Презвиско

Презвиско то фамелийне мено и состойна часц особного мена. Презвиско по правилу дополнює мено чловека и на тот способ тота особа ше розликує од других людзох.

При векшини народох, презвиско идентификує фамелийну припадносц особи, хторa ше преноши зоз ґенерациї на ґенерацию и указує на сродство, алє постоя и други традициї презвискох. Презвиско може буц перше лєбо остатнє место подполного мена - у зависносци од традициї народа и хаснованя презвиска.

Народзене дзецко найчастейше достава оцово презвиско, ридше мацерово, дакеди двойнїсте презвиско, комбиноване зоз презвискох мацери и оца.

Постої и традиция пременки предмалженского презвиска до презвиска после  винчаня, а то симболизує преход зоз єдней фамелиї до другей. Медзи опциями за тоту пременку: жена бере презивиско мужа, жена бере двойнїсте презвиско, обидвойо беру двойнїсте презвиско, двойнїсте презвиско даваю лєм дзецом, муж бере женово презвиско. Двойнїсти презвиска, хтори розликую припадносц особи двом фамелийом, досц часта.

Постої и традиция пременки законченя презвиска у зависносци од пола особи (женски форми презвиска) лєбо у зависносци од єй статуса у дружтве.

История европских презвискох

Нашлїдзене фамелийне презвиско указовало на припадносц особи истого племена, походзенє од заєднїцкого предка, лєбо у узшим смислу - истей фамелиї. Презвиска ше хасновали досц часто у Старим Риме, першенствено медзи фамелийнима племствами. Перши презвиска зазначени у сиверней Италиї у 10-11. вику - у економски найрозвитшим реґиону Европи. Од Ломбардиї прйґ Пиємонта, презвиско ше преширело до сушедней Прованси (юговосточна Французка), а 1066. року зоз Нормандиї (сиверна Французка) Норманє пренєсли до Анґлиї.

У Европи у штреднїм вику презвиска ше практично нє хасновали, почали ше хасновац од 15. вику, першенствено медзи висшима пасмами жительства и племства. На преходзе зоз 15. до 16. вику, презвиска ше почали хасновац у Данскей, Нємецкей, Швайцарскей, тиж и у Шведскей.

Характеристики презвискох народох у Европи

Славянски презвиска

Презвиска на початку наставали од занїманьох, ґеоґрафского положеня, назва места биваня и походзеня, особлївосцох, прикмети особних презвискох (индивидуални ознаки, психични и други). Могли буц и инши жридла твореня презвискох алє вони маю меншу улогу у процесу твореня презвискох и назвискох. Як таке, презвиско настало у другей половки 14. вику, коло 1375. року. Пре шицки начишлєни компоненти нєшка постоя рижнородни презвиска.

У велїх славянских язикох (пре морфолоґийни характеристики язика), женски презвиска ше, по правилу, розликую по форми од хлопских. При даєдних язикох, напр. у литванским, презвиска маю розлични форми за хлопох, одати и нєодати жени (Ясайтис, Ясатени, Ясайтити).

Даскельо слова дефиную и хасную слово ,,презвиско'' як синоним за ,,фамелийне мено.''  Сучасна наука придава значну увагу питаньом ономастики. То наука о значеню и твореню менох, презвискох. Основопоклонїк славянскей ономастики бул Ф. Мишкович. хтори 1860-1874. рокох хтори публиковал три значни документованя славянских особних и ґеоґрафичних назвох, презвискох.

Сербски презвиска

У сербским народзе Вуков Сербски словнїк презвиско означує як синоним за походзенє. Векшина сербских презвискох препознатлїви по суфиксу -ич (серб. -ић). Суфикс -ић славянски деминутив, хторому основна улога творенє патронима и матронима (наставки по хлопскей и женскей линиї). Преценює ше же два трецини сербских презвискох закончує ше на -ић лєбо -вић. Розлики у презвискох медзи Сербами зоз Сербиї и Сербами зоз других крайох углавним у тим же єдни презвиска формовали сербски власци, у складу зоз народну традицию, док други презвиска формовали цудзи власци. Вельке число сербских фамелийох ма исти презвиска, гоч су нє у медзисобним сродстве. Основа презвиска може буц рижнородна. Звичайно то особне мено родоначалнїка одредзеней фамелиї. Найчастейше то оцово, дїдово лєбо мено даєдного другого хлопского предка у директней линиї сродства. Побочна линия сродства, зявює ше алє лєм винїмково. Постоя и презвиска хтори постали зоз мена женского предка. „Снователь презвиска“ нє муша буц вше предки по кревовим сродстве. Случує ше же то можу буц и други особи (усвоїтель, старатель, добротвор и др).

