Святослав Надь

Святослав Надь
Назвиско	Святко
Датум народзеня	15. октобра 1928.
Датум упокоєня	30. децембра 2011 (83)
Державянство	югославянске, сербске
Язик творох	руски, сербски
Школа	Ґимназия, Вербас и Нови Сад
Универзитет	Хемийна ґрупа, Природно-математични факултет, Беоґрад, 1955; Технолоґийни факултет, Заґреб, 1961.
Период твореня	1955-1991.
Обласци роботи	Технолоґийни процеси, Защита квалитета водох
Поховани	у Руским Керестуре

Святослав Надь (*15. октобер 1928 - †30. децембер 2011), дипломовани инженєр технолоґиї и дипломовани хемичар, длугорочни активиста у култури и публициста.

Биоґрафия

Святослав Надь народзени 15. октобра 1928. року у Руским Керестуре. Оцец Яким и мац Юла родз. Сивч (Митрова). Святослав мал шестру Гелену и брата Якимa.

Основну школу и нїзши класи ґимназиї Святослав закончел у родним месце, а висши класи ґимназиї у Вербаше и Новим Садзе, дзе матуровал у Мужескей ґимназиї, 1949. року. Паралелно закончел и Штредню музичну школу. Дипломовал на Хемийней ґрупи Природно-математичного факултета у Беоґрадзе, 1955. року, а потим, уж з роботного одношеня, Святослав Надь 1961. року дипломовал и на Технолоґийним факултету у Заґребе.

Святослав Надь бул у малженстве зоз Меланию, родз. Хромиш.

Робел у Фабрики цукру Бачка у Вербаше (1955-1970), а по потреби служби, у школским 1961/1962. року бул директор Технїчней школи за поживову индустрию у Вербаше. У истей школи гонорарно преподавал коло осем роки вецей предмети: нєорґанску и орґанску хемию, технолоґию цукру и технолоґию киснуца. У фабрики цукру Святослав Надь окончовал длужносци шефа лабораториї, шефа технолоґийней служби и технїчного директора (1963-1970).

Святко (долу на право) и його пайташе зоз сушедства

До Нового Саду Святослав Надь прешол 1970. року, дзе перши два роки робел у проєктней орґанизациї Аґроиндустрия, а од 1972-1978. року робел як водопривредни инспектор за защиту квалитета водох у Покраїнским секретарияту за польопривреду и водопривреду. Ту, попри роботи инспектора, Святослав Надь окончовал и вецей длужносци од ширшей значносци: бул член фахових ґрупох и комисийох, як и державних делеґацийох, у билатералним сотруднїцтве зоз Мадярску и Румунию, як експерт за квалитет водох; стаємни член Комисиї за технолоґию без одруткох и хаснованє секундарних сировинох, при Союзним комитету за енерґетику и индустрию; член Югославянскей комисиї за защиту од заґадзованя моря и нукашнїх драгох, як представїнк з АПВ; член Медзирепубличней роботней ґрупи за рику Саву по питаню защити квалитета води.

Союзни комитет за польопривреду и водопривреду меновал Святослава Надя за експерта у составе роботних ґрупох и державних делеґацийох на такволаних Зашеданьох руководительох водопривредних орґанох державох СЕВ (Совит економскей взаємней помоци) и СФРЮ, отримованих у рамикох сотруднїцтва Придунайских и Притиских жемох. Покривал обласц защити квалитета водох и источасно бул прекладатель за росийски язик. Бул и член комисиї котра з мадярску делеґацию розправяла и утвердзовала условия вибудови централи на атомски погон у месту Пакш на Дунаю у Мадярскей.

Од 1978. до 1991. року вон робел у Рафинериї нафти у Новим Садзе на вибудови нових пошореньох, а бул одвичательни инженєр за водопривредни обєкти.

Дїялносц на планє култури

На културно-просвитним полю почал участвовац як 14-рочни омладинєц у театралних фалатох и шпивац у хору у Руским Керестуре, а тота його активносц у хору тирвала вецей як 60 роки.

По преселєню до Нового Саду Святослав Надь ше уключел до роботи Културно-просвитного дружтва Максим Горки (нєшкайши Руски културни центер), дзе бул активни скоро 30 роки. З тима ансамблами госцовал у велїх городох тедишнєй СФРЮ и у иножемстве (Україна, Чехословацка, Италия). Участвовал у преславох рижних ювилейох и бул член рижних одборох и комисийох.

Святослав Надь бул нє лєм читатель новинох Руске слово, алє и сотруднїк од першого числа. Посилал спортски резултати, звити зоз госцованьох културно-уметнїцких дружтвох, писал полемични як и фахово прилоги. После демократичних пременкох у держави, у єдним мандату бул предсидатель Совиту новинох Руске слово.

Святослав Надь по своїх опредзелєньох цалого животa бул прихильни українскей ориєнтациї медзи войводянскима Руснацами.

Попри активносци у култури, Святослав Надь бул и спортиста и коло 10 роки бавел фодбал за першу екипу керестурского Русина, познєйше бавел и столни тенис.

Попри росийского язика, у хаснованю фаховей литератури служел ше и з анґлийским, нємецким и французким язиком. Зазначени є у Енциклопедиї Нового Саду, кнїжка 16, 2001 (с. 169-170).

Святослав Надь умар 30. децембра 2011. року у Новим Садзе. Поховани бул 1. януара 2012. року на теметове у Руским Керестуре.

Ґалерия

• 
  Староста Янко Рац Мишков, дружба Яким Надь Кинчeш, млоди Кирил Рац, дружба Святослав Надь и староста Янко Надь

Литература

• Микола М. Цап, Святослав Надь (1928-2011), новини Руске слово, рок LXVII, ч. 1-2 (3454-3455), Нови Сад, 13. януар 2012, б. 5.

Вонкашнї вязи

• Микола М. Цап, Дипл. инж. Святослав Надь (1928-2011). вебсайт Союзу Руснацох Українцох Сербиї, www.rusuk.org

• Н.С. Стаценко, М.М. Цап, Надь Святослав, Енциклопедія Сучасної України [Електронний ресурс. / редкол. : І. М. Дзюба, А. І. Жуковський, М. Г. Железняк [та ін.] ; НАН України, НТШ. – Київ: Інститут енциклопедичних досліджень НАН України, 2020.

• Душан Попов, Енциклопедија Новог Сада. Кнїжка16, (б. 169-170) Мог-Нев, Издавач Прометеј, вебсајт www.mikroknjiga.rs,