Порвисло

Порвисло (общеславянске слово, з истим значеньом: всл. porvislo: vjažeme do porvisla, слц. povrieslo, поль. powróslo, укр. перевесло, рсй. перевясло, серб. уже, повесло) то скруцена ражова, ярчана або житна слама за вязанє снопох кед ше ручно кошело жито.

Одберачка за косачом одберала, односно зоз шерпом зберала покошене жито хторе би звичайно старши вязали до снопох з тима порвислами. Порвисла ше плєтло додня рано, док жито, ярец або раж були ище влажни од роси, або позно вечар, же би були

еластичнєйши. Теди ше их пошкропело з воду же би ше слама нє ламала, алє дала добре зогнуц. По два пасемка спомнутих житаркох ше брало до рук, кладло клаше ґу клашу и круцело як штранґ.

Дзекеди порвисла пресцерали младши особи, звичайно дзеци, а дзекеди одберачка мала док одберала порвисла привязани на хрибце за фартух, припасани над клубами.

Фразеолоґия

♦ Пресцерац порвисла – класц порвисла ґу снопом хтори треба вязац

♦ Правиц (круциц) порвисла – скруцовац порвисла зоз ражу за вязанє снопох

Литература

Словнїк руского народного язика II, О – Я, Нови Сад 2017, б. 250.

Вонкашня вяза

Kosa wyklepana, żniwa rozpoczęte! Видео знїмок; кошенє, правенє порвислох, вязанє снопох