Ружанєц

Ружанєц (всл. ružaňec, поль. różaniec, рсй. рожанец, горв. krunica або ružarij, преложене латинске rosarium, а тото виведзене од rosa „ружа“) - молитва хтору модля на пацеркох петнац особи хтори творя такв. ружанцов венєц. Ружанєц ше ище вола пацерки. Члени ружанцового венцу ше модля у дачиїм обисцу, а може ше модлїц и кажди член сам дома. У чаше медзи двома войнами у Керестуре було 180-200 ружанцово венци, а кажди мал 15 членох. Началнїца ше старала же би венєц вше бул полни.

Походзенє мена – Слово ружанєц уведол доминиканєц з Констанци: у його чаше бул обичай медзи залюбенима даровац єдно другому венєц ружох. Тото го наведло на идею виплєсц венєц зоз 150 ружох Пречистей Дїви Мариї, та так настало слово ружанєц.

Опис молитви – Ружанєц ше состої з даскелїх молитвох под назву Богородице Дїво. На початку каждих дзешец Богородице Дїво уклада ше Оченаш, хтори молитву дзелї на дзешатки, после хторих ше вигваря Слава Оцу. Ружанєц ма пейц дзешатки. Зложени є з 15 таїнствох, хтори подзелєни на три єднаки часци, т.є. на три тематски круги, хтори облапяю Исусов живот и так ше на фундаменту библийних текстох роздумує о радосних, страсних и славних таїнствох.

Радосни таїнства тоти: 1. Як Пречиста Дїва Мария Господа нашого Исуса Христа од Духа святого зачала; 2. Як Пречиста Дїва Мария посищающи Єлисавету, Господа Исуса Христа во утроби ношела; 3. Як Пречиста Дїва Мария Господа Исуса Христа породзела; 4. Як Пречиста Дїва Мария Господа Исуса Христа до храму принєсла; 5. Як Пречиста Дїва Мария Господа Исуса Христа у храму нашла;

Страсни таїнства тоти: 1. Як ше Господь Исус Христос кирвавим знойом зноєл; 2. Як Господа Исуса Христа бичовали; 3. Як Господа Исуса Христа з церньом овинчали; 4. Як Господь Исус Христос ношел криж; 5. Як Господь Исус Христос бул розопяти;

Славни таїнства тоти: 1. Як Господь Исус Христос воскрес; 2. Як ше Господь Исус Христос вознєс на нєбо; 3. Як Господь Исус Христос послал Духа святого; 4. Як Господь Исус Христос Пречисту Дїву на нєбо вжал; 5. Як Господь Исус Христос Пречисту Дїву Марию на нєбе окоруновал.

Литература

Словнїк руского народного язика II, О – Я, Нови Сад 2017, б. 448

Отче наш, Молитвенїк, Руски Керестур 1970, б. 42-45

Depolo, Luka. 1993. Kako moliti krunicu. Nadbiskupski duhovni stol; Glas Koncila. Zagreb.

Вонкашнї вязи

Krunica (molitva). srpskohrvatska Vikipedija, sh.wikipedia.org, 18. juni 2011.