Писок

Писок то природни материял у форми ґранулох направени зоз фино роздзелєних часточкох стинох и минералох. Кед ше одноши на термин ґеолоґиї, то материял хторому дияметер од 0.0625 mm do 0.004 mm. Писок з найвекшей часци направени зоз силицийового оксиду SiO2, найчастейше у форми кварцу. Состав писку вариябилни и у нїм може буц мусковит, циркон, рутил, апатит, ґранит, маґнетит, турмалин, итд.

У природи писок ше найчастейше може пренайсц у пустиньох и писковитих плажох и побрежйох. Найчастейше настава з дробеньом твардейших стинох у морю (габи бию до побрежя и одламую твардейши стини хтори ше з дїйствованьом моря далєй дробя и зменшую док ше нє претворя до писку). Здробени писок морски струї ноша и таложи ше на плажох на хторих швидкосц морскей струї менша, та нє може далєй ношиц писок. З часу на час опрез побережя настава острово з писку, и звичайно є видлужене. Писково острова часто злучени з побрежйом и вец завераю морски залїв хтори ше наволує лаґуна. Найпознатши лаґуни у подручю городу Венеция (город настал на на пискових островох хтори ше формовали з пискових наношенїскох рики По).

У пустиньох писок настава з розпадованьом стинох под вплївом вельких дньових пременкох температури (у пустинї дньова температура посцигує прейґ 40 0C, а вноци пада попод 0 0C). Часточки писку лєгки, та их ноши витор (еолски процеси). Часто наставаю писково бурї хтори можу ношиц писок на вельки оддалєносци. Док витор ноши писок, вон драпе стини, та часто наставаю нєобични форми (пустиньски печарки). На местох дзе витор вислаби, писок ше таложи, та наставаю дини.

Хаснованє

З печеньом писку на високих температурох прави ше скло. Писок и шлюнок творя найвекшу часц материялу хтори ше хаснує у будовательстве, аж 79% або 28.6 ґиґатони у 2010. року и спадаю до материялох хтори ше найвецей екстрактую на швеце, превозиходзаци фосилни горива и биомасу.^[1]

Писок нєобновююци ресурс у розмирох людского вику, а писок вигодни за правенє бетону, барз глєдани ^[2] Пустиньски писок, гоч го єст вельо, нє вигодни за бетон. Пейдзешат милиярди тони писку з плажох и фосилного писку ше кажди рок хаснує за вибудов.^[3]