Руменка
| Руменка | |
|---|---|
  Герб | |
| Административни податки | |
| Держава | Сербия |
| Автономна покраїна | Войводина |
| Управни округ | Южнобачки |
| Варош | Нови Сад |
| Жительство | |
| —2022 | 6.300 |
| —густосц | 181/km2 |
| Ґеоґрафски характеристики | |
| Координати | 45° 17′ 36″ С; 19° 44′ 23″ В |
| Часово зони | UTC+1 (CET), лети UTC+2 (CEST) |
| Абс. висина | 88 m |
| Поверхносц | 30,7 km2 |
.svg) | |
| Инши податки | |
| Поштове число | 21201 |
| Поволуюце число | 021 |
| Реґистерска ознака | NS |
Руменка населєнє у городскей општини Нови Сад, у Южнобачким округу, у Сербиї. Спрам Попису жительства зоз 2022. мала 6300 жительох.
У Руменки єст Сербска православна церква, Мадярска реформатска церква и будинок Парохийного дому т.є. церкви.
Походзенє назви места
[ушориц | ушор жридло]Єст вецей леґенди о наставаню мена Руменка, односно у першобутней форми - Пирош. Єдна леґенда бешедує о тим же поля коло Руменки були полни пипиня и же ше цале околїско тедишнього населєня червенєло од фарби того квеца.
Друга леґенда гвари же коло Руменки було вельо наду, понеже була мочарова жем и же ше нєбо червенєло од пламеня кед бивателє спальовали над же би преширели обрабяци поверхносци.
По мадярских историчарох, место достало назву по дзивки святого Ладислава I (Szent Laszló) хторей було мено Пирошка. Вона ше у XII вику одала за византийского цара Йована II Комнина, прешла на православну виру и достала мено Ирина. У византийскей историоґрафиї є позната як Ирина Угорска (1088-1134) и була мац познатого византийского цара Манойла I Комнина. По мадярских податкох зоз XII вику, Пирошка часто путовала до Царгороду и на путованю ше одпочивала на кральовским маєтку хтори ше находзел на териториї нєшкайшей Руменки и волал ше Пирошка-майор. Познєйше тоту територию почали волац Пирош.
История
[ушориц | ушор жридло]Валал у чаше турского панованя
[ушориц | ушор жридло]Валал Руменка, як часц велможства петроварадинскей опатиї цистерцитох припадала Бачкому, односно Сримскому спахилуку аж по 1526. рок, кед Османлийове завжали тоти краї. Османски дефтери зоз 1553. року наводза же у Руменки того року жили 3 порцийни обовязнїки. У османским дефтеру за 1570. рок ше наводзи же Руменка припадала феудалному маєтку османского велможи Гасана бин Абдулаха з рочним приходом 6000 акчи и у нєй жили 12 сербски фамелиї. Року 1590. Руменка мала 20 доми и у турских дефтерох ше спомина под меном Пирош.
Валал после ошлєбодзеня од Туркох
[ушориц | ушор жридло]З Вельку селїдбу Сербох почало насельованє Руменки насампредз зоз сербским жительством з територийох у историї познатих як Стара Сербия. Нєт податки цо ше збуло з предходнима жителями Руменки. Ознова населююци Руменку, сербске жительство ше населєло на подручу такволаней Рацкей бари, хтора тоту назву достала вельо познєйше. Населєнє хторе ту було пред турскима заберанями находзело ше на истим месце и новоприселєни ше змесцели на уж постояцу локацию. Вони обновели поваляни хижи и предлужели у нїх жиц. Правели и нови хижи, понеже ше число жительох звекшовало. Рацка бара була оддалєна коло 2 километри од нєшкайшей Руменки, при велькей кривини на драги ґу Кисачу. Року 1722. ушлїдзело преселєнє места на нєшкайшу локацию. Тот податок винєшени у Урбару за Руменку зоз 1772. року, у хторим ше гаври же валал Пирош - скорей пустара, 1722. населєни зоз православним жительством.
Руменка у рамикох Футожского велможства
[ушориц | ушор жридло]
Зоз перших доступних податкох ше дознава же у составе футожского велможства були, окрем Футоґу, хтори мал 80 доми, Дємишфалва з 20 и Кува зоз 10 домами, та пустари: Визич, Драґово, Гложан, Иришац, Кендєл, Петровец и Самотин. Гош ше Руменка у тим першим попису Футожского велможства нє спомина як место у його рамикох, зоз сиґурносцу мож повесц же Руменка теди постояла и же була населєна. Податок на хторим засноване тото заключенє то информация же Храм святих апостолох Петра и Павла у Руменки постої 1702. року.
Насельованє Мадярох до Руменки
[ушориц | ушор жридло]Предки нєшкайших Мадярох хтори жию у Руменки походза з тих пейцох местох коло рики Тиси у Жупаниї Гевеш:
| Назва | Мадярска назва | Нєшкайша назва |
|---|---|---|
| Тиса Роф | Tisza Roff | Tiszaroff |
| Бура | Bura | Tiszabura |
| Дерш | Ders | Tiszaderzs |
| Абад | Abád | Abádszalók |
| Салок | Szalók | Abádszalók |
Спрам мадярских жридлох, католїцки епископ з Еґеру Кароль Естергази коло 1774. року, прето же були калвинисти, вигнал Мадярох з тих местох. Калвинисти з тих пейцох местох ше населєли до округу Гайду и основали место под назву Тететлен. Вони у тим месце барз чежко жили бо було мало обрабяци поверхносци, а число жительох вельке, та ше зявел глад и рижни епидемиї. У тим месце жили 12 роки пред тим як ше преселєли до Руменки.
Демоґрафия
[ушориц | ушор жридло]У населєню Руменка жию 6495 полнолїтни жителє, а штредня старосц жительства виноши 39,6 роки (38,5 при хлопох и 40,8 при женох). У населєню єст 2010 обисца, а штреднє число членох по обисцу 3,23. (Спрам Попису зоз 2011. року).
Тото населєнє углавним населєне зоз Сербами (спрам Попису зоз 2002. року), а у остатнїх трох пописох обачене вельке звекшанє числа жительох (пре приход вибеженцох з Босней и Горватскей у остатнїх 25 рокох и пре блїзкосц и добру инфраструктурну повязаносц з Новим Садом).
| Демоґрафия | ||
|---|---|---|
| Рок | Жительство | |
| 1948. | 1.951 | |
| 1953. | 2.028 | |
| 1961. | 2.546 | |
| 1971. | 2.906 | |
| 1981. | 3.629 | |
| 1991. | 4361 | 4.299 |
| 2002. | 5.729 | 5.814 |
| 2011. | 6.444 | |
| Етнїчни состав спрам Попису зоз 2022. року | ||
|---|---|---|
| Серби | 4.302 | 75,09% |
| Мадяре | 747 | 13,03% |
| Югославянє | 139 | 2,42% |
| Горвати | 111 | 1,93% |
| Словаци | 67 | 1,16% |
| Чарногорци | 44 | 0,76% |
| Руснаци | 40 | 69% |
| Українци | 32 | 0,55% |
| Муслиманє | 16 | 0,27% |
| Нємци | 10 | 0,12% |
| Румунє | 7 | 0,12% |
| Роми | 7 | 0,12% |
| Македонци | 7 | 0,12% |
| Словенци | 3 | 0,05% |
| Албанци | 3 | 0,05% |
| Болгаре | 1 | 0,01% |
| Нєпознате | 18 | 0,31% |
Вонкашнї вязи
[ушориц | ушор жридло]- Руменка, Википедија на српском језику, sr.wikipedia.org, 26. март 2006.