Салса

Салса танєц

Салса (шпан. salsa) то кубански танєц хори ше танцує по парох, танєц африцкого походзеня, хтори часц велїх модерних латиноамерицких танцох.

Салса то єдна зоз файтох танцованя - файта танцу. Слово „салса“ на шпанским язику значи „мачанка“, а настало у Нюйорку у нєдостатку терминох за нови танци хтори ше зявели у тим городу. Термин „салса“ ше хасновал за цали спектер розличних карибских танцох: румбу, сон монтуно, мамбо, ча-ча, данзон, плену, бомбу, меренґе итд. Познєйше ше тот вираз хасновал за нови танєц, хтори нєшка познати як „салса.“

Историят

Постоя вельо верзиї о тим як салса настала, алє шицки музиколоґове маю констатацию и складаю ше у тим же: родоначалнїк салси то кубански сон - ритем хтори настал на Куби концом 19. вику.

Пообщене, афро-кубанска музика, ґу хотрей припада салса, ма свою интересантну историю, прето же настала як резултат симбиози двох културох - европскей (шпанско-арабскей) и африцкей. Треба ше здогаднуц же напр. афро-кубанска музика нашлїдзела струново инструменти, мелодию и поетску форму од Шпанцох, а од африцких рабох (углавним потомкох племена Банту, Йоруба и Караґала) - буґни и рижни удерни инструменти, способ подзелєня шпивачох и хору и окремни стил виводзеня у хторим хор (естрибильо) даскельо раз повторйовал автохтони часци.

1928. року композитор кубанєц Иґнацио Пинєиро вигварел слова „Echale salsita!“ („Додайме дакус салси - огня!“) и так створел наслов своєй новей писнї. Пошвидко тота фраза трансформована єдноставно до „салса“, а истоменови танєц постал барз популарни.

Рижни стили и ритми

Основни крочаї танцу Салса

По початок 1970-их, слово „салса“ означовало мишанїну рижних латиноамерицких стилох и ритмох, уключуюци ґварачу, ча-ча-ча, пачанґу, румбу, мамбу и велї други. Єдноставне слово постало защитни знак латиноамерицкей танєчней музики. Познєйше, провадзаци музику, настал и танєц.

До салси уключени елементи рижних танцох и стилох зоз Карибох (Куба, Порторико, Гаити, Доминиканска Република) и сушедних жемох Централней и Южней Америки (Мексико, Венецуела, Колумбия). Даєдни рухи салси пожичени од традицийних танцох, а даєдни наисце нови и специфични.

Исную велї стили салси: кубански, порторикански, колумбийски, Нюйоркски, Л. А. и други.

Танцованє салси

За розлику од стандардних танцох, у салси нєт вельо рушаня у просторе, а людзе часто сами танцую.

Хореоґрафски крочаї у салси

Cалса ше танцує зоз музику составену зоз осем тактох у 4/4 розмири, хтори подзелєни на два часци по штири такти. Зоз тих штирох тактох, у салси ше хасную звичайно три такти, а єден такт твори павза. Медзитим, на тот єден такт мож одтанцовац теп, кик итд. Музика звичайно подрозумює компликованши и швидки ритем хтори приноша удерни инструменти и хтори приказую и творя зложени ритмични образци комбинациї тумбо и сон-клаве ритмох.

Характер салси

Характер салси, очиглядно, у єй главним крочаю. Настава зоз нєвельким рушаньом горнєй часци цела зоз наглашеньом руху на ноги и клуби. Рухи ногох винїмково значни прето же даваю характеристични рух у пасу и клубох (благи рухи на лїво и на право) у тaнцованю салси.

Простор за танцованє салси

Салса ше танцує, такповесц, вшадзи: у клубох, на розвагох, на отвореним просторе у паркох, площох або директно на авенийох. Салсу мож танцовац без огляду на роки, танєчне искуство и физичну порихтаносц. У велїх державох ше отримую велї змаганя у танцованю салси.

Стили салси

Модерна (2020-их рокох) салса подзелєна на 2 главни типи, хтори маю добре познати подфайти:

▶ „Кружна“ салса, чийо подфайти:

– Кубанска салса (позната и як казино);

– Колумбийска салса;

– Доминиканска або венецуелска салса.

▶ „Линеарна“ салса (тиж позната як салса у крос-боди стилу), чийо стили Лос Андєлес, Лондон, Нюйорк, Порторико итд.

Значне мено за розвой салси то Доминиканєц Джони Пачеко (шп. Johny Pacheco) хтори формовал свою дискографску хижу 1964. року у хторей успишно промововал латино-музику. Други значни музичаре за розвой салси то: Карлос Сантана, Тито Пуенте, Буена Виста и велї други познати и менєй познати.

Вонкашнї вязи

• Музыка и танец, Сальса (Sals 23 травня 2008 у Wayback Machine
• Кубинская и латиноамериканская музыка и танцы 29 травня 2008 у Wayback Machine
• Salsa ples – porijeklo, stilovi i gdje početi plesati plesniclib.bb
• Salasa youtube.com