|---|
 | |
| Назвиско | Сея |
| Датум народзеня | 21. септембра 1945. |
| Датум упокоєня | 7. януара 2026 (81) |
| Державянство | югославянске, сербске |
| Язик творох | руски, сербски |
| Школа | ґимназия, Вербас |
| Универзитет | Висша педаґоґийна школа, Зренянин |
| Период твореня | 1974—2022. |
| Жанри | литература, подобова уметносц, образованє |
| Поховани | у Коцуре |
| Припознаня | Октоберска награда општини Вербас (1999) |
Серафина Макаї (*21. септембер 1945— †7. януар 2026), писателька и поетеса за дзеци, подобова уметнїца и наставнїца сербского и руского язика.
Биоґрафия
[ушориц | ушор жридло]Серафина Макаї, дзивоцке Буила, народзена 21. септембра 1945. року. Оцец Кирил и мац Наталия родз. Яким. Серафина мала брата Любомира. Основну школу закончела у Коцуре, ґимназию у Вербаше а Висшу педаґоґийну школу у Зренянину на ґрупи за сербски язик и литератури.
Робела як библиотекарка у Читальнї у Коцуре осем роки, кратко у Стреднєй школи у Вербаше дзе тримала пестованє руского язика, а потим Серафина Макаї робела як наставнїца сербского и руского язика и литератури у Основней школи Братство єдинство у Коцуре по одход до пензиї.
У швеце литератури
[ушориц | ушор жридло]Як библиотекарка перша написала историю коцурскей Читальнї од снованя, а по валалє поглєдала и покупела стари руски кнїжки. У коцурскей школи велї роки водзела литературну секцию, а сотрудзовала и зоз часописами за дзеци и участвовала зоз школярами на литературних конкурсох. Достала и числени припознаня и награди. Тиж, сотрудзовала вєдно зоз школярами зоз телевизию и радийом, дзе єй зняти вецей ТВ и радийски емисиї.
Серафина Макайова писала од вчасней младосци, за младши и старши дзеци поезию и прозу, драми за дзеци, як и монодрами. Обявени єй вецей кнїжки за дзеци – Фестивал животиньох, Вчера сом ше ошацовал, Бавме ше на бини, Вера циркус правелї и други. Єй твори обявени и у числених зборнїкох и антолоґийох, як наприклад у антолоґиї дзецинскей поезиї Хмара на верху тополї (Руске слово, 1984).
Написала осем монодрами за Фестивал монодрами у Новим Садзе. Два монодрами зняти за ТВ Нови Сад а єдна и наградзена. Два монодрами єй преложени на словацки язик и були виводзени на бини у Новим Садзе и Пиньвиц.
Написала и велї гумористични тексти, та за Радио Вербас зняла седемнац гумористични приповедки у сериї Нина Йоска Коцурова. Даєдни з тих приповедкох обявени и у часпису за Руснацох виселєнцох Руснаци у швеце.
Швет подобовей уметносци
[ушориц | ушор жридло]Серафина Макаї ше витворела и як подобова уметнїца аматерка. Вошла до тайнох мальованя на склу (подобова технїка олєй на склу). Самостойни вистави мала у Коцуре, Новим Садзе, Вербаше, Кули а у Руским Керестуре мала заєднїцку виставу зоз свою дзивку Наташу Макаї Мудрох. Участвовала на заєднїцких виставох у Зомборе, Зренянину, Кикинди, Сримскей Митровици, Деспотове, Ґосподїнцох, Шидзе, Петровцох и других. Була учащнїк вецей подобових колонийох: у Ґосподїнцох (Стретнуце у Боднарова), Шидзе (Руски двор) у Петровоцх и Сримскей Митровици.
Вєдно зоз супругом Силвестером, визначним подобовим педаґоґом и уметнїком, и дзецми сином Ромком и дзивку Наташу прикрашела мури амбулантох у Коцуре и Старим Вербаше.
Велї роки була у редакцийним колеґиюме часопису за дзеци Заградка и сотруднїк Рускей редакциї Заводу за видаванє учебнїкох у Ноцим Садзе за хтору преложела вецей учебнїки и кнїжки. Тиж так, Серафина Макаї була главна и одвичательна редакторка часопису Ерато над Куцуром/Коцуром, а тиж и редактор Зборнїку писньох коцурских поетох Дуга над валалом.
