Свен Ґуставсон
| Свен Ґуставсон | |
|---|---|
| (портрет) | |
| Народзени | 1. юния 1938. |
| Умар | 12. фебруара 2012 (74) |
| Державянство | шведске |
| Язик творох | шведски |
| Школа | штредня школа класичного напряму |
| Универзитет | универзитету у Стокголму |
| Период твореня | 1969—2011. |
| Наукови ступень | Ph. D., 1969 |
| Поховани | у Упсали |
| Припознаня | член Шведскей кральовскей академиї за литературу, историю и антику |
Свен Роналд Ґуставсон шв. Sven Ronald Gustavsson (*1. юний 1938—†12. фебруар 2012), шведски линґвиста, слависта, виглєдовач ткв. малих язикох, универзитетски професор.
Биоґрафия
[ушориц | ушор жридло]Свен Ґуставсон народзени 1. юния 1938. року у Еребру у Шведскей як єдно зоз седмерих дзецох у фамелиї. Його оцец бул фармер у валалє Екер, нєдалєко од Еребра. До штреднєй школи ходзел у Еребру и по єй законченю пошол на одслуженє воєного року.
На универзитету у Стокголму студирал нордийски язики, литературу и славянски язики (1957–1961). Постдипломски студиї предлужел у Стокголму, на Оддїлу за славистику у периодзе (1961–1969). У Стокголму 1969. року одбранєл дисертацию под насловом Accent Paradigms of the Present Tensein South Slavonic: Eastand Central South Slavonic и здобул докторат у обласци славистики. Материял за дисертацию призберовал у Горватскей дзе препровадзел даскельо мешаци. Од часох пребуваня у Горватскей сербскогорватски язик и Югославия завжали окремне место у його шерцу и науковей роботи. Потим преширйовал свойо академски интересованя на обласц русийскей синтакси, на литературу у Польскей а, начално, интересованє Свена Ґуставсона за поезию було досц вельке. Вон заступал думанє же кажди линґвиста при пририхтованьох за наукви виглєдованя треба же би добре престудирал поезию конкретного язика бо поезия, по його похопеньох, найвисша форма язика.
Од 1970. року Свен Ґуставсон робел як доцент на Оддїлу за славистику у Стокголму, а 1977. року зоз Стокгому преходзи на место професора на Универзитету у Упсали дзе, попри длужносци професора, окончовал и длужносц управнїка Оддїлу за славистику. Главна обласц його роботи була славистика. Року 2003. Ґуставсон достал званє професора емеритуса на Универзитету у Упсали.
Наукове виглєдованє бешеди бачко-сримских Руснацох
[ушориц | ушор жридло]Ґуставсоново интересовнє за язики националних меншинх у Югославиї було велїчезне. Його наукова робота значна и пре факт же вон перши шведскей явносци приблїжел сознаня о Русинох/Руснацох. Уж 1970. року Свен Ґуставсон ше зявел як єден з перших заходних линґвистох хтори преучовали язик Руснацох у Войводини. Вон бешеду бачко-сримских Руснацох дефиновал як окремну славянску ентоязичну єдинку и барз почитовал „намаганя цалого руского етносу же би зачувал власну народносну самосвидомосц.ˮ
Розпадованє Югославиї го барз потрафело, пробовал на рижни способи помогнуц тим хторих були жертви того процесу.
Його принципиєлни приступ у виглєдованю язика вимагал же би ше язик спатрало у контексту култури, релиґиї и историйно-политичних условийох у хторих ше тот язик розвивал. Наглашовал же то окреме значне кед слово о такволаних „малихˮ односно меншинских язикох.
У периодзе од 1969. по 2009. рок Свен Ґуставсон обявел понад 160 наслови (моноґрафиї, статї, антолоґиї, словнїки, преклади) на шведским, анґлийским, русийским, болгарским, сербским, горватским, русинским, нємецким и польским язику.
Свен Ґуставсон бул член Шведскей кральовскей академиї за литературу, историю и антику.
Свен Роналд Ґуставсон умар у Упсали 12. фебруара 2013. року.
Литература
[ушориц | ушор жридло]- Др Свен Ґуставсон: Руски язик у Югославиї – дияхрония и синхрония, Творчосц ч. 9, 1983, б. 20
- Paul Robert Magocsi. Gustavsson, Sven. in Paul Robert Magocsi, Ivan Pop. //Encyclopedia of Rusyn History and Culture (Revised and expanded ed.). Toronto Buffalo London: University of Toronto Press, 2005. p. 154. doi:10.3138/9781442674431. ISBN 0-8020-3566-3.англ.
Вонкашнї жридла
[ушориц | ушор жридло]- Ulla Birgegård. Sven Gustavsson 1 June 1938 – 12 February 2013. // Scando-Slavica 59:2, 2013. pp. 264–265. doi:10.1080/00806765.2013.855475.англ.
- My Svensson and Olga Klauber. Forty Years of Slavic Studies: Sven Gustavsson’s Bibliography[ (PDF). Department of Modern Languages, Uppsala University.англ.
- Данијел Ристић. СВЕН ГУСТАВСОН (1938–2013). Филолошки факултет Универзитета у Београду. .
- др Свен Ґуставсон, РУСКИ ЯЗИК У ЮГОСЛАВИІ — ДИЯХРОНИЯ И СИНХРОНИЯ, вебсайт Руснаци у Панониї, https://rdsa.tripod.com/, Oct. 25/1998