Писанка

Писанка ^[1] (укр. и рсй. писанка, поль. рisanka, слц. písanka) то офарбени и украшени, звичайно уварени вайца. Найчастейше ше хаснує курово, гуши и качи вайца, алє нєшка мож видзиц украшени и нойово, лебедово и препилково вайца. За украшованє вайцох ше хаснує рижни технїки: фарби ше их у єдней фарби, пише зоз воском, дзирави и бруши з орудийом за тоту наменку, лїпка рижни материяли и декупаж-технїку. Писанки ше, попри сирца, колбаси, шунки, зоз масла направеного баранчеца и паски кладзе до плєцених кошаркох хтори ше пошвеца на Вельку ноц. Вайцо (писанка) символ плодносци и родзеня нового живота.^[2]

История

Украшованє вайцох под час ярнїх обрядох прастари обичай. У Африки пренайдзене ґравироване нойово вайцо хторому утвердзена старосц 60 000 роки ^[3]. У старим Єгипце, Месопотамиї и Криту, вайца представяли нє лєм шмерц и нови живот, алє и статус владара. Украшени нойово вайца або имитациї вайцох зоз злата и стрибла ше кладло до гробох старих Сумерох и Єгиптянох пред коло 5 000 роки пред н.е. ^[4]

У кнїжки Rituale Romanum зоз 1610. року церква урядово прилапела вайцо як символ воскреснуца Исуса. Познати нємецки линґвиста, лексикоґраф и записовач народних приповедкох Яков Ґрим предпоставя же народна традиция медзи ґерманскима народами настала на основи ярнього преславйованя швета ґерманскей богинї Еостри.

Найвекша писанка ше находзи у українским городзе Коломий. Тот будинок-музей направени 2000. року у фурми писанки, високи 14 метери и широки 10, и у нїм ше находзи вистава коло 1200 писанкох зоз цалого швета.

По 2000. рок титула найвекшей писанки припадала писанки у канадским городзе Vegrevillu. Тота писанка широка 9,4 метери, висока 7 метери и чежка 2,5 тони. Интересантне же и тота писанка українска, а єй правенє финансовала держава Канада и була пошвецена канадскей Кральовскей полициї. Варош у хторим писанка направена єдно з найстарших українских населєньох на подручу восточно од варошу Едмонтону.

Єдна з найкрасших, найвекших и найвреднєйших збиркох писанкох у Европи находзи ше у Етноґрафским музею у Заґребе. Найстарша писанка зоз Бейчу, зоз 1847. року, а подаровал ю бискуп Йосиф Штросмаєр.

Збирка писанкох

Русийске златарске подприємство Fabergé направело вельо вельконоцни писанки за русийских царох Александра III и Николу II, як и за фамелию Kelch ^[5] и велї други особи хтори жадали мац їх писанки. Тоти писанки правени од 1885. по 1917. рок, зачувани 57 од 65, а кажда писанка ма иншаку назву: лебед, павур, пупче ружи... и чува ше их у музейох и приватних збиркох.

Прецо ше вайца фарби

Шлїди заяца як символу хтори може знєсц вайцо пренаходзиме у предхристиянским чаше у леґенди о богинї Еостри. По леґенди, богиня Еостра у лєше нашла птичку хтора лєм цо нє змарзла од жими. Же би ю защицела од змарзаня, претворела ю до заяца. Заяц затримал способносц нєсц вайца як птичка. Кажди рок знєшєни вайца цифровал и даровал их богинї Еостри як подзекованє. Попри того же заяц символ плодносци, єст и таке становиско же ше швидкосц ширеня вистки о Исусовим воскреснуцу поровнує зоз швидкосцу заяца и праве прето є нєшка нєзаобиходни елемент вельконоцного декору.

Спрам другей теориї, традиция фарбеня вайцох настала у Єгипту. У велїх културох, та и у Єгипту, вайцо символ плодносци, благостану и розкошу. Єгиптянє верели же ше Жем вилягла праве з вайца. Обичай фарбеня вайцох ше преширел и на цали швет, а хаснованє вецей фарбох и їх цифрованє ше почало хасновац у штреднїм вику.

У предхристиянским чаше писанки ше рихтало же би ше привитало яр, же би вони защицели людзох од злого и нєпогодох, же би статок мал млади и же би бул добри урожай.

Писанки ше кладло до яшльох ґу кравом и коньом же би ше лєгчейше целєли и же би мали млєка. Писанки ше кладло ґу кошнїцом, до курнїкох, а статок ше першираз на пашу посилало з писанками. Польопривреднїки кладли писанки на швижо зорану жем же би бул добри урожай. Писанки ше даровало и викладало коло образох у обисцу.

