Петро Копчаї
| Петро Копчаї | |
|---|---|
| Датум народзеня | 1753. року |
| Датум упокоєня | 7. децембра 1818 (65) |
| Державянство | угорске |
| Язик творох | руски, мадярски |
| Школа | Ґимназия, Вельки Варадин (нєшка Орадеа, Румуния) |
| Универзитет | Грекокатолїцка семинария Св. Варвари, Беч |
| Период твореня | 1783-1818. |
| Жанри | богослуженє, реформатор шветовного живота вирних |
| Поховани | у Керестуре |
Петро Копчаї (*1753 - †7. децембер 1819), 1 перши прави парох у Керестуре
Биоґрафия
[ушориц | ушор жридло]Петро Копчаї народзени у валалє Долнї Мирешов (територия нєшкайшей Ческей) 1753. року. Ґимназию закончел у Вельким Варадинє (нєшка Орадеа, Румуния). Крижевски владика Василий Божичкович го як законченого ґимназиялца приял под юрисдикцию своєй епархиї же би го як Руснака вишколовал за священїка за Руснацох у южней Угорскей, хтори спадли под юрисдикцию Крижевского владичества. Так Петро Копчаї пришол до грекокатолїцкей семинариї до Бечу, до Св. Варвари, 1779. року. Гоч ище нє закончел богословски студиї, владика Божичкович го поволал зоз семинариї на священїцку длужносц.
Петро ше оженєл зоз Ану, дзивку грекокатолїцкого священїка з валалу Венчельов, и 1782. року бул рукоположени за священїк. На свою першу священїцку станїцу бул послани до Керестура дзе сцигол концом фебруара 1783. року.2 Ту бул перше капелан, а од 1786. по 1818. рок бул парох. За ньго мож повесц же бул перши прави парох у Керестуре, бо його предходнїки були лєм управителє парохиї. Народ у Керестуре од початку любел Копчая и вимагал од власцох же би вон ту бул намесцени за пароха.
За розлику од своїх предходнїкох у Керестуре Петро Копчаї бул досц образовани, гоч нє закончел полни богословски студиї. Добрей норови, як прави духовни пастир, вон у парохиї заводзи шор у духовним живоце, а зоз тим ше и у самим валалє запровадзує векши порядок. Прето очиглядна його заслуга же ше Руснаци у Керестуре прихилєли ґу новому способу живота, прилапююци часто и нови, тутейши норми живота.
Петро Копчаї умар у Керестуре 7. децембра 1818. року, дзе є и поховани.
Литература
[ушориц | ушор жридло]- Тамаш, др Юлиян, „1783. рокуˮ, Руски Керестур, лїтопис и история (1745-1991), Месна заєднїца Руски Керестур, 1992, бок 83.
- Мирон Жирош, „Школованє власней рускей интелиґенциїˮ, Бачванско-сримски Руснаци дома и у швеце 1745-1991, Том I I, Грекокатолїцка парохия св. Петра и Павла, Нови Сад, 1998, б 164.
Референци
1 Тамаш, др Юлиян, „1818. рокуˮ, Руски Керестур, лїтопис и история (1745-1991), Месна заєднїца Руски Керестур, 1992, бок 89.
2 Тамаш, др Юлиян, „Священїки хтори служели у парохиялней церкви Св. Миколая у Руским Керестуре ˮ, Руски Керестур, лїтопис и история (1745-1991), Месна заєднїца Руски Керестур, 1992, бок 410.