Намагала ше збогацовац змист и роботу Дружтва за руски язик, литературу и културу, чий член була од 1974. року. Була член Предсидательства Дружтва за руски язик, литературу и културу як и Подружнїци/Секциї Дружтва у Коцуре.
Серафина Макаї достала вецей припознаня а єдно з нїх и Октоберска награда општини Вербас (1999). Була член Дружтва писательох Войводини, член Литературней секциї у Коцуре и член Дружтва подобових уметнїкох аматерох у Вербаше.
После длугшей хороти Серафина Макаї ше упокоєла 7. януара 2026. року. Похована є на теметове у Коцуре.
Тексти за композициї наменєни дзецом Серафина Макаї почала писац 1983. року и виводзело ше их, преважно, на манифестациї Червене пупче, за композициї у народним духу написала вецей тексти и два за композициї у забавним духу.
| ТЕКСТИ ПИСНЬОХ | ||
|---|---|---|
| У народним духу | ||
Рок
|
Наслов писнї
|
Автор музики
|
| 1994. | Гварели за нас (Р заградка) | Любомир Загорянски |
| 1998. | Заграй, гудаку | Любомир Загорянски |
| 2001. | Млада руска андя (Рз.) | Юлиян Рамач |
| 2002. | Руски коренї | Юлиян Рамач-Чамо |
| 2007. | Ґдовец и ґдовичка | Самуел Медведь |
| 2024 | Ша ми хлапци руснаци (Рз.) | Юрий Судї |
У забавним духу
| ||
Рок
|
Наслов писнї
|
Автор музики
|
| 2001. | Саша | Любомир Загорянски |
| 2024 | Запрагнєм я шарґи до каруци | Юрий Судї |
| Червене пупче | ||
| 1983. | Годзина | Витомир Бодянец |
| 1983. | Жима | Витомир Бодянец |
| 1983. | Коминяр
(майстор Петро коминяр) |
Витомир Бодянец |
| 1984. | Гунцутко | Витомир Бодянец |
| 1986. | Моя муниция | Тат’яна Каменїцки |
| 1987. | Маляр | Тат’яна Каменїцки |
| 1988. | Дохтор на бициґли | Дубравко Слободянац |
| 1994. | Купанє | Любомир Загорянски |
| 1996. | Жадам | Любомир Загорянски |
| 1997. | Перша любов | Любомир Загорянски |
| 1998. | Моя школа | Юлиян Рамач-Чамо |
| 2004. | Каролина | Самуел Медведь |
| 2004. | Амрели | Мирон Сивч |
| 2006. | Алє веє | Мирослав Пап |
| 2007. | Яр, яр, яр, | Маґдалена Г. Лелас |
| 2012 | Сотруднїцство | Маґдалена Г. Лелас |
| 2012 | Кед я нє мам | Самуел Медведь |
| 2025 | Дарунок | Юрий Судї |
Литература
[ушориц | ушор жридло]- Ирина Папуґа: Серафина Макаї – наставнїца руского язика и литератури, Studia Ruthenica, Дружтво за руски язик, литературу и културу, ч. 11, 2006, б. 147-148,
- Андреи Даждиу: Ружова заградка 1990-2007, Нови Сад 2008.
Вонкашнї вязи
[ушориц | ушор жридло]- Серафина Макаї – Седемдзешат роки од народзеня (1945), Studia Ruthenica, Дружтво за руски язик, литературу и културу, ч.22, 2017, б. 181.
- Серафина Макаї, (биоґрафия и список композицийох), Червена ружа 1962-2011, Том II, Завод за културу войводянских Руснацох, Нови Сад, 2014, б. 512.
- Алм, Представени уметнїцки леґат Силвестера и Серафини Макаї, Рутенпрес, www.ruskeslovo.com, 17. новембер 2017.
- Тах, Програма на чесц 70 рокох Серафини Макаї, Рутенпрес, www.ruskeslovo.com, 2. септембер 2015.
- Ол. Русковски, Упокоєла ше Серафина Макаї (1945–2026), Рутенпрес, www.ruskeslovo.com, 8.януар 2026.