Символи на писанкох

Писанки ше рихтало и скорей як Восточни Славянє прилапели християнство. Символи предхристиянски, гоч ше велї з нїх толкує з аспекту християнства. Прето велї символи маю два значеня (толкованя): паганске и християнске.

Нєшка єст велї кнїжки о дизайну и онлайн жридла окремних значеньох поєдиних символох, алє важне надпомнуц же ше символика меня з часом и у розличних реґионох є иншака, так же чежко пренайсц универзалне и конкретне значенє за даєден символ.

Пагански и християнски символизем

Очиглядне же уметносц старша од християнства. Першобутна символика писанкох була паганска.Вайцо першобутно представяло слунко (досц задумац лєм жовчок), потим було символ обновйованя живота, будзенє природи, подмладзованя жеми после жими. Схопносц писаня писанкох жива уметносц, символи ше розвиваю и блядню з часом и розликую ше од реґиону до реґиону прето чежко претолковац и предпоставиц духовну вязу медзи фарбу и дизайном.

Предхристиянски символи представяли природу. Криж представял штири страни Жемовей кулї, а познєйше представя Христову жертву. Грозно дакеди представяло добру жатву и богатство, а нєшка є символ церкви хтора ше шири.

Писанки за окремних людзох

Жительство верело же вайца маю моц помогнуц у каждодньовим живоце. Писанки ше даровало: дзеци доставали писанки зоз яснима фарбами, леґинє и дзивки доставали писанки зоз вельо билого простору, цо значело же їх животи ище празни папери хтори треба виписац. Малженска пара достала писанку зоз нарисованима 40 троугелнїками хтори представяли рижни аспекти живота. Старши особи доставали на цмо офарбени вайца и зоз символами як цо то нїтка вичносци, капурки и драбинки хтори представяю вознєшенє на нєбо.

Символи на писанкох

♦ Нарисована габа, нїтка... символизує гармонию, безсмертельносц и рушанє. Думало ше же зли духи, кед злєца на писанку, буду зарабровани у нїтки вичносци

♦ Драбинка символизує вознєшенє, вязу медзи Жему и нєбом, совершенство, воланє на молитву

♦ Квеце, ружички символизую красоту, плодносц, розкош

♦ Мрежа або шитко символ успишного лову або защити од злих духох, символ розлучованя доброго од злого. Звичайно ше зоз ню пополнює други ґеометрийски фиґури як цо то троугелнїки, круги, квадрати...

♦ Осемкракова гвизда, односно ружа, символизує Исуса Христа, або кед є велька – слунко, а кед є мала - представя гвизду

♦ Витерняк (свастика ^[6]) давендавни соларни (шветлосни) символ у култури Славянох, символ Бога Слунка, нєба и блїскавки. Символизує рушанє Слунка по нєбе и безконєчни циклус народзеня и шмерци

♦ 40 троугелнїки написани на писанки представяю 40 днї Велького посту, 40 днї хтори Исус препровадзел у пустинї, 40 задатки супружнїкох хтори мали сполнїц у живоце (число 40 символ вельочисленосци, односно нє огранїчуюце є)

♦ Троугелнїк ма християнске значенє — Свята Тройца; паганске значенє — мац, оцец и дзецко або Жем, вода и воздух або народзенє, живот и шмерц

♦ Єлень або конь символизує богатство и просперитет

♦ Спирала прастари символ гада, пагански символ Жеми и води; защитни символ зараброваних духох

♦ Птици — символ яри

♦ Грабелки — символ роботи

♦ Седем ружички (Марийово слизи) — представяю седем Марийово рани

♦ Криж — Осана сину Давидовому (на славу Исусу Христу)

Фарби на писанкох

Фарба важни аспект значеня писанкох, алє є секундарна у одношеню на символи писанкох. Вона першобутно завишела од доступних природних материялох за фарбенє. Прихильносц ґу даєдним фарбом допринєсла же би ше у будучносци нє одступало од звикнуцох.

★ Чарна фарба представя центер Жеми, вичносц, ноц пред швитаньом, припадносц „гевтому швету”, алє у позитивним смислу

★ Червена — щесце, надїю, крев, огень

★ Белава — нєбо, воздух, здравє, правду, вирносц

★ Била — чистота, шветлосц, радосц, нєвиносц

★ Желєна — яр, воскресенє природи, надїя, богатство

★ Жовта— слунко, мешац, гвизди, жатва, цеплота, вирносц фамелиї

★ Помаранчецова — витримовносц, вичне Слунко, амбиция

★ Чарно-била — жалоба и почитованє души

★ Целова — успих и задовольство

★ Червено-била — почитованє и защита од злих силох

Обичаї при Руснацох

На Вельки пияток ше фарби вайца и пише писанки.Традиция фарбеня и писаня писанкох ше преноши зоз колєна на колєно. Велька ноц, швето кед ше до церкви ноши пошвециц кошарки у хтори ше находза, окрем писанкох, пасочка, колбаса, шунка, сирец, аж и баранче направене з масла. Кед кошарка пошвецена, у велїх обисцох зачувани обичай же ґазда дзелї писанку на тельо часци кельо єст души за столом. Вери ше же то отрима здравє, зложносц и заєднїцтво фамелиї. Найкрасши писанки ше давало облївачком и облївачом. Хлапци ше барз цешели кед од дзивки достали писанку — кантара. Кантар то хлопска писанка, а єй випатрунок ше помали забува. Кантар то прикраска на коньови, хтора ше на Горнїци вола праве так — кантар, белава писанка.