Нєшкайши презвиска и їх творенє и здобуванє у Сербиї вяже ше за княза Александра Карадьордєвича, хтори 1851. року зоз єдним актом розказал успоставиц и запровадзиц тирваци презвиска по найстарших и найзначнєйших предкох. Особни презвиска у бувшей Югославиї виучовали Т. Маретич, Р. Роґич, П. Скок и други.

Українски презвиска

Українски презвиска маю барз обсяжну морфологию формованя. Дакеди по презвиску мож одредзиц точнє реґион лєбо аж и локалитет у України зоз хторого походзи предок особи, а мож предпоставиц и занїманє предка, припадносц козакох лєбо священству, чин-ранґ, лєбо окремни характеристики, як и старосц/древносц презвиска.

Перша нє велька публикация о українских презвискох була статя А. И. Степовича Заметка о происхождениi малорусских фамилий, друкована 1882. року у воронєжских филолоґических записках, Спрам думаня I. Франка початок утвердзованя презвискох як нашлїдних власних назвох придавало ше значносц у України и спрам духовносци. Києвски митрополит Петро Могила 1632. року, розказал парохиялним священїком водзиц евиденцию народзених, винчаних и умартих.

Медзитим, толкованє презвиска може буц двосмислово, окреме у поглядзе одредзованя националносци. Напр., презвиско зоз туркийским кореньом нє значи же предок бул Татар, вон єдноставно могол буц наволани зоз туркийским словом хторе було звичайне у тим чаше (як цо Сагайдак, Сагайдачни, Сагайдаченко - пре хаснованє тоболца (заднї конєц стрели) на стрелох Козакох).

Хаснованє фамелийних менох-презвискох у урядових записох почало досц вчас пре потреби назначованя права на маєток. Фамелийни мена окреме чести у писаних жридлох од 14. по 16. вик. Зпочатку фамелийни мена углавним хасновали богати людзе хтори мали богатство (тарґовци, бояри, маґнати, жемовласнїки). Медзитим, уж у 17. вику, такп. шицки Українци мали свойо презвиска, без огляду же ше презвиска часто трансформовали, а на їх основи могли настац нови презвиска, напр. син чловека зоз презвиском Коваљ могол достац презвиско Коваленко (син Коваља), а його жена ше волала Ковалиха.

Велї презвиска ше зявили у цеку Запорошскей Сичи, прето же уключуюци и приклонююци ше Сичи, Козак менял свойо старе презвиско до нового. Презвиска здобули стабилносц аж у 19. вику. Урядови презвиска и нєурядови назвиска коеґзистовали паралелно, а то ше одражело у українскей дїялносци и кнїжовней литератури.

Русийски презвиска

Русийски презвиска ше зяавели досц позно. Векшина з нїх походзи зоз церковних патронимох (оцового), як цо то Иванов, Петров итд. Вельо менєй походза зоз назвиска. Даєдни од файти дїялатносци, места походзеня, других фамелийних презвискох. Перши презвиска ше зявели на териториї модерней Русиї у Новоґородскей републики, прилапююци звичай од Велького князовства у Литваниї у 14–15. вику. До конца 18. и штредком 19. вику векшина жительства централней Русиї нє мала презвиска. Штредком 19. вику, окреме после утаргованя кметства 1861. року, презвиска ше формую при векшини селянох. Процес здобуваня презвискох углавним зазкончени аж коло 1930-их рокох.

Шпански презвиска

У жемох – подручох дзе ше бешедує на шпанским язику хасную ше двойнїсти презвиска. Перша часц презвиска по оцови, друга часц мацерово презвиско. У Шпаниї од 1999. року уведзени закон хтори допущує одроснутей особи пременїц рядошлїд презвиска. Одати жени маю свойо презвиска, и на тих местох дзе ше звичайно хаснує презвиско мужа. Кед жена хаснує мужово презвиско, вона го додава ґу обидвом своїм презвиском лєбо першому алє додава „de“ опрез нїх.

Портуґалски презвиска

У жемох портуґалского бешедного подруча хасную ше и двойнїсти презвиска, алє рядошлїд хаснованя подполно процивни од шпанского: перша часц презвиска мацерово, а друга часц презвиска од оца, алє тото друге значнєйше.

