Пияц

Пияц то окреме видвоєни и ушорени простор дзе ше предава робу и услуги^[1]. Найчастейше ше находзи у центре лєбо блїзкo центру населєня. Тарґовци викладаю свою робу и продукти, а купци глєдаю продукти хтори им потребни. Пияци було ище у античней епохи^[2], а ширцом швета и нєшка єст пияци и отримую ше праве пре предаванє и купованє^[3].

Историят

Пияци єст од давна^[2]. Даєдни историчаре твердзели же тарґовища постоя одкеди ше людзе почали занїмац зоз предаваньом. Отворени и явни пияци були познати у Вавилониї, Асириї, Феникиї, жемох Израїлу, Греческей, Єгипту и на Арабским полуострове. Медзитим, нє кажде дружтво розвило систему тарґовини, напр. гречески историчар Геродот обачел же ше тарґовище нє розвило у старей Персиї. На Блїзким востоку документовани жридла указую на єдну файту пияцох хтори ше першираз зявели коло 3000. року пред нову еру. Таки пияци ище теди заберали улїчки и часц улїцох у варошох (найчастейше ше розцагли воздлуж од єдней капури по другу капуру на другим концу улїци варошу). Пияц у Табризу, наприклад, розцагнути на километри по улїци и найдлугши бул на швеце. Мосави твердзи же блїзковосточни пияци еволуовали до линеарней форми, док пияци на Заходзе було баржей централизовани.

Нєшкайши пияци

Пияц може буц под закрицом лєбо отворени простор зоз тезґами дзе виложена роба хтору ше предавало и подмирйовало купцох. Тезґи були обезпечени зоз килашами у зависносци од файти роби и продуктох хтори предавач предавал. По нєшкайших правилох требали би на тезґи буц и мали каси, а тиж и виложени цени продуктох. На пияцу свою робу першенствено предаваю їх власнїки (селянє, рибаре, даєден ремеселнїк); то предаваче хтори нє професийни тарґовци и нє представяю даяку фирму односно компанию. Розлика од других предавальньох и тарґовецких хижох/маркетох у тим же ше на пияцу можу, предавач и купец, дорадзиц, єднац за вигоднєйшу, нїзшу цену^[4], а цена ше през дзень може вецейраз меняц у зависносци од понуканя и глєданя роби. У даєдних орґанизованих економийох предаваче на пияцох муша буц приявени и реґистровани як продукователє и порцийни обовязнїки. На пияцу характеристичне тото же нєт строгей контроли, окрем за винїмково аспекти тарґовини як цо то контрола килашох за меранє роби, контрола (нєпогубеного) меса за предаванє закланей животинї.

Файти пияцох

Желєни пияц

На „Желєним пияцу” ше углавним предава желєняву и овоц, млєчни продукти месо, преробки з меса, вайца, лїковити рошлїни лєбо їх продукти (теї, мелеми, мед) и други поживово продукти, а мож найсц и артикли хтори потребни за обисце (метли, плєцени кошарки, гоблї, столчки, драбинки и подобне). Часто ше на пияцу найдзе и ручно робени и ткани артикли як цо памучни салвети, хлєбовки, ручнїчки, керпари итд. У даєдних случайох ше вимага од тарґовца же би мал урядову дозволу за предаванє лєбо доказ же сам випродуковал робу хтору предава.

Рибни пияц

Рибарня або рибни пияц наменєни за предаванє риби, кориткох, лиґньох и других морских и сладководних орґанизмох. Скорей ше рибу предавало живу. Нєшка єст сучаснєйши рибарнї у хторих рибу очисца и такой ю можу порезац на фалатки (пофаластовац) по жаданю купца, з тим же тоту услугу ше додатно плаци.

Статкови пияц

По 21. вик на пияцох, поготов у менших местох и по валалох, предавало ше и животинї: живину (кури, курчата, качки, гуски, пульки, морки), млади животинї: заяци, прашата, целята, баранчата, кощата... У векших местох знал буц орґанизовани статкови пияц хтори бул вимесцени зоз штредку населєня, даґдзе на окраїску, раз лєбо двараз мешачно, на хторим ше могло предавац и куповац векши статок: крави, буяци, бияли, конї, кобули. Тиж ше там куповало и предавало векши количества животиньох як цо швинї за кланє, кози, овци итд.

Рондьош-пияц

Рондьош-пияц (колоквиялни вираз серб. „бувљак“, од слова „бува“, по руски блиха, бо ше верело же у половней роби єст вельо блихи) окремна файта пияцу и нє барз найяснєйше як настал тот вираз. На рондьошу ше предава шицко и вшелїяку, алє насампредз половну робу. Понука ше робу як цо то авто-часци, ношене облєчиво, обуй, технїчну робу, половни електирчни апарати, рижни справи за обисце и вельо койчого иншого.

На рондьош-пияцу ше понука и нову робу, як цо то облєчиво, обуй, технїчну робу лєбо домашнї любимци итд. Вельораз єст и роба на предай хтору ше нє шме пущиц до обтоку прето же є фалсификована, зоз нєвиродостойнима етикетами познатих робних маркох.

Литература

• Sullivan, Arthur; Steven M. Sheffrin (2003). Economics: Principles in action. Upper Saddle River, New Jersey 07458: Pearson Prentice Hall. pp. 28. ISBN 0-13-063085-3.

Вонкашнї вязи

• Виды рынков и их классификация Arhivirana kopija от 31 января 2023 на Wayback Machine //economics.studio

Референци

↑ ЭСБЕ/Базар, рынок в 86 т. (82 т. и 4 доп.). — СПб., 1890—1907.
↑ ^2,0 ^2,1 Скотопригонный рынок Энциклопедический словарь Брокгауза и Ефрона в 86 т. (82 т. и 4 доп.). — СПб., 1890—1907.
↑ https://www.pps.org/category/public-markets public-markets
↑ ТСД2/Торговать Online Etymology Dictionary. www.etymonline.com. Дата обращения: 26 сентября 2019.Архивирано 21 января 2021 года.

[1] ЭСБЕ/Базар, рынок в 86 т. (82 т. и 4 доп.). — СПб., 1890—1907.

[:0-2] 2,0 ^2,1 Скотопригонный рынок Энциклопедический словарь Брокгауза и Ефрона в 86 т. (82 т. и 4 доп.). — СПб., 1890—1907.

[3] ttps://www.pps.org/category/public-markets public-markets

[4] ТСД2/Торговать Online Etymology Dictionary. www.etymonline.com. Дата обращения: 26 сентября 2019.Архивирано 21 января 2021 года.

[1]

[2]

[3]

[4]