Технїки украшованя вайцох

Традицийна метода писаня писанкох то метода зоз воском и гушим пирком, кичицу (на древку привязани скруцени плещок, випатрунку як мали тевчир до хторого ше сипало розпущени восок) або ґомбошку заджобнуту до древка або вигрисочки. Розпущени восок ше затримовал на главки ґомбошки, кичици, пирку и зоз прецагованьом по вайцу ше могло вирисовац задумани мотив.

Новши часи зоз собу принєсли нови технїки украшованя писанкох. Нєшка ше вайца частейше фарби як цо ше по нїх виписує. На вельконоцним столє мож видзиц и видути вайца, т.є. шкарупини хтори ше дзиркави по углядзе на мустри старих штикованих (дзиркованих) парткох и на мотиви зоз вишивкох або ше их „облєка” зоз салветками (декупаж-технїка), плаценками, перлочками и сламу.

Дакедишнї стари технїки украшованя писанкох помали щезую. При пошвецаню вельконоцних кошаркох мож видзиц даєдну ґаздиню хтора фарби и виписує писанки так як робели нашо баби и прабаби — зоз природнима фарбами и зоз воском, а тиж так и писанки варени у цибульових пиркох, на хтори пред вареньом причверсцени з ценку ботошку лїсцочко бетелїни, лампащику або даякей другей травки.

Ґалерия

Писанки - ґравирана технїка
Писанки правени зоз декупаж технїку

Литература

РУСКИ ХРИСТИЯНСКИ КАЛЕНДАР 2010, „Писанки возбудзию душу — ошвижую памятки”, бок 335—338
РУСКЕ СЛОВО, 2010. рок (число 13), „Вельконоцни швета”, рубрика Дом и фамелия, бок 2,3
РУСКЕ СЛОВО, 2015. рок (число 24), бок 18,19
РУСКЕ СЛОВО, 2016. рок (число 17), бок 22,23
РУСКЕ СЛОВО,2017. рок (число 15), бок 20,21

Вонкашнї вязи

Писанка на анґлийскей википедиї (язик анґлийски)

Писанка на горватскей википедиї (язик горватски)

Писанки, THE UNIVERSITY of KANSAS,

Писанка, история, традиция, сомволи (язик анґлийски)

Русински писанки зоз восточней Словацкей

Краса писанкох, Еуфемия Жирош, Руски Керестур

ВЕЛЬКОНОЦНИ ТРИПТИХ, Агнета Папгаргаї

Технїка дзиркованя и салветна технїка , Ирина Дудаш и Амалия Гарди, Здруженє женох зоз Руского Керестура

Писанки у декупаж технїки , Ана Мария Рац

Благословени писанки, Мария Йозанов

Найвекши писанки на швеце, www.kutina.in

Референци

↑ СЛОВНЇК РУСКОГО НАРОДНОГО ЯЗИКА О—Я, НОВИ САД, бок 154
↑ РУСКЕ СЛОВО, 2010. рок (число 13), „Вельконоцни швета”, рубрика Дом и фамелия, бок 2,3
↑ oldest-decorated-eggs
↑ Благо из краљевских гробница у Уру Ричард Л. Зетлер, Ли Хорн, Доналд П. Хансен, Холи Питман 1998. бок. 70-72
↑ Kelch-Eggs/Kelch-Eggs.htm Писанки фамелиї Kelch (язик анґлийски)
↑ Tajne čuvene svastike, www.blic.rs

[1] СЛОВНЇК РУСКОГО НАРОДНОГО ЯЗИКА О—Я, НОВИ САД, бок 154

[2] РУСКЕ СЛОВО, 2010. рок (число 13), „Вельконоцни швета”, рубрика Дом и фамелия, бок 2,3

[3] st-decorated-eggs

[4] Благо из краљевских гробница у Уру Ричард Л. Зетлер, Ли Хорн, Доналд П. Хансен, Холи Питман 1998. бок. 70-72

[5] Kelch-Eggs/Kelch-Eggs.htm Писанки фамелиї Kelch (язик анґлийски)

[6] Tajne čuvene svastike, www.blic.rs

[1]

[2]

[3]

[4]

[5]

[6]