Руски презвиска

Руски презвиска хтори пописани у Руским Керестуре, Коцуре и других местох дзе жию Руснаци (Дюрдьов,, Шид, Вербас, Кула, Беркасово, Бачинци и други), потвердзую же су творени од истих жридлох як и при других народох. Остава лєм проблематика наукового точного вишлїдзованя кеди и як помадярени даєдни руски/русински презвиска о чим дацо писал у краткей студиї Нашо назвиска Дюра Биндас. У його студиї пописани перши презвиска доселєнцох 1770. року (початок насельованя 1745.. рок) до тедишнього Керестура (Бачкерестура) и Коцура (початок досельованя дакус познєйше, коло 1765. року). Податки вжати зоз найстарших руских матрикулох. Познєйше тоту тему о презвискох преучовал Микола М. Кочиш, а тиж виглєдовал публициста и новинар Мирон Жирош.

У новшим чаше тему о презвискох мадярского походзеня бачванско-сримских Русинох ширше облапела и обробела у своєй постдипломскей роботи зоз хтору докторовала и хтору публиковала 2012. року, Гайналка Фирис, нєшка Др. славистики PhD, хтора жиє и роби у Будимпешти.

Цикаве зявенє при Руснацох поготов у Руским Керестуре, же велї фамелиї окрем презвиска (як ше пишу) маю и назвиска (як их волаю). Презвиска хтори ше часто, або частейше зявюю маю найвецей назвиска, напр. Надь - 6 назвиска, Пап-4, Гайдук-4, Будински, Гарди, Еделински и други-3. итд. Вироятнє назвиска дати тим фамелийом же би ше их лєгчейше розпознавало. Назвиска давани по особних менох старших предкох, лєбо фамелийох хтори ше змишали, даєдни означую руску назву фамелийох зоз мадярскима презвисками.

Перши руски презвиска

Зоз своїм приселєньом 11 особох, 1745. року до нового краю - Косцелїско, на керестурску пустару Кулского паньства, тоти особи зазначени зоз тима презвисками: Сабов, Колар, Кудлач, Рац, Чизмодий, Фоґараш, Емеди, Лутеран, Терек, Загата, Лукач.

Поступно ше досельовало жительство у наиходзацим периодзе зоз урядовим документом одлуки - велїчества царици Мариї Терезиї о насельованю 200 руских грекокатолїцких фамелийох. Контракт подписани у Зомборе а подписал го администратор Франц Йозеф де Редл. Поступно ше приселєли ище велї фамелиї зоз новима презвисками.

У записох од 1753. року о новонасталих маєткох доселєних особох, записани тоти презвиска ( приказани дзепоєдни): Орос, Киш, Мункачи, Шанта, Микловш, Салак, Гарди, Хома, Керекярто, Маковицки, Козубски, Тот, Шугайда, Абодї, Венчелай, Добрай, Варґа, Пап, Гвоздак, Пирмицки, Югас, Надь, Попеґай, Бесерминї, Мойчар, Папуґа, Пустовински, Бабинчак, Вереб, Лендєр, Голош, Рус, Вашаргелї, Керестурик, Русковски, Козубски, Палинкаш, Сабадош, Торма, Еделински, Канюх, Бесерминї, Майхер, Колошняї, Земанї, Боднар, Гербут, Силадї, Дїтко, Пастовнїцки Ґовля, Кирила, Такач, Франко, Чордаш, Лацко, Чорба итд. Тоти особи (начишлєни лєм глави фамелиї) зоз рижнима презвисками, доселєни найвецей з просторох (Горнїци) и зоз местох нєшкайшей восточней Словацкей, з часци України и Мадярскей.

Литература

• Дюра Биндас, Нашо назвиска, Руски Календар 1936. рок, бок 42-45
• Симеон Сакач, Нашо презвиска, НВУ Руске слово Нови Сад, Народни Календар 1972. рок, бок 87-96
• Микола М. Кочиш, Линґвистични роботи
• Юлиян Тамаш, Руски Керестур лїтопис и история (1745-1991) бок:63-67
• Мирон Жирош, Бачванско-сримски Русанци дома и у швеце, I том 1997. рок, (Презвиска и топомини керестурских парохиянох) бок 27-32
• Гайналка Фирис, Презвиска мадярского походзеня при бачванско-сримских Руснацох, BBB II (Bibliotheca Baltoslavica Budapestiensis II) Budapest 2012.

Вонкашня вяза

• Onomastika