Пирнаґи

Дараз ше тримало же пирнаґи то пирє пущене до турбука, а за турбук з пирйом облєчени до перинянки нєшка гвариме же то посцелїна. По даєдних, у народзе за сам турбук з перину и заглавком гваря же то пирнаґи (вше у множини).

Перина звичайно велька як посцель, у нєй єст коло 5-6 кили пиря. У заглавку єст менєй пиря, коло два-три кили.

Гуски ше пре пирє скубало три раз до рока, а хто мал вецей пиря як цо му требало, предавал го пиряром, хтори го куповали по валалє. У народзе ше ище хасновало мено пирнаґи, а то ше подрозумйовало же вєдно заглавки и перини. Часто ше подрозумйовало же пирнаґи то заглавки и перини без верхох, без перинянки (нєшка гвариме - посцелїна). Заглавки и перини лєм у турбукох.

Посцелїна нєшка материял хтори ше кладзе над мадрац (дараз то була сламяча) пре гиґиєнски причини, цеплоту, защиту мадраца и пре декорацию. Посцелїну ше зоблека и райбе. Людзе углавним маю вецей комплети рижних посцелїнох за кажду посцель и часто их райбу и меняю сезонски же би злєпшали лагодносц спаня на рижних температурох у хижи. Посцелїна звичайно облапя плахту хтора закрива мадрац, єден покровец або паплан, даскельо заглавки зоз заглавчинами. Додатни покровци и паплани можу обезпечиц нєобходну изолацию у жимних хижох дзе ше шпи.

Материяли посцелїни

Дакедишнї дезен памучней перинянки - посцелїни. Музей у Р. Словацкей

Найчастейши типи посцелїни бляди, били або з одредзеним дизайном, памучни або з мишанїни памуку и полиестеру, сатенски, гадвабни... Гуше або каче пирє ше хаснує пре цеплоту, гоч таки полнєня знаю буц иритируюци за велїх людзох, окреме за тих цо маю алерґиї.

Велькосци посцелїни

Велькосци посцелїни ше розликую маюци у оглядзе димензиї посцелї и мадраца за хтори ше ю ма хасновац. Велькосци посцельох ширцом швета варирую, а єст жеми хтори маю свойо стандарди и терминолоґию.

История

Руска одлога, Дюрдьов. Посцелєни пирнаґи (перина и заглавки) на посцелї прикрити зоз ценшу дзирковану плахту а по верху зоз грубшу. Колїска зоз посцелїну за мали беби.

Коло 3400. п.н.е. єгипетски фараонє премесцели посцелї и почали спац на подзвигнутей поверхносци. Посцелїна була барз розвита у Єгипту и на ню ше патрело як на символ шветлосци и чистоти, як и символ просперитету.

Єгипетски мумиї часто були закруцени до посцелїни. Мадраци з часу Римского царства були полнєти з волну, пирйом або зоз шеном. Посцелї були украшени з фарбу, бронзу, стриблом, прикрасками и златом.

Под час ренесанси мадраци були наполнєни зоз сламу и пирйом, а потим закрити з гадвабом або сатеном. Вишивани балдахини и украсни фиронґочки над посцелю приведли до того же посцелї постали барз драги, часто нашлїдзовани з ґенерациї на ґенерацию.

У 18. вику рами посцельох ше правело з лятого желєза, а мадраци були з памуку. По тот час, рижни чкодлївци були прилапйовани як состойна часц аж и кральовских посцельох.

Мадрац пренайдзени аж у 19. вику, а 20. вик принєсол футон, водову посцель (починаюци од 1960), воздушни заглавки, мадраци з ґумову пену и заглавки.

Фразеолоґия

Пойсц до пирнаґох – пойсц спац.

Галерия

• 
  Сучасна посцелїна у предавальнї.
• 
  Традицийни заглавок на посцєлї.
• 
  Украсни заглавки.
• 
  Вишивани заглавчок.
• 
  Била посцелїна зоз пирйом.
• 
  Заглавки у Литваниї.
• 
  Сучасна посцель и посцелїна.
• 
  Посцель воденїчра у Хословцох Р. Чешска.

Литература

• Словнїк руского народного язика II, О – Я, Нови Сад, 2017. рок, бок 551. • Олена Папуга, Руске обисце, Нови Сад, 2012. рок, бок 37.

Вонкашня вяза

• Постељина. sr.wikipedia.org

• Von Tobel, Jackie. "Neck Rolls and Bolsters." The Design Directory of Bedding. Layton, UT: Gibbs Smith, 2009. 275. Print.