Розвалка

Розвалка кухньов прибор цилиндричней форми хтори ше найчастейше хаснує за формованє цеста.

Файти розвалкох

Єст два основни форми розвалкох: форма ролї и палїчки. Розвалки у форми ролї на своїх концох маю ценки зуженя як ручки (у форми ручкох), док розвалки у форми палїчки нє маю ручки, алє ше роби о кратких гладких палїчкох. Форма завиши од наменки розвалки.

Розвалки у форми палїчкох ше прави з древа, а палїчка начастейше пречнїку 2-3 центи. Длугши су од ролькастих розвалкох и можу буц длугоки и до єдного метера. Цесто ше зоз нїма формує зоз прицисканьом розвалки з дланями и преходзеньом прейґ цеста. Пре лєгчейше рукованє, дакеди су зужени на єдним або обидвох концох. Таки розвалки ше углавним хаснує у восточней Азиї, Французкей и на Балкану.

Ролькасти розвалки тиж найчастейше древени, палїчка пречнїку 7-8 центи и звичайно су длугоки коло 80 центи. Тоти розвалки ше хаснує зоз прицисканьом на ручки и преходзеньом по цесту, розганяньом. У жемох заходней Европи и Сиверней Америки тота файта розвалкох вельо частейша.

Даєдни розвалки нє маю ровну поверхносц, прето же би охабяли шлїд у цесту при правеню окремних файтох печива и хлєбох.

У южней Азиї ше розвалки (belan) хаснує зоз ровну деску (shakla) при правеню чапатия (барз здрави индийски хлєб без квасу). Видумани и модерни електрични апарати за правенє тортильох хтори комбиную функцию розвалки, дески и палачинкарнї.

Материяли

Попри ядлїни або букового древа, за виробок розвалкох хаснує ше и: скло, керамику, полиакрил, бакелит, бакар, месинґ, алуминиюм, силикон, нєардзаюци челїк, мрамор и пластику.^[1] Даєдни розвалки дзирави и полнї ше их з воду же би були ефикаснєйши, а розвалки зоз мрамору ше трима у фрижидеру же би нєпреривно були жимни пре правенє лїсцатого, т.є. кремпитового цеста.